ໄພນ້ຳຖ້ວມຢູ່ອາຊີຕາເວັນອອກສຽງໃຕ້ຈະກະທົບກະເທືອນເຖິງຕະຫຼາດເຂົ້າສາກົນ
(GMT+08:00) 2011-11-10 15:44:41 cri
ໄພນ້ຳຖ້ວມຢູ່ຫຼາຍປະເທດໃນອາຊີຕາເວັນອອກສຽງໃຕ້ແກ່ຍາວມາເປັນເວລາຫຼາຍເດືອນ ແຕ່ມາຮອດປະຈຸບັນຍັງບໍ່ທັນສິ້ນສຸດລົງຢ່າງສິ້ນເຊີງເທື່ອ,ບາງປະເທດໃນອາຊີຕາເວັນອອກສຽງໃຕ້ໄດ້ຮັບຜົນເສຍຫາຍທາງດ້ານກະສິກຳຢ່າງໜັກໜ່ວງຊຶ່ງໄດ້ສົ່ງຜົນສະທ້ອນໃນທາງລົບຕໍ່ລາຄາສະບຽງອາຫານ,ຊຶ່ງປະຈຸບັນນີ້ສິ່ງພົ້ນເດັ່ນທີ່ສຸດກໍ່ແມ່ນລາຄາຂອງສະບຽງອາຫານຕົ້ນຕໍແລະລາຄາເຂົ້າທີ່ເປັນສິນຄ້າສົ່ງອອກສຳຄັນຂອງປະເທດເຫຼົ່ານີ້ເລີ່ມຖີບຕົວສູງຂຶ້ນ. ຜູ່ຊ່ຽວຊານເຫັນວ່າ,ໄພນ້ຳຖ້ວມທີ່ເກີດຂຶ້ນເປັນບໍລິເວນກວ້າງຂວາງແບບບໍ່ເຄີຍມີມາກ່ອນອາດຈະພາໃຫ້ບາງເຂດແຄວ້ນຂາດແຄນສະບຽງອາຫານໃນລະດູການໃດໜຶ່ງ,ພ້ອມກັນນັ້ນ,ກໍ່ຈະກະທົບກະເທືອນເຖິງຕະຫຼາດເຂົ້າສາກົນໃນລະດັບໃດໜຶ່ງພາຍໃນປີນີ້ແລະປີໜ້າ.
ຕາມສະຖິຕິຫຼ້າສຸດຂອງອົງການອາຫານແລະການກະເສດຂອງສະຫະປະຊາຊາດຫຼືຟາວແຈ້ງວ່າ,ມາຮອດປະຈຸບັນ,ໄພນ້ຳຖ້ວມໄດ້ສ້າງຄວາມເສຍຫາຍຢ່າງໜັກໜ່ວງໃຫ້ແກ່ກະສິກຳຂອງປະເທດອາຊີຕາເວັນອອກສຽງໃຕ້,ເຄື່ອງປູກຂອງຝັງຊຶ່ງລວມທັງເຂົ້າໄດ້ຮັບຜົນເສຍຫາຍໜັກໜ່ວງທີ່ສຸດໃນເນື້ອທີ່ກວ້າງຂວາງ,ໃນນັ້ນ,ເນື້ອທີ່ນາຂອງໄທມີປະມານ12,5%ໄດ້ຮັບຜົນເສຍຫາຍ,ຟີລິບປິນມີປະມານ6%,ກຳປູເຈຍປະມານ12%,ລາວປະມານ7,5%,ຫວຽດນາມປະມານ0,4%,ນ້ຳຖ້ວມຍັງໄດ້ໄຫຼຊຸຫຼືຖ້ວມສາງເຂົ້າຈຳນວນຫຼວງຫຼາຍ,ຕົວຢ່າງວ່າ,ຢູ່ຟີລິບປິນມີເຂົ້າສານເກືອບ6ແສນໂຕນໄດ້ຮັບຄວາມເສຍຫາຍ,ເທົ່າກັບປະລິມານທີ່ສາມາດກຸ້ມກິນໃນທົ່ວປະເທດໄດ້17ມື້.ພ້ອມດຽວກັນນັ້ນ,ລາຄາເຂົ້າຂອງກຳປູເຈຍ,ຫວຽດນາມແລະໄທເລີ່ມແພງຂຶ້ນ,ໃນນັ້ນ,ລາຄາເຂົ້າພາຍໃນປະເທດກຳປູເຈຍຄາດວ່າອາດຈະເພີ່ມຂຶ້ນເຖິງ50%.
