ປະທານປະເທດຈີນພົບປະກັບປະທານປະເທດຫວຽດນາມ
(GMT+08:00) 2011-11-13 12:18:14 cri
ວັນທີ12ພະຈິກນີ້, ຢູ່ໂຮໂນລູລູ, ເທດສະບານລັດຮາວາຍຂອງອາເມລິກາ, ທ່ານຫູຈິນທ່າວ, ປະທານປະເທດຈີນໄດ້ພົບປະກັບທ່ານເຈືອງເຕີນຊາງ, ປະທານປະເທດຫວຽດນາມ, ເພື່ອລົງເລິກແລກປ່ຽນຄຳຄິດຄຳເຫັນກ່ຽວກັບການພົວພັນຈີນຫວຽດນາມແລະບັນຫາທີ່ສົນໃຈຮ່ວມກັນ, ແລະໄດ້ຕົກລົງຄວາມເຫັນເປັນເອກະພາບກັນອັນສຳຄັນ.
ທ່ານຫູຈີນທ່າວຊີ້ອອກວ່າ, ແຕ່ການພົວພັນຈີນຫວຽດນາມຫັນເປັນປົກກະຕິເປັນເວລາ20ປີຜ່ານມາ, ຜູ້ນຳລະດັບສູງຂອງສອງປະເທດໄດ້ໄປມາຫາສູ່ກັນຢ່າງໃກ້ຊິດ, ການຮ່ວມມືດ້ານເສດຖະກິດການຄ້າໄດ້ຮັບປະສິດທິຜົນຢ່າງຫຼວງຫຼາຍ, ການແລກປ່ຽນບົດຮຽນດ້ານການສ້າງພັກແລະປົກຄອງລັດຖະບານໄດ້ຮັບການພັດທະນາຢ່າງຕໍ່ເນື່ອງ, ສອງຝາຍໄດ້ຮັກສາການປະສານສົມທົບກັນໃນວຽກງານສາກົນກໍ່ຄືພາກພື້ນ, ນຳເອົາຜົນປະໂຫຍດຕົວຈິງໃຫ້ແກ່ປະຊາຊົນສອງຊາດ.
ທ່ານຫູຈິນທ່າວໄດ້ມີຂໍ້ສະເໜີ3ຂໍ້ກ່ຽວກັບການຂະຫຍາຍການພົວພັນຈີນຫວຽດນາມ, ຄືກ່ອນອື່ນ, ຍຶດໝັ້ນເພີ່ມທະວີການແລກປ່ຽນດ້ານຍຸດທະສາດຕື່ມອີກ, ເພີ່ມຄວາມໄວ້ເນື້ອເຊື່ອໃຈທາງການເມືອງ, ທີ2, ຍຶດໝັ້ນເພີ່ມທະວີການຮ່ວມມືທີ່ມີການປະຕິບັດຕົວຈິງ, ຕ່າງຝ່າຍຕ່າງໄດ້ຮັບຜົນປະໂຫຍດ; ສຸດທ້າຍ, ຍຶດໝັ້ນເປີດກວ້າງການແລກປ່ຽນດ້ານວັດທະນະທຳ, ສ້າງພື້ນຖານອັນແໜ້ນໜາແຫ່ງຄວາມໄມຕີຈິດມິດຕະພາບລະຫວ່າງປະຊາຊົນສອງຊາດ.
ທ່ານເຈືອງເຕີນຊາງໄດ້ຕາງໜ້າພັກແລະລັດຖະບານຫວຽດນາມສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫຼວງຂອງຈີນໃນການພັດທະນາເສດຖະກິດສັງຄົມ, ເຊື່ອໝັ້ນວ່າພາຍໃຕ້ການນຳພາຂອງພັກຄອມມູນິດຈີນ, ພາລະກິດສ້າງສາສັງຄົມນິຍົມທີ່ມີສີສັນພິເສດຂອງຈີນຈະໄດ້ຮັບຜົນສຳເລັດອັນໃຫຍ່ຫຼວງກວ່າເກົ່າ.
