ລັດຖະບານຈີນຈະສືບຕໍ່ປະຕິບັດນະໂຍບາຍຊັບພະຍາກອນມະນຸດທີ່ໄຂປະຕູສູ່ພາຍນອກກວ້າງຂວາງກວ່າເກົ່າ
(GMT+08:00) 2011-11-05 15:57:15 cri
ວັນທີ4ພະຈິກນີ້,ຢູ່ເມືອງເຊິ່ນເຈິ້ນແຂວງກວາງຕຸ້ງຂອງຈີນ,ທ່ານຈ່າງເຕີຈ່ຽງ,ກຳມະການກົມການເມືອງສູນກາງພັກຄອມມູນິດຈີນ,ຮອງນາຍົກລັດຖະມົນຕີຈີນກ່າວເນັ້ນວ່າ,ຈີນຈະຍຶດໝັ້ນປະຕິບັດຍຸດທະສາດທີ່ສ້າງປະເທດໃຫ້ເຂັ້ມແຂງດ້ວຍຊັບພະຍາກອນມະນຸດ,ຍຶດ ໝັ້ນປະຕິບັດນະໂຍບາຍຊັບພະຍາກອນມະນຸດທີ່ໄຂປະຕູສູ່ພາຍນອກກວ້າງຂວາງກວ່າເກົ່າ,ສືບຕໍ່ປັບປຸງນະໂຍບາຍ,ປັບປຸງການບໍລິການໃຫ້ດີຂຶ້ນຢ່າງບໍ່ຢຸດຢັ້ງ,ຖືການປະຕິບັດ"ແຜນການຜູ່ຊ່ຽວຊານຕ່າງປະເທດພັນຄົນ"ເປັນເວທີ,ສ້າງເງື່ອນໄຂທີ່ດີກວ່າເກົ່າເພື່ອໃຫ້ນັກວິຊາການປະເພດຕ່າງໆເສີມຂະຫຍາຍຄວາມສາມາດຂອງຕົນ,ແລະຊຸກຍູ້ໃຫ້ເສດຖະກິດສັງຄົມຂອງຈີນພັດທະນາທັງດີທັງໄວ.
ໃນເວລາເຂົ້າຮ່ວມພິທີໄຂກອງປະຊຸມແລກປ່ຽນຊັບພະຍາກອນມະນຸດສາກົນຈີນປີ2011,ພ້ອມດ້ວຍເວທີປຶກສາຫາລືເຊິ່ນເຈິ້ນໃນວັນທີ4ພະຈິກນີ້,ທ່ານຈ່າງເຕີຈ່ຽງກ່າວວ່າ,ຈີນຢາກເປີດກວ້າງການໄຂປະຕູສູ່ພາຍນອກຢ່າງບໍ່ຢຸດຢັ້ງ,ເດີນໄປຕາມທ່ວງທ່າພັດທະນາຂອງການແລກປ່ຽນແລະຮ່ວມມືທ້າງດ້ານນັກວິຊາການສາກົນ,ເພີ່ມເນື້ອໃນໃໝ່ໃຫ້ແກ່ການແລກປ່ຽນແລະຮ່ວມມືທາງດ້ານນັກວິຊາການສາກົນ,ບໍ່ພຽງແຕ່ຄວນເພີ່ມຄວາມແຮງໃນວຽກງານທີ່ດຶງດູດນັກວິຊາການຕ່າງປະເທດເທົ່ານັ້ນ,ຍັງຄວນເປີດກວ້າງແລະລົງເລິກການແລກປ່ຽນແລະຮ່ວມມືດ້ານນັກວິຊາການສາກົນ,ຍົກລະດັບການແລກປ່ຽນແລະການຮ່ວມມືໃນດ້ານນີ້ຂຶ້ນສູ່ລະດັບໃໝ່,ຮ່ວມກັນຊຸກຍູ້ຄວາມຈະເລີນຮຸ່ງເຮືອງແລະການພັດທະນາຂອງໂລກ,ເພື່ອສ້າງອະນາຄົດອັນດີງາມກວ່າເກົ່າຂອງມວນມະນຸດ.
