ວັນທີ12 ພະຈິກນີ້,ທ່ານຫູຈິນທາວ,ປະທານປະເທດຈີນທີ່ໄປເຂົ້າຮ່ວມກອງປະຊຸມບໍ່ເປັນທາງການຂອງຜູ່ນຳອົງການຮ່ວມມືເສດຖະກິດອາຊີປາຊີຟິກຫຼືເອເປັກຢູ່ຮາວາຍໄດ້ກ່າວວ່າ,ຈີນຈະຊຸກຍູ້ການເປີດປະຕູຕໍ່ພາຍນອກໃນຂອບເຂດແລະຂົງເຂດທີ່ກວ້າງຂວາງກວ່າເກົ່າຈາກລະດັບສູງກວ່າເກົ່າ,ເພື່ອປະຕິບັດຍຸດທະສາດເປີດປະຕູຢ່າງຕັ້ງຫນ້າແລະເປັນເຈົ້າການກວ່າເກົ່າ.
ມື້ດຽວກັນ,ໃນເວລາທ່ານຫູຈິນທາວເຂົ້າຮ່ວມກອງປະຊຸມສຸດຍອດອຸດສາ ຫະກຳການຄ້າຂອງອົງການເອເປັກ,ທ່ານກ່າວປາຖະກະຖາໂດຍຊີ້ອອກວ່າ, ປະຈຸບັນນີ້,ປະເທດສະມາຊິກຂອງອົງການເອເປັກຄວນຍຶດຫມັ້ນການຮັກສາການເຕີບໂຕ,ຊຸກຍູ້ຄວາມຫມັ້ນທ່ຽງ,ໂດຍສະເພາະແມ່ນຕ້ອງພະຍາຍາມບັນລຸການເຕີບໂຕຢ່າງແຂງແຮງ,ເພື່ອເພີ່ມພະລັງແມ່ແຮງໃຫ້ການ ພັດທະນາເສດຖະກິດຂອງພາກພື້ນອາຊີປາຊິຟິກກໍ່ຄືຂອງໂລກ.
ດ້ວຍເຫດນີ້,ທ່ານໄດ້ສະເຫນີວ່າຄວນປັບປຸງກົນໄກຊຳລະແກ້ໄຂເສດຖະກິດທົ່ວໂລກໃຫ້ດີຂຶ້ນ,ສ້າງການພົວພັນຄູ່ຮ່ວມມືການພັດທະນາແບບໃຫມ່ໃນທົ່ວໂລກທີ່ສະເຫມີພາບແລະສະຫມ່ຳສະເຫມີກັນກວ່າເກົ່າ,ແລະຮຽກຮ້ອງໃຫ້ຝ່າຍຕ່າງໆຮັກສາໂຄງປະກອບການຄ້າຫຼາຍຝ່າຍແລະລົງເລິກການເຊື່ອມໂຍງເສດຖະກິດໃນພາກພື້ນເຂົ້າເປັນອັນຫນຶ່ງອັນດຽວກັນ.
ພ້ອມກັນນັ້ນ,ທ່ານຍັງກ່າວເນັ້ນວ່າ,ການພັດທະນາຂອງຈີນແມ່ນກຳລັງທີ່ສຳຄັນໃນການຊຸກຍູ້ການເຕີບໂຕທາງດ້ານເສດຖະກິດຂອງພາກພື້ນອາຊີປາຊິຟິກກໍຄືຂອງໂລກ.ຈີນຍິນດີຕ້ອນຮັບບຸກຄົນວົງການອຸດສາຫະກຳການຄ້າຂອງພາກພື້ນອາຊີປາຊິຟິກຮ່ວມກັນແບ່ງປັນໂອກາດທີ່ດີໃນການພັດທະນາເສດ ຖະກິດຂອງຈີນ,ຍິນດີສືບຕໍ່ຮ່ວມກັບຝ່າຍຕ່າງໆເພີ່ມທະວີການຮ່ວມມື,ເພື່ອເພີ່ມພະລັງແມ່ແຮງໃຫ້ການພັດທະນາເສດຖະກິດຂອງພາກພື້ນອາຊີປາຊິຟິກແລະທົ່ວໂລກ.
