ກອງປະຊຸມສຸດຍອດດ້ານການຄ້າແລະການລົງທຶນຂອງອາຊຽນຈະຈັດຂຶ້ນຢູ່ເກາະບາຫຼີຂອງອິນໂດເນເຊຍ
(GMT+08:00) 2011-11-10 16:39:59 cri
ຕາມຂ່າວສານຈີນ:ວັນທີ10ພະຈິກນີ້,ກະຊວງການຄ້າອິນໂດເນເຊຍເປີດເຜີຍວ່າ,ກອງປະ ຊຸມສຸດຍອດດ້ານການຄ້າແລະການລົງທຶນຂອງອາຊຽນປະຈຳປີ2011ຈະຈັດຂຶ້ນຢູ່ເກາະບາຫຼີ ຂອງອິນໂດເນເຊຍແຕ່ວັນທີ16ຫາວັນທີ18ພະຈິກນີ້.
ກອງປະຊຸມສຸດຍອດຄັ້ງນີ້ຈະດຳເນີນໄປເປັນເວລາ3ມື້,ໂດຍມີຈຸດປະສົງໃນການເພີ່ມທະວີການຮ່ວມມືລະຫວ່າງບັນດາປະເທດອາຊຽນແລະຮັບມືກັບສິ່ງທ້າທາຍທີ່ທົ່ວໂລກພວມປະເຊີນ.ກອງປະຊຸມຈະຫາລືກ່ຽວກັບຫົວຂໍ້ສຳຄັນ3ຢ່າງ,ເຊັ່ນ:ສ້າງແຜນການເສດຖະກິດທົ່ວໂລກໃນສະຕະວັດທີ21ຄືນໃໝ່;ສ້າງອາຊຽນເປັນແຫຼ່ງລົງທຶນ;ແລະເພີ່ມທະວີການພົວພັນດ້ານເສດຖະກິດການຄ້າລະຫວ່າງອາຊຽນກັບປະເທດຄູ່ເຈລະຈາ.
ທ່ານກີຕາ ວີຈາວານ,ລັດຖະມົນຕີວ່າການກະຊວງການຄ້າອິນໂດເນເຊຍກ່າວວ່າ,ກອງ ປະຊຸມສຸດຍອດຄັ້ງນີ້ແມ່ນຈັດຂຶ້ນໃນທ່າມກາງທີ່ເສດຖະກິດໂລກຄ່ອຍໆອ່ອນເພຍລົງຍ້ອນວິກິດການໜີ້ສິນຂອງເອີຣົບ.ເສດຖະກິດໂລກມີຜົນກະທົບຕໍ່ຂະບວນການສ້າງປະຊາຄົມອາຊຽນໃນປີ2015,ແລະປະເທດທັງໝົດລ້ວນແຕ່ຮູ້ສຶກວິຕົກກັງວົນຕໍ່ເສດຖະກິດຂອງເອີຣົບແລະອາເມລິກາທີ່ຊຸດໂຊມລົງ.ສະນັ້ນ,ອາຊຽນຄວນຖືເອົາໂອກາດນີ້ເລັ່ງລັດພັດທະນາເສດຖະກິດ.ພາຍໃນວົງເສດຖະກິດອາຊີຕາເວັນອອກ,ໃນເວລາດຳເນີນການຮ່ວມມືກັບຈີນ,ສ.ເກົາຫຼີ,ຍີ່ປຸ່ນ,ອົສຕຼາລີ,ນູແວນເຊລັງແລະອິນເດຍ,ອາຊຽນຄວນເສີມຂະ ຫຍາຍບົດບາດຂອງຕົນໃຫ້ສູງຂຶ້ນ.
ໃນກອງປະຊຸມສຸດຍອດດ້ານການຄ້າແລະການລົງທຶນເທື່ອນີ້,ອາຊຽນສຸມໃສ່ການປຶກສາຫາລືກ່ຽວກັບການພົວພັນຮ່ວມມືທາງດ້ານເສດຖະກິດການຄ້າລະຫວ່າງອາຊຽນກັບສ.ເກົາຫຼີ,ອາຊຽນກັບຍີ່ປຸ່ນ,ອາຊຽນກັບອິນເດຍ,ອາຊຽນກັບອາເມລິກາແລະອາຊຽນກັບອົສຕຼາລີເປັນຫົວຂໍ້ສະເພາະ.ພ້ອມກັນນັ້ນ,ກອງປະຊຸມຍັງຈະຈັດການເຄື່ອນໄຫວລະລຶກອາຊຽນ ກັບຈີນສ້າງຕັ້ງການພົວພັນຄູ່ຮ່ວມມືເສດຖະກິດຄົບຮອບ20ປີ.
