ສະກັດກັ້ນໄພເງິນເຟີ້ແມ່ນໜ້າທີ່ສຳຄັນທີ່ສຸດຂອງວຽກງານທາງດ້ານເສດຖະກິດສັງຄົມໃນປີໜ້າຂອງຫວຽດນາມ
(GMT+08:00) 2011-11-11 16:00:40 cri
ຕາມໜັງສືພິມໄຊງ່ອນ ຮ່າຍຟອງ ຂອງຫວຽດນາມແຈ້ງ ວ່າ: ວັນທີ9ພະຈິກນີ້,ສະພາແຫ່ງຊາດຫວຽດນາມໄດ້ຜ່ານມະຕິແຜນການພັດທະນາເສດຖະກິດສັງຄົມຫວຽດນາມ2012.ເປົ້າໝາຍລວມທີ່ລະບຸໄວ້ໃນມະຕິແມ່ນຖືການສະກັດກັ້ນໄພເງິນເຟີ້ເປັນວຽກງານບູລິມະສິດ,ຮັກສາຄວາມໝັ້ນທ່ຽງທາງດ້ານເສດຖະກິດມະຫາພາກ,ເຮັດໃຫ້ເສດຖະກິດເຕີບໂຕຢ່າງສົມເຫດສົມຜົນ,ຫັນປ່ຽນຮູບແບບການເຕີບໂຕທາງດ້ານເສດຖະກິດ,ປັບປຸງໂຄງປະກອບເສດຖະກິດ,ຍົກສູງຄຸນນະພາບແລະປະສິດທິພາບຂອງເສດຖະກິດແລະກຳລັງແກ່ງແຍ່ງ,ຮັບປະກັນຊີວິດການເປັນຢູ່ຂອງປະຊາຊົນແລະສະຫວັດດີການທາງສັງຄົມ,ເດັດດ່ຽວປົກປັກຮັກສາຄວາມໝັ້ນຄົງທາງດ້ານການເມືອງ,ປັບປຸງວຽກງານປ້ອງກັນປະເທດ,ຮັບປະກັນຄວາມປອດໄພແຫ່ງຊາດແລະຄວາມສະຫງົບໃນສັງຄົມ,ປະຕິບັດວຽກງານການຕ່າງປະເທດໃຫ້ມີປະສິດທິຜົນຫຼາຍຂຶ້ນກວ່າເກົ່າແລະເຊື່ອມໂຍງເຂົ້າໃນປະຊາຄົມໂລກ.
ຄາດໝາຍການພັດທະນາເສດຖະກິດສັງຄົມປີ2012ຂອງຫວຽດນາມແມ່ນເຮັດໃຫ້GDPເພີ່ມຂຶ້ນປະມານ6%ຫາ6,5%,ການສົ່ງອອກສິນຄ້າເພີ່ມຂຶ້ນ13%,ຈັງຫວະການເຕີບໂຕຂອງດັດຊະນີລາຄາຜູ່ບໍລິໂພກຫຼືCPIໃຫ້ຕ່ຳກວ່າ10%,ສ້າງວຽກເຮັດງານທຳໃໝ່1ລ້ານ6ແສນຕຳແໜ່ງ,ອັດຕາຫວ່າງງານໃນຕົວເມືອງຢູ່ລະຫວ່າງ4%,ຄອບຄົວທີ່ທຸກຍາກຫຼຸດລົງ2%ຕໍ່ປີແລະອື່ນໆ.ເພື່ອບັນລຸເປົ້າໝາຍເຫຼົ່ານີ້,ຫວຽດນາມໄດ້ວາງມາດຕະການອອກມານຳໃຊ້ເຖິງ9ມາດຕະການ.
