ທ່ານຫູຈິນທ່າວພົບປະທ່ານລຽນຊ້ານ
(GMT+08:00) 2011-11-12 16:20:43 cri
ຕອນເຊົ້າວັນທີ11ພະຈິກນີ້ຕາມເວລາທ້ອງຖິ່ນ, ທ່ານຫູຈິນທ່າວ,ເລຂາທິການໃຫຍ່ສູນກາງພັກກອມມູນິດຈີນ ໄດ້ພົບປະກັບທ່ານລຽນຊ້ານ, ປະທານກິຕິມະສັກພັກກົກໝິນຕັງຈີນຢູ່ຮາວາຍຂອງອາເມລິກາ.
ທ່ານຫູຈິນທ່າວກ່າວວ່າ, ໃນ3ປີຜ່ານມາ,ພາຍໃຕ້ຄວາມພະຍາຍາມຮ່ວມກັນລະຫວ່າງສອງຝັ່ງ,ສະຖານະການລະຫວ່າງສອງຝັ່ງຊ່ອງແຄບໄຕ້ຫວັນໄດ້ມີການປ່ຽນແປງອັນສຳຄັນທີ່ຕັ້ງໜ້າ,ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນກໍ່ໄດ້ປະກົດມີສະພາບການໃໝ່ທີ່ພັດທະນາໂດຍສັນຕິ. ເລື່ອງຈິງໄດ້ພິສູດວ່າ,ການພົວພັນລະຫວ່າງສອງຝັ່ງຊ່ອງແຄບໄຕ້ຫວັນພັດທະນາໂດຍສັນຕິສອດຄ່ອງກັບຄວາມມຸ່ງມາດປາຖະໜາຮ່ວມກັນຂອງພີ່ນ້ອງຮ່ວມຊາດທັງສອງຝັ່ງ,ສອດຄ່ອງກັບຜົນປະໂຫຍດລວມຂອງປະຊາຊາດຈີນ,ທິດທາງແມ່ນຖືກຕ້ອງ. ສອງຝັ່ງຊ່ອງແຄບໄຕ້ຫວັນຄວນສືບຕໍ່ທຳຄວາມພະຍາຍາມ,ຍຶດຖືຫົວຂໍ້ຫຼັກທີ່ຂະຫຍາຍການພົວພັນລະຫວ່າງສອງຝັ່ງໂດຍສັນຕິ,ປັບປຸງພື້ນຖານທາງການເມືອງຮ່ວມໃນການຕ້ານ "ໄຕ້ຫວັນເປັນເອກະລາດ"ແລະເຫັນດີນຳ "ຫຼັກໝັ້ນຈີນດຽວ",ຮັກສາການພົວພັນລະຫວ່າງສອງຝັ່ງໃຫ້ຂະຫຍາຍໄປໜ້າ.
ທ່ານລຽນຊ້ານໄດ້ສະແດງຄວາມເຫັນດີເຫັນພ້ອມນຳຄວາມເຫັນຂອງທ່ານຫູຈິນທ່າວ. ທ່ານລຽນຊ້ານກ່າວວ່າ,ໃນຊຸມປີຜ່ານມານີ້, ພາຍໃຕ້ຄວາມພະຍາຍາມຂອງສອງຝ່າຍ,ການພົວພັນລະຫວ່າງສອງຝັ່ງໄດ້ປະກົດມີສະພາບການໃໝ່ທີ່ມີການພັດທະນາທາງການເມືອງໂດຍສັນຕິພາບ,ການແລກປ່ຽນໃນດ້ານເສດຖະກິດການຄ້າທີ່ຕ່າງຝ່າຍຕ່າງມີຜົນປະໂຫຍດຮ່ວມກັນແລະສັງຄົມເຊື່ອມໂຍງເຂົ້າກັນແລະໄປມາຫາສູ່ກັນ,ເຮັດໃຫ້ຄົນຮູ້ສຶກດີໃຈຫຼາຍ.
ຍຶດໝັ້ນ "ຫຼັກໝັ້ນຈີນດຽວ"ແມ່ນສີລາລຶກສຳຄັນໃນການຂະຫຍາຍການພົວພັນລະຫວ່າງສອງຝັ່ງໂດຍສັນຕິ,ແມ່ນຫີນຮອງພື້ນໃນການບັນລຸເສດຖະກິດການຄ້າລະຫວ່າງສອງຝັ່ງໃຫ້ຕ່າງຝ່າຍຕ່າງໄດ້ຮັບຜົນປະໂຫຍດ ແລະມີຄວາມຈະເລີນຮຸ່ງເຮືອງ,ກໍ່ແມ່ນບ່ອນອີງຂອງຄວາມໄວ້ເນື້ອເຊື່ອໃຈກັນດ້ານການເມືອງລະຫວ່າງສອງຝັ່ງ. ຫວັງໃຫ້ສອງຝ່າຍໂຈະຄວາມຂັດແຍ່ງກັນ,ສະແຫວງຫາສິ່ງທີ່ຄືກັນແລະສະຫງວນສິ່ງທີ່ຕ່າງກັນ,ປະກອບສ່ວນຍິ່ງຕັ້ງໜ້າກວ່າເກົ່າເຂົ້າໃນການສ້າງຄວາມສຸກໃຫ້ແກ່ປະປະຊາຊົນລະຫວ່າງສອງຝັ່ງຊ່ອງແຄບໄຕ້ຫວັນ.
