ຈີນຈະສືບຕໍ່ສະກັດກັ້ນແລະປາບປາມຂະບວນການລະເມີດສິດຊັບສິນທາງປັນຍາແລະການຜະລິດຈຳໜ່າຍສິນຄ້າປອມ
(GMT+08:00) 2011-11-10 16:15:39 cri
ວັນທີ9ພະຈິກນີ້, ທ່ານເວິ່ນເຈ່ຍປາວ, ນາຍົກລັດຖະມົນຕີຈີນໄດ້ເປັນປະທານຈັດກອງປະຊຸມຄະນະລັດຖະບານ. ກອງປະຊຸມສະເໜີອອກມາວ່າ, ຈະສືບຕໍ່ສະກັດກັ້ນແລະປາບປາມຂະບວນການລະເມີດສິດຊັບສິນທາງປັນຍາແລະການຜະລິດຈຳໜ່າຍສິນຄ້າປອມ.
ກອງປະຊຸມຊີ້ອອກວ່າ, ແຕ່ເດືອນຕຸລາປີ2010ຜ່ານມາຮອດເດືອນມິຖຸນາປີນີ້, ລັດຖະບານຈີນໄດ້ຈັດຕັ້ງໜ່ວຍສະເພາະກິດເພື່ອເຄື່ອນໄຫວຕໍ່ຕ້ານແລະປາບປາມຂະບວນການລະເມີດສິດຊັບສິນທາງປັນຍາແລະການຜະລິດຈຳໜ່າຍສິນຄ້າປອມໃນຂອບເຂດທົ່ວປະເທດ, ແລະໄດ້ຮັບປະສິດທິຜົນອັນພົ້ນເດັ່ນ.
ກອງປະຊຸມກ່າວເນັ້ນວ່າ, ປະຈຸບັນຢູ່ບາງບ່ອນ,ບາງຂົງເຂດຍັງມີບັນຫາລະເມີດສິດຊັບສິນທາງປັນຍາແລະສິນຄ້າປອມທີ່ບໍ່ມີຄຸນນະພາບ, ຄວນສືບຕໍ່ເພີ່ມທະວີການປະຕິບັດກົດໝາຍ, ເພີ່ມການລົງໂທດທາງອາຍາ. ໂດຍສະເພາະແມ່ນເພື່ອແກ້ໄຂບັນຫາທີ່ພົ້ນເດັ່ນທາງດ້ານສະບຽງອາຫານ, ຢາປົວພະຍາດ, ເຄື່ອງສຳອາງ, ແລະຂົງເຂດສິດປະພັນ, ກາໝາຍການຄ້າແລະລິຂະສິດເປັນຕົ້ນ, ເພີ່ມທະວີການຕິດຕາມຄຸ້ມຄອງວິສາຫະກິດຜະລິດແລະດຳເນີນທຸລະກິດຢ່າງເຄັ່ງຄັດ, ປັບປຸງການຄ້າທາງອິນເຕີເນັດແລະລະບຽບການທຸລະກິດໃຫ້ເປັນລະບຽບຮຽບຮ້ອຍ. ພ້ອມກັນນັ້ນ, ເສີມຂະຫຍາຍບົດບາດໃນການຕິດຕາມຂອງສັງຄົມ, ສົ່ງເສີມໃຫ້ປະຊາຊົນໃນສັງຄົມແຈ້ງການກະທຳທີ່ລະເມີດສິດແລະຜະລິດຈຳໜ່າຍສິນຄ້າປອມທີ່ບໍ່ມີຄຸນນະພາບ, ແລະປັບປຸງກົດໝາຍ, ກົດລະບຽບແລະຂໍ້ກຳນົດໃນການຕ້ານການລະເມີດສິດແລະຜະລິດຈຳໜ່າຍສິນຄ້າປອມໃຫ້ຄົບຖ້ວນ.
