ຈີນອາເມລິກາຮ່ວມມືໃນອົງການAPECແມ່ນມີຄວາມໝາຍອັນສຳຄັນຫຼາຍ
(GMT+08:00) 2011-11-09 16:33:11 cri
ກອງປະຊຸມສຸດຍອດບໍ່ເປັນທາງການຂອງອົງການຮ່ວມມືເສດຖະກິດອາຊີປາຊິຟິກ ຫຼືAPECທີ່ຈະຈັດຂຶ້ນໃນວັນທີ12ແລະ13ພະຈິກນີ້ຢູ່ທີ່ຮາວາຍແຫ່ງອາເມລິກາ. ໃນຖານະເປັນປະເທດທີ່ພັດທະນາແລ້ວແລະປະເທດທີ່ພວມພັດທະນາທີ່ໃຫຍ່ທີ່ສຸດ, ຈີນກັບອາເມລິກາໄດ້ຮັບຄວາມສົນໃຈຫຼາຍໃນກອງປະຊຸມສຸດຍອດAPECຄັ້ງນີ້.
ອົງການAPECເປັນອົງການຮ່ວມມືເສດຖະກິດລະດັບສູງສຸດ, ມີບົດບາດຫຼາຍທີ່ສຸດແລະມີກົນໄກຄົບຖ້ວນທີ່ສຸດຢູ່ພາກພື້ນອາຊີປາຊິຟິກ, ໄດ້ເຊື່ອມຕໍ່ປະເທດແລະເຂດແຄວ້ນຢູ່ສອງຝັ່ງມະຫາສະໝຸດປາຊີຟິກໃຫ້ມີການພົວພັນກັນຢ່າງໃກ້ຊິດ. ໃນນັ້ນ, ອາເມລິກາແລະຍີ່ປຸ່ນເປັນຜູ້ຕາງໜ້າອົງກອນເສດຖະກິດທີ່ພັດທະນາແລ້ວ, ສ່ວນຈີນກໍ່ເປັນປະເທດທີ່ພວມພັດທະນາໃຫຍ່ທີ່ສຸດແລະອົງກອນເສດຖະກິດທີ່ຈະເລີນໃໝ່. ກ່ຽວກັບເລື່ອງນີ້, ທ່ານນາງໂມນີຄາ ວຣາເລ, ປະທານຄະນະຈັດຕັ້ງອົງການAPECຮາວາຍກ່າວວ່າ, ຈີນ, ອາເມລິກາແລະຍີ່ປຸ່ນຮ່ວມມືກັນຢູ່ຮາວາຍມີຄວາມສຳຄັນຫຼາຍ.
ພາຍຫຼັງເກີດວິກິດການທາງດ້ານການເງິນສາກົນໃນປີ2008ເປັນຕົ້ນມາ, ອົງການAPECໄດ້ສຸມໃສ່ການຊຸຍູ້ເສດຖະກິດພາກພື້ນເຊື່ອມໂຍງເຂົ້າກັນ, ຈັດວາງຍຸດທະສາດໃໝ່ແລະເປົ້າໝາຍການເຕີບໂຕດ້ານເສດຖະກິດ. ນາງວຣາເລເຫັນວ່າ, ໃນເປົ້າໝາຍເຫຼົ່ານີ້, ຈີນແລະອາເມລິກາມີໂອກາດຮ່ວມມືຢ່າງຫຼວງຫຼາຍ. ນາງກ່າວວ່າ, ຂ້າພະເຈົ້າເຫັນວ່າ, ໃນຂົງເຂດເສດຖະກິດສີຂຽວ, ສອງປະເທດຈີນອາເມລິກາມີຜົນປະໂຫຍດຮ່ວມຢ່າງຫຼວງຫຼາຍ; ພ້ອມທັງໃນຫົວຂໍ້ທີ່ເສດຖະກິດພາກພື້ນເຊື່ອມໂຍງເຂົ້າກັນ, ສ້າງພື້ນຖານໃຫ້ແກ່ແຜນການໄລຍະຍາວໃນການສ້າງເຂດການຄ້າເສລີຢູ່ພາກພື້ນອາຊີປາຊີຟິກ, ຈີນແລະອາເມລິກາຈະເປັນຜູ້ໄດ້ຮັບຜົນປະໂຫຍດຫຼາຍທີ່ສຸດຫຼັງຈາກບັນລຸເປົ້າໝາຍດັ່ງກ່າວ.
ຕາມທີ່ຮູ້ແລ້ວວ່າ, ໃນການພັດທະນາເສດຖະກິດ, ຈີນແລະອາເມລິກາມີຄວາມຂັດແຍ່ງກັນຈຳນວນໜຶ່ງ, ເຊັ່ນ, ບັນຫາອັດຕາແລກປ່ຽນເງິນຢວນ, ຄວາມຂັດແຍ່ງດ້ານການຄ້າ, ແລະອື່ນໆ. ທ່ານມີເຊັນ ກຼິນ, ນັກວິຊາການສູນຄົ້ນຄວ້າຍຸດທະສາດສາກົນອາເມລິກາທັງເປັນທີ່ປຶກສາລະດັບສູງດ້ານວຽກງານອາຊີຂອງທ່ານຈັອຈ ບຸສ, ອະດີດປະທານາທິບໍດີອາເມລິກາກ່າວວ່າ, ການຮ່ວມມືລະຫວ່າງຈີນກັບອາເມລິກາໃນອົງການAPECບໍ່ພຽງແຕ່ມີຜົນດີຕໍ່ການພັດທະນາເສດຖະກິດເທົ່ານັ້ນ, ແຕ່ຍັງມີຜົນດີຕໍ່ການຮັກສາສະຖຽນລະພາບຢູ່ອາຊີ. ທ່ານກຼິນກ່າວວ່າ, ອາເມລິກາແລະຈີນບໍ່ມີຄວາມຂັດແຍ່ງກັນຫຼາຍປານໃດໃນAPEC,ຊຶ່ງສ່ວນຫຼາຍແມ່ນການຮ່ວມມືກັນ. ພ້ອມກັນນັ້ນ, ຜູ້ນຳຈີນເຂົ້າຮ່ວມກອງປະຊຸມແລະການຮ່ວມມືໃນAPECກໍ່ສະແດງທ່າທີຕໍ່ອາເມລິກາວ່າ, ລັດຖະບານຈີນບໍ່ໄດ້ສະແຫວງຫາການຮ່ວມກຸ່ມຢູ່ໃນອາຊີ, ແຕ່ໄດ້ຈັດເອົາອາເມລິກາເຂົ້າໃນຂອບອາຊີປາຊິຟິກ. ສະນ້ນທ່າທີອັນຕັ້ງໜ້າຂອງຈີນໃນAPECສະແດງໃຫ້ເຫັນວ່າ, ສອງປະເທດຈີນອາເມລິກາສາມາດຮ່ວມມືກັນໄດ້ຢູ່ໃນອາຊີ.
