ປະທານປະເທດຈີນພົບປະກັບນາຍົກລັດຖະມົນຕີຍີ່ປຸ່ນ
(GMT+08:00) 2011-11-13 12:01:09 cri
ວັນທີ12ພະຈິກນີ້, ຢູ່ຮາວາຍຂອງອາເມລິກາ, ທ່ານຫູຈິນທ່າວ, ປະທານປະເທດຈີນໄດ້ພົບປະກັບທ່ານໂນດາ ໂຢຊີຮີໂກະ, ນາຍົກລັດຖະມົນຕີຍີ່ປຸ່ນ. ສອງຝ່າຍເປັນເອກະສັນກັນເຫັນດີສືບຕໍ່ຂະຫຍາຍການພົວພັນຍຸດທະສາດແບບຕ່າງຝ່າຍຕ່າງມີຜົນປະໂຫຍດຕື່ມອີກ.
ທ່ານຫູຈິນທ່າວກ່າວວ່າ, ການພົວພັນຈີນຍີ່ປຸ່ນເປັນໜຶ່ງໃນການພົວພັນສອງຝ່າຍອັນສຳຄັນທີ່ສຸດສຳລັບທັງສອງປະເທດຈີນຍີ່ປຸ່ນ. ຈີນໃຫ້ຄວາມສຳຄັນແກ່ການຂະຫຍາຍການພົວພັນຈີນຍີ່ປຸ່ນຈາກລະດັບສູງທາງດ້ານຍຸດທະສາດແລະແງ່ທີ່ຍາວໄກຢ່າງສະເໝີຕົ້ນສະເໝີປາຍ, ຍຶດໝັ້ນນະໂຍບາຍໄມຕີຈິດມິດຕະພາບກັບຍີ່ປຸ່ນ. ຈີນຍິນດີຮ່ວມກັບຍີ່ປຸ່ນ, ເພີ່ມທະວີການສົນທະນາ, ການແລກປ່ຽນແລະການຮ່ວມມືຢ່າງຮອບດ້ານ, ຊຸກຍູ້ການພົວພັນຍຸດທະສາດແບບຕ່າງຝ່າຍຕ່າງມີຜົນປະໂຫຍດຂະຫຍາຍຕົວໄປໜ້າຢ່າງຕໍ່ເນື່ອງ, ຮ່ວມກັນຕ້ອນຮັບການລະລຶກການພົວພັນຈີນຍີ່ປຸ່ນຫັນເປັນປົກກະຕິຄົບຮອບ40ປີໃນປີໜ້າ.
ທ່ານໂນດາ ໂຢຊີຮີໂກະກ່າວວ່າ, ສອງປະເທດຍີ່ປຸ່ນຈີນເປັນປະເທດໃກ້ຄຽງທີ່ມີດິນແດນຕິດຈອດກັນ, ການພົວພັນດ້ານເສດຖະກິດນັບມື້ນັບໃກ້ຊິດກວ່າເກົ່າ. ການພັດທະນາຂອງຈີນເປັນໂອກາດອັນສຳຄັນ, ການພົວພັນຍີ່ປຸ່ນຈີນມີຄວາມສຳຄັນຫຼາຍຕໍ່ສອງປະເທດຍີ່ປຸ່ນຈີນກໍ່ຄືທົ່ວໂລກ. ຍີ່ປຸ່ນຍິນດີສືບຕໍ່ຮ່ວມກັບຈີນທຳຄວາມພະຍາຍາມ, ເພື່ອເພີ່ມທະວີການຮ່ວມມືແລະການແລກປ່ຽນໃນຂົງເຂດຕ່າງໆ, ຂະຫຍາຍການພົວພັນຍຸດທະສາດແບບຕ່າງຝ່າຍຕ່າງມີຜົນປະໂຫຍດຕື່ມອີກ.
