ຣັດເຊຍສິ້ນສຸດການເຈລະຈາກ່ຽວກັບການເຂົ້າເປັນສະມາຊິກWTO
(GMT+08:00) 2011-11-11 15:50:50 cri
ພາຍຫຼັງໄດ້ເຈລະຈາດ້ວຍຄວາມຫຍຸ້ງຍາກມາເປັນເວລາ18ປີ,ໜ່ວຍງານເພື່ອກະກຽມໃຫ້ຣັດເຊຍເຂົ້າເປັນສະມາຊິກອົງການການຄ້າໂລກຫຼືWTOໄດ້ຈັດກອງປະຊຸມເທື່ອສຸດທ້າຍໃນວັນທີ10ພະຈິກນີ້ຢູ່ເຊີແນວຂອງສວິສ,ກອງປະຊຸມໄດ້ເປັນເອກະສັນກັນຮັບຮອງເອກກະສານສະບັບສຸດທ້າຍຂອງສັນຍາວ່າດ້ວຍການເຂົ້າເປັນສະມາຊິກWTOຂອງຣັດເຊຍ.
ຕາມເອກະສານສະບັບນີ້,ໂດຍລວມແລ້ວ,ພາສີຂອງຣັດເຊຍຈະຫຼຸດ ຈາກ10%ໃນປີ2011ລົງຮອດ7,8%.ພາຍຫຼັງສັນຍາສະບັບນີ້ມີຜົນບັງຄັບໃຊ້ແລ້ວ.ຣັດເຊຍມີພັນທະປະຕິບັດພາສີໃໝ່ຕໍ່ລາຍການນຳເຂົ້າແລະສົ່ງອອກສິນຄ້າຈຳນວນຫຼາຍກວ່າ1/3ໂດຍທັນທີ,ນອກນີ້, ອີກ1/4ຂອງລາຍການພາສີກໍ່ຈະດັດປັບຄືນໃໝ່ຕາມສັນຍາພາຍໃນ3ປີ.
ພາຍຫຼັງກອງປະຊຸມ,ທ່ານປາສການ ລາມີ ຜູ່ອຳນວຍການໃຫຍ່ອົງການການຄ້າໂລກໄດ້ແຈ້ງຕໍ່ສື່ມວນຊົນວ່າ,ພາຍຫຼັງຣັດເຊຍເຂົ້າເປັນສະມາຊິກອົງການການຄ້າໂລກແລ້ວ,ອົງການການຄ້າໂລກຈະປົກຄຸມການຄ້າສາກົນເຖິງ98%,ຣັດເຊຍແລະສະມາຊິກຂອງອົງການການຄ້າໂລກໃນປະຈຸບັນພ້ອມດ້ວຍອົງການການຄ້າໂລກກໍ່ລ້ວນແຕ່ຈະໄດ້ຮັບຜົນປະໂຫຍດ.
ຄະນະກຳມາທິການສະຫະພາບເອີລົບໄດ້ອອກປະກາດແຈ້ງການໃນມື້ດຽວກັນໂດຍສະແດງຄວາມຊົມເຊີຍຕໍ່ໜ່ວຍງານອົງການການຄ້າໂລກທີ່ເປັນເອກະສັນກັນເຫັນດີໃຫ້ຣັດເຊຍເຂົ້າເປັນສະມາຊິກອົງການການຄ້າໂລກ.