ວັນທີ7ພະຈິກນີ້ຢູ່ນະຄອນຫຼວງປັກກິ່ງ, ທ່ານຫຼີເຄີ້ຊຽງ, ຮອງນາຍົກລັດຖະມົນຕີຈີນໄດ້ພົບປະກັບລັດຖະມົນຕີວ່າການກະຊວງຊັບພະຍາກອນແລະພະລັງງານຂອງ18ປະເທດ, ເຊັ່ນ, ອົສຕຼາລີ, ແລະການາດາດັ່ງນີ້ເປັນຕົ້ນ.
ທ່ານຫຼີເຄີ້ຊຽງກ່າວວ່າ, ປະເທດຕ່າງໆມີທ່າແຮງທາງດ້ານຊັບພະຍາກອນທີ່ແຕກຕ່າງກັນ, ການເພີ່ມທະວີການຮ່ວມມືເປັນເສັ້ນທາງທີ່ຕ້ອງເປັນໄປ.
ທ່ານຫຼີເຄີ້ຊຽງໄດ້ມີຂໍ້ສະເໜີ3ຂໍ້ກ່ຽວກັບປະຊາຄົມໂລກໃນການເພີ່ມທະວີການຮ່ວມມືໃນດ້ານຊັບພະຍາກອນແລະພະລັງງານ, ຄື, ໜຶ່ງ, ຄວນເພີ່ມທະວີການຮ່ວມມືທີ່ມີການປະຕິບັດຕົວຈິງຢ່າງຮອບດ້ານ, ເຊັ່ນ, ຂຸດຄົ້ນ, ປຸງແຕ່ງ, ເຕັກນິກ, ແລະຕະຫຼາດ, ເພີ່ມຄວາມສາມາດຮັບປະກັນດ້ານຊັບພະຍາກອນຂອງໂລກ. 2ມາ, ຄວນສ້າງສະພາບແວດລ້ອມທີ່ມີຄວາມຍຸດຕິທຳແລະບໍ່ຄວນຈຳແນກໃນການລົງທຶນຕໍ່ກັນ, ການພັດທະນາຄວນດຳເນີນໄປພາຍໃຕ້ການຮ່ວມມືທີ່ມີຜົນປະໂຫຍດເຊື່ອມໂຍງເຂົ້າກັນແລະຊ່ວຍເຫຼືອເຊິ່ງກັນແລະກັນ. ແລະສຸດທ້າຍ, ຄວນໃຫ້ຄວາມສຳຄັນຕໍ່ການນຳໃຊ້ຊັບພະຍາກອນແລະພະລັງງານແບບຍືນຍົງ, ຮ່ວມມືພັດທະນາພະລັງງານໃໝ່ແລະພະລັງງານໝູນວຽນ.
ລັດຖະມົນຕີວ່າການກະຊວງຊັບພະຍາກອນແລະພະລັງງານຂອງປະເທດຕ່າງໆ, ເຊັ່ນ, ອົສຕຼາລີ, ການາດາແລະອາຟຼິກາໃຕ້ແລະອື່ນໆໃຫ້ກ່າວວ່າ, ມີຄວາມຍິນດີເພີ່ມທະວີການຮ່ວມມືກັບຈີນໃນຂົງເຂດຊັບພະຍາກອນແລະພະລັງງານ.
