ວັນທີ11 ພະຈິກນີ້,ຢູ່ທີ່ໂຮໂນລູລູຂອງຮາວາຍອາເມລິກາ,ທ່ານເສີນເຕີມິງ,ລັດຖະມົນຕີວ່າການກະຊວງການຄ້າຈີນກ່າວວ່າ,ຈີນຍິນດີເພີ່ມການນຳເຂົ້າຈາກອາເມລິກາແລະລົງທຶນຢູ່ອາເມລິກາໃຫ້ຫຼາຍກວ່າເກົ່າຕື່ມອີກ.
ວັນທີ11ພະຈິກນີ້,ທ່ານເສີນເຕີມິງ,ລັດຖະມົນຕີວ່າການກະຊວງການຄ້າຈີນທີ່ໄປເຂົ້າຮ່ວມກອງປະຊຸມລະດັບລັດຖະມົນຕີຂອງອົງການເອເປັກຢູ່ລັດຮາວາຍນັ້ນໄດ້ພົບປະກັບທ່ານຈອນ ໄບຼເຊີນ,ລັດຖະມົນຕີວ່າການກະຊວງການຄ້າອາເມລິກາແລະທ່ານອື່ນໆ.ທ່ານເສີນເຕີມິງກ່າວວ່າ,ຈີນຍິນດີເພີ່ມການນຳເຂົ້າຈາກອາເມລິກາໃຫ້ຫຼາຍຂຶ້ນ,ຊຸກຍູ້ໃຫ້ການຄ້າລະຫວ່າງສອງຝ່າຍດຸນດຽງກັນ,ແຕ່ອາເມລິກາພັດຈັດເອົາຜະລິດຕະພັນຈຳນວນຫຼວງຫຼາຍເຂົ້າໃນຂອບເຂດຄວບຄຸມ,ພຽງແຕ່ດ້ານນີ້ກໍ່ໄດ້ມີຄວາມເສຍຫາຍເກືອບຮ້ອຍຕື້ໂດລາຕໍ່ການສົ່ງອອກໃຫ້ຈີນ.ພ້ອມກັນນັ້ນ,ທ່ານເສິນເຕີມິງຍັງສະແດງຄວາມເອົາໃຈໃສ່ຕໍ່ອາເມລິກາທີ່ປະຕິເສດນັກທຸລະກິດຈີນໄປລົງທຶນຢູ່ອາເມລິກາແລະວິຊາຂອງ ນັກທຸລະກິດທີ່ໄປອາເມລິກາຖືກກີດຂວາງດ້ວຍຂໍ້ອ້າງທີ່ວ່າສຳຫຼວດທາງດ້ານຄວາມປອດໄພແລະອື່ນໆ. ທ່ານໄບຼເຊິນໄດ້ເຫັນດີນຳການເພີ່ມການລົງທຶນຂອງນັກທຸລະກິດຈີນຢູ່ອາເມລິກາໃຫ້ຫຼາຍຂຶ້ນຕື່ມອີກ.ທ່ານກ່າວວ່າ,ຄຽງຄູ່ກັບການພັດທະນາເສດຖະກິດຂອງຈີນ,ອາເມລິກາຍິນດີຮ່ວມກັບຈີນເພີ່ມທະວີການຮ່ວມມືໃນຫຼາຍຂົງເຂດ,ແລະເຊື່ອຫມັ້ນວ່າພຽງແຕ່ດຳເນີນການຮ່ວມມືກັນເທົ່ານັ້ນ,ຈຶ່ງຈະສາມາດແກ້ໄຂບັນຫາຕ່າງໆເຊັ່ນ: ຄວາມຂັດແຍ່ງກັນລະຫວ່າງສອງປະເທດແລະການຄ້າບໍ່ດຸ່ນດ່ຽງກັນແລະອື່ນໆ.
