ຕອນບ່າຍວັນທີ10ພະຈິກນີ້, ທ່ານຫູຈິນທ່າວ, ປະທານປະເທດຈີນໄດ້ຕ້ອນຮັບການເຂົ້າຢ້ຽມຂ່ຳນັບຂອງຜູ້ແທນຈາກວົງການອຸດສາຫະກຳການຄ້າອາເມລິກາຢູ່ຮາວາຍ.
ທ່ານຫູຈິນທ່າວສະເໜີວ່າ, ພາຍໃຕ້ສະພາບການໃນປະຈຸບັນ, ການພົວພັນເສດຖະກິດການຄ້າຈີນອາເມລິກາປະເຊີນກັບສິ່ງທ້າທາຍ, ທັງມີໂອກາດການພັດທະນາອັນສຳຄັນ. ທ່ານກ່າວວ່າ, ຖ້າຫາກວ່າອາເມລິກາຫຼຸດຜ່ອນການຈຳກັດໃນການສົ່ງອອກເຕັກໂນໂລຊີສູງສູ່ຈີນໂດຍໄວ, ບໍ່ພຽງແຕ່ມີຜົນດີຕໍ່ການຜ່ອນຄາຍຄວາມບໍ່ດຸນດ່ຽງກັນທາງດ້າການຄ້າລະຫວ່າງຈີນກັບອາເມລິກາເທົ່ານັ້ນ, ຍັງຈະມີຜົນດີຕໍ່ການຊຸກຍູ້ເສດຖະກິດແລະການປະກອບອາຊີບຢູ່ອາເມລິກາ. ຈີນຕີລາຄາຢ່າງຕັ້ງໜ້າຕໍ່ທ່າທີຂອງລັດຖະບານອາເມລິກາທີ່ເຫັນດີໃຫ້ທຸລະກິດຈີນໄປລົງທຶນຢູ່ອາເມລິກາ, ຫວັງໃຫ້ອາເມລິກາຈົ່ງໃຊ້ມາດຕະການໃນການປະຕິບັດຕົວຈິງຫຼາຍກວ່າເກົ່າ. ນອກນີ້, ຖ້າວ່າຈີນອາເມລິກາຂຸດຄົ້ນທ່າແຮງບົ່ມຊ້ອນຕື່ມອີກໃນຂົງເຂດພະລັງງານໃໝ່, ພະລັງງານສະອາດ, ການປະຢັດພະລັງງານທັງຫຼຸດການລະບາຍມົນລະພິດ, ຢາຊີວະພາບ, ການບິນແລະການບິນອາວະກາດເປັນຕົ້ນ, ການພົວພັນເສດຖະກິດການຄ້າລະຫວ່າງຈີນກັບອາເມລິກາຈະມີອະນາຄົດອັນກວ້າງຂວາງ.
ໃນເວລາພົບປະ, ທ່ານຫູຈິນທ່າວຍັງໄດ້ຮຽກຮ້ອງໃຫ້ວິສາຫະກິດຈີນແລະອາເມລິກາຈົ່ງຍຶດໝັ້ນການປຶກສາຫາລືຢ່າງມີຄວາມສະເໝີພາບ, ປະຕິບັດຕາມກົດເກນຕະຫຼາດແລະກະຕິກາຂອງອົງການການຄ້າໂລກ, ແກ້ໄຂຄວາມຂັດແຍ່ງກັນດ້ານເສດຖະກິດການຄ້າຢ່າງເໝາະສົມ, ບໍ່ຄວນຫັນປ່ຽນບັນຫາເສດຖະກິດການຄ້າໃຫ້ເປັນບັນຫາການເມືອງ, ບໍ່ຄວນປະຕິບັດລັດທິປົກປ້ອງການຄ້າ. ທ່ານຍັງກ່າວເນັ້ນວ່າ, ຈີນມີຄວາມຕັດສິນໃຈສູງໃນການເພີ່ມທະວີການປົກປ້ອງສິດຊັບສິນທາງປັນຍາຢ່າງເດັດດ່ຽວບໍ່ປ່ຽນແປງ, ໄດ້ສ້າງລະບົບກົດໝາຍດ້ານສິດຊັບສິນທາງປັນຍາທີ່ຄົບຖ້ວນສົມຄວນ, ໃນຕໍ່ໜ້ານີ້ວຽກງານຈຸດສຸມແມ່ນເພີ່ມທະວີການປະຕິບັດກົດໝາຍ.
1 2