ອົງການຮ່ວມມືຊຽງໄຮປະກອບສ່ວນອັນສຳຄັນເຂົ້າໃນການພັດທະນາສັນຕິພາບຂອງພາກພື້ນ
(GMT+08:00) 2011-11-07 16:55:54 cri
ກອງປະຊຸມຄັ້ງທີ10ຂອງສະພາມົນຕີຫົວໜ້າລັດຖະບານປະເທດສະມາຊິກອົງການຮ່ວມມືຊຽງໄຮໄດ້ຈັດຂຶ້ນຢູ່ແຊງປີເຕີບວກແຫ່ງຣັດເຊຍໃນວັນທີ7ພະຈິກນີ້. ທ່ານເວິ່ນເຈ່ຍປາວ, ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມຄັ້ງນີ້. ກອງປະຊຸມຄັ້ງນີ້ຈະກຳນົດພື້ນຖານແຫ່ງການຮ່ວມມືຂອງອົງການຮ່ວມມືຊຽງໄຮໃນ10ປີຂ້າງໜ້ານີ້, ມີຄວາມໝາຍອັນສຳຄັນຕໍ່ການຊຸກຍູ້ອົງການດັ່ງກ່າວພັດທະນາຢ່າງໝັ້ນທ່ຽງ, ຊຸກຍູ້ຄວາມຈະເລີນຮຸ່ງເຮືອງແລະສະຖຽນລະພາບຂອງພາກພື້ນນີ້.
ອົງການຮ່ວມມືຊຽງໄຮສ້າງຕັ້ງຂຶ້ນຢູ່ນະຄອນຊຽງໄຮຈີນໃນວັນທີ15ມິຖຸນາປີ2001, ປະເທດສະມາຊິກລວມມີຈີນ, ຣັດເຊຍ, ກາຊັກສະຖານ, ກຽກກີສະຖານ, ຕາຊີກີສະຖານແລະອຸສເບກີສະຖານ.
ໃນ10ປີທີ່ຜ່ານມາ, ອົງການຮ່ວມມືຊຽງໄຮໄດ້ຍຶດໝັ້ນການຮ່ວມມືດ້ານຄວາມປອດໄພ, ເສດຖະກິດ, ແລະວັດທະນະທຳເປັນບັນຫາຕົ້ນຕໍ, ໄດ້ເສີມຂະຫຍາຍບົດບາດອັນສຳຄັນທີ່ບໍ່ສາມາດຫາອັນອື່ນມາປ່ຽນແທນໄດ້ໃນການຕໍ່ຕ້ານ"ລັດທິກໍ່ການຮ້າຍ, ລັດທິແບ່ງແຍກດິນແດນ, ລັດທິຫົວຮຸນແຮງ", ຮັກສາສັນຕິພາບແລະສະຖຽນລະພາບຂອງພາກພື້ນ, ຊຸກຍູ້ການພັດທະນາເສດຖະກິດພາກພື້ນ, ຊຸກຍູ້ໄມຕີຈິດມິດຕະພາບລະຫວ່າງປະເທດສະມາຊິກ, ແລະຮັກສາຄວາມໝັ້ນຄົງໃນສັງຄົມຂອງປະເທດສະມາຊິກ, ເຊິ່ງໄດ້ຮັບຄວາມໄວ້ວາງໃຈແລະຄຳຍ້ອງຍໍຈາກປະຊາຄົມໂລກ.
ອົງການຮ່ວມມືຊຽງໄຮປະຕິບັດນ້ຳໃຈຊຽງໄຮຕໍ່ວົງການພາຍໃນ, ຄື"ໄວ້ເນື້ອເຊື່ອໃຈກັນ, ຕ່າງຝ່າຍຕ່າງມີຜົນປະໂຫຍດ, ສະເໝີພາບ, ປຶກສາຫາລືກັນ, ເຄົາລົບຄວາມຫຼາກຫຼາຍດ້ານວັດທະນະທຳ, ສະແຫວງຫາການພັດທະນາຮ່ວມກັນ", ທັງປະຕິບັດຫຼັກການເປີດປະຕູທີ່ບໍ່ຮ່ວມກຸ່ມ, ບໍ່ແນໃສ່ປະເທດແລະເຂດແຄວ້ນອື່ນ. ຄຽງຄູ່ກັບບົດບາດ, ຖານະແລະອິດທິພົນຂອງຕົນທີ່ນັບມື້ນັບສູງຂຶ້ນ, ອົງການຮ່ວມມືຊຽງໄຮໄດ້ຮັບຄວາມນິຍົມຊົມຊອບຈາກປະເທດນັບມື້ນັບຫຼາຍຂຶ້ນ, ກໍ່ໄດ້ຮັບຄວາມຢືນຢັນຈາກອົງການຈັດຕັ້ງສາກົນນັບມື້ນັບຫຼາຍຂຶ້ນ, ອົງການດັ່ງກ່າວຍັງໄດ້ຮັບຮອງເອົາມົງໂກລີ, ປາກິສະຖານ, ອີຣານແລະອິນເດຍເຂົ້າເປັນຜູ້ສັງເກດການ, ໄດ້ຮັບຮອງຖານະເປັນຜູ້ສັງເກດການໃນສະມັດຊາໃຫຍ່ສະຫະປະຊາຊາດ, ໄດ້ສ້າງການພົວພັນຮ່ວມມືກັບສະພາເສດຖະກິດແລະສັງຄົມສະຫະປະຊາຊາດ, ອາຊຽນ, ກຸ່ມປະເທດເອກະລາດ, ແລະອົງການສັນຍາຄວາມປອດໄພຮ່ວມຂອງກຸ່ມປະເທດເອກະລາດດັ່ງນີ້ເປັນຕົ້ນ.
