ຈີນກັບADBຄົ້ນຄວ້າທິດທາງໃໝ່ກ່ຽວກັບການພັດທະນາກະສິກຳແລະຊົນນະບົດໃນອະນາຄົດ
(GMT+08:00) 2011-11-09 16:23:37 cri
ຕາມຂ່າວສານຊິນຮວາ,ກອງປະຊຸມສຳມະນາລະດັບສູງ"ເວທີຮ່ວມກັນຊົມໃຊ້ຄວາມຮູ້ຈີນ-ທະນາຄານADB"ຄັ້ງທີ3ພາຍໃຕ້ຫົວຂໍ້"ການພັດທະນາຂອງກະສິກຳແລະຊົນນະບົດ"ໄດ້ໄຂຂຶ້ນໃນວັນທີ8ພະຈິກນີ້ຢູ່ນະຄອນຫຼວງປັກກິ່ງ.
ທ່ານເຈີ້ງສ້ຽວສົ່ງ ຫົວໜ້າກົມສາກົນກະຊວງການເງິນຈີນກ່າວຢູ່ທີ່ປະຊຸມວ່າ,ຈີນຍິນດີຮ່ວມກັນຊົມໃຊ້ບົດຮຽນໃນການພັດທະນາກະສິກຳແລະຊົນນະບົດກັບປະເທດຕ່າງໆໃນອາຊີ,ເພີ່ມທະວີການຮ່ວມມືທາງດ້ານຄວາມຮູ້ໃຕ້ໆ,ຊຸກຍູ້ວຽກງານກະສິກຳຂອງປະເທດຕ່າງໆໃນອາຊີໃຫ້ມີການພັດທະນາແລະຍົກລະດັບຊີວິດການເປັນຢູ່ຂອງປະຊາຊົນໃນຊົນນະບົດໃຫ້ສູງຂຶ້ນ.
ທະນາຄານພັດທະນາອາຊີຫຼືADBກ່າວວ່າ,ອາຊີມີປະຊາກອນທີ່ກວມຫຼາຍກວ່າເຄິ່ງໜຶ່ງຂອງປະຊາກອນທົ່ວໂລກ,ລາຄາສະບຽງອາຫານຂອງອາຊີສູງຂຶ້ນຢ່າງບໍ່ຢຸດຢັ້ງ,ຄວາມປອດໄພດ້ານສະບຽງອາຫານນັບມື້ນັບໜ້າເປັນຫ່ວງຫຼາຍ.ຄວາມຕ້ອງການດ້ານສະບຽງອາຫານນັບມື້ນັບເພີ່ມຂຶ້ນເລື້ອຍໆ,ການຜະລິດວັດຖຸເຊື້ອໄຟຊີວະພາບ,ການຜະລິດສານໃຍພືດໄດ້ພາໃຫ້ເກີດມີການແກ່ງແຍ່ງກັນທາງດ້ານຊັບພະຍາກອນກະສິກຳ,ການຂະຫຍາຍຕົວຂອງຕົວເມືອງໄດ້ກວມຍຶດທີ່ດິນປູກຝັງ,ຕົ້ນທຶນໃນການຜະລິດພະລັງງານແລະຝຸ່ນວິທະຍາສາດໄດ້ຖີບຕົວສູງຂຶ້ນ,ທັງໝົດເຫຼົ່ານີ້ລ້ວນແຕ່ໄດ້ນຳເອົາສິ່ງທ້າທາຍມາໃຫ້ການຍົກສູງປະສິດທິພາບໃນການລົງທຶນທາງດ້ານກະສິກຳ.
ປີ2009,ກະຊວງການເງິນຈີນແລະທະນາຄານພັດທະນາອາຊີໄດ້ຮ່ວມກັນສ້າງເວທີຮ່ວມກັນຊົມໃຊ້ຄວາມຮູ້ຈີນ-ທະນາຄານADB,ໂດຍປິ່ນອ້ອມບັນຫາການພັດທະນາແລະບັນຫາຈຸດສຸມທີ່ປະເທດພວມພັດທະນາໃນພາກພື້ນອາຊີປາຊີຟິກສົນໃຈຮ່ວມກັນ,ດຳເນີນການແລກປ່ຽນບົດຮຽນທາງດ້ານນະໂຍບາຍ.
ນອກຈາກຈີນແລ້ວ,ປະເທດສະມາຊິກທີ່ພວມພັດທະນາທີ່ໄດ້ເຂົ້າຮ່ວມກອງປະຊຸມສຳມະນາຄັ້ງນີ້ຍັງມີກຳປູເຈຍ,ຫວຽດນາມ,ອິນໂດເນເຊຍ,ໄທ,ລາວ,ມຽນມາ,ອິນເດຍ,ປາກີສະຖານ,ບັງກຼາເດັດ,ມົງໂກລີ,ເນປານແລະສີລັງກາ.
