"ເວທີປຶກສາຫາລືການພັດທະນາຕິເບດຈີນ"ຄັ້ງທີ3ປິດລົງຢູ່ອາແຕນຂອງເກຼັກ
(GMT+08:00) 2011-11-12 16:09:08 cri
ວັນທີ11ພະຈິກນີ້, "ເວທີປຶກສາຫາລືການພັດທະນາຕິເບດຈີນ"ຄັ້ງທີ3ທີ່ຫ້ອງການຂ່າວຄະນະລັດຖະບານຈີນ,ສະຖານທູດຈີນປະຈຳເກຼັກແລະສະມາຄົມການຄ້າເກຼັກ-ຈີນເປັນເຈົ້າພາບຮ່ວມກັນຈັດຂຶ້ນໄດ້ປິດລົງຢູ່ອາແຕນຂອງເກຼັກຫຼັງຈາກໄດ້ປະກາດ "ແຈ້ງການຮ່ວມອາແຕນ"ແລ້ວ.
ແຈ້ງການກ່າວວ່າ,ຜູ້ເຂົ້າຮ່ວມປະຊຸມໄດ້ສະແດງຄວາມຍ້ອງຍໍຕໍ່ການສະໜັບສະໜູນດ້ານນະໂຍບາຍແລະການຊ່ວຍເຫຼືອດ້ານວັດຖຸຂອງຄະນະລັດຖະບານສູນກາງພັກກອມມູນິດຈີນແລະເຂດອື່ນໆຂອງຈີນສະໜອງໃຫ້ໃນການຊຸກຍູ້ການພັດທະນາແບບທັນສະໄໝແລະປົກປັກຮັກສາວັດທະນະທຳອັນເປັນມູນເຊື້ອຂອງຕິເບດ,ແລະມີຄວາມໝັ້ນໃຈຫຼາຍຕໍ່ການພັດທະນາຕິເບດໃນອະນາຄົດ. ຜູ້ຮ່ວມປະຊຸມເຫັນວ່າ,ປະຊາຄົມໂລກດຳເນີນການຮ່ວມມືກັບຕິເບດໃນດ້ານພະລັງງານ,ສະພາບແວດລ້ອມ,ການສຶກສາ,ສາທາລະນະສຸກແລະດ້ານອື່ນໆໄດ້ພົບກັບກາລະໂອກາດທີ່ດີແລະອະນາຄົດທີ່ກວ້າງຂວາງ.
ໃນໄລຍະກອງປະຊຸມທີ່ດຳເນີນເປັນເວລາ2ວັນ,ເຈົ້າໜ້າທີ່ລັດຖະບານ, ຊ່ຽວຊານ,ນັກວິຊາການ,ຜູ້ແທນຂອງວິສາຫະກິດ,ບຸກຄົນຂອງສື່ມວນຊົນທີ່ມາຈາກເກຼັກ,ຈີນ,ອັງກິດ,ຝລັ່ງ,ເຢຍລະມັນ,ອິນເດຍ,ເນປານແລະປະເທດອື່ນໆ ໄດ້ດຳເນີນການປຶກສາຫາລືກັນໂດຍໝູນອ້ອມຫົວຂໍ້ຕ່າງໆກ່ຽວກັບເຂດປົກຄອງຕົນເອງຕິເບດ,ເຊັ່ນ: ການພັດທະນາເສດຖະກິດສັງຄົມ,ການສືບທອດວັດທະນະທຳ,ການອະນຸລັກສິ່ງແວດລ້ອມ,ວິທະຍາສາດເຕັກນິກ,ການສຶກສາ,ສາທາລະນະສຸກ,ການພັດທະນາຂະແໜງການທ່ອງທ່ຽວແລະໂອກາດຂອງເກຼັກແລະປະເທດອື່ນໆໃນດ້ານການລົງທຶນຢູ່ຕິເບດແລະຫົວຂໍ້ອື່ນໆ.