ເພື່ອເຮັດໃຫ້ລາຄາສິນຄ້າແລະຕະຫຼາດມີຄວາມໝັ້ນທ່ຽງ,ຮັບປະກັນການຕອບສະໜອງສະບຽງອາຫານ,ປະເທດທີ່ກ່ຽວຂ້ອງໃນອາຊີຕາເວັນອອກສຽງໃຕ້ໃນຂະນະທີ່ຕ້ານໄພແລະກູ້ໄພຢ່າງຕັ້ງໜ້ານັ້ນຍັງພາກັນໃຊ້ມາດຕະການອັນເໝາະສົມເພື່ອຮັກສາຄວາມໝັ້ນທ່ຽງຂອງຕະຫຼາດເຂົ້າພາຍໃນປະເທດ,ໃນນັ້ນ,ລັດຖະບານກຳປູເຈຍເລີ່ມເປີດຮ້ານຄ້າຢູ່ຕົວເມືອງໃຫຍ່ແລະຕົວເມືອງລະດັບກາງຈຳນວນໜຶ່ງເພື່ອຈຳໜ່າຍເຂົ້າໃຫ້ປະຊາຊົນດ້ວຍລາຄາທີ່ຕ່ຳກວ່າລາຄາໃນຕະຫຼາດ.ລັດຖະບານໃໝ່ຂອງໄທກໍ່ໄດ້ກຳນົດລາຄາໃນການເກັບຊື້ເຂົ້າແລະມີແຜນຈະເກັບຊື້ເຂົ້າເປືອກນຳຊາວກະສິກອນດ້ວຍລາຄາສູງສົມຄວນເລີ່ມແຕ່ເດືອນນີ້ເປັນຕົ້ນໄປ.
ເປັນເວລາດົນນານມາແລ້ວ,ອາຊີແມ່ນແຫຼ່ງຜະລິດແລະບໍລິໂພກເຂົ້າທີ່ສຳຄັນຂອງໂລກ,ປະລິມານການບໍລິໂພກເຂົ້າໃນແຕ່ລະປີໄດ້ກວມ87%ຂອງໂລກ,ພ້ອມດຽວກັນນັ້ນ,ອາຊີກໍ່ແມ່ນບ່ອນສົ່ງອອກເຂົ້າທີ່ສຳຄັນຂອງໂລກ,ໃນນັ້ນ,ໄທເປັນປະເທດສົ່ງອອກເຂົ້າທີ່ໃຫຍ່ທີ່ສຸດຂອງໂລກ,ຊຶ່ງມີປະລິມານການສົ່ງອອກສູງເຖິງ9ລ້ານໂຕນຕໍ່ປີ.
ເມື່ອພິຈາລະນາເຖິງຜົນເສຍຫາຍໂດຍກົງຂອງຂົງເຂດກະສິກຳຂອງປະເທດໃນພາກພື້ນນີ້ພ້ອມດ້ວຍການຜະລິດສະບຽງອາຫານຕາມລະດູການ,ຜູ່ຊ່ຽວຊານເຫັນວ່າ,ປີນີ້ແລະປີໜ້າ,ນອກຈາກບາງປະເທດອາຊີຕາເວັນອອກສຽງໃຕ້ອາດຈະປະສົບໄພຄຸກຄາມຈາກການຂາດແຄນເຂົ້າແລ້ວ,ປະລິມານການຕອບສະໜອງເຂົ້າໃນຕະຫຼາດສາກົນກໍ່ຈະຫຼຸດໜ້ອຍລົງໃນລະດັບໃດໜຶ່ງ,ລາຄາເຂົ້າກໍ່ຈະສູງຂຶ້ນ.ນີ້ບໍ່ພຽງແຕ່ຈະກະທົບເຖິງການພັດທະນາດ້ານເສດຖະກິດຂອງປະເທດທີ່ປະສົບໄພນ້ຳຖ້ວມຂອງພາກພື້ນອາຊີຕາເວັນອອກສຽງໃຕ້ເທົ່ານັ້ນ, ອາດຈະນຳເອົາປັດໄຈບໍ່ໝັ້ນທ່ຽງອັນໃໝ່ມາໃຫ້ຕະຫຼາດສະບຽງອາຫານທົ່ວໂລກອີກດ້ວຍ.ສະນັ້ນ,ນອກຈາກຕ້ານໄພແລະກູ້ໄພຢ່າງຕັ້ງໜ້າແລ້ວ,ປະເທດຂອງພາກພື້ນນີ້ພ້ອມດ້ວຍປະຊາຄົມໂລກຄວນມີການກະກຽມໂດຍໄວເພື່ອຮັບມືກັບຄວາມຫຍຸ້ງຍາກທີ່ອາດຈະເກີດຂຶ້ນໃນປີນີ້ແລະປີໜ້າ.
