ຈີນກ່າວວ່າເຂດການຄ້າເສລີຈີນ-ອາຊຽນແມ່ນສອດຄ່ອງກັບຜົນປະໂຫຍດຮ່ວມຂອງສອງຝ່າຍ
(GMT+08:00) 2011-11-13 14:18:48 cri
ວັນທີ11ພະຈິກນີ້,ທ່ານເສິນເຕີມິງ ລັດຖະມົນຕີວ່າການກະຊວງການຄ້າຈີນທີ່ເຂົ້າຮ່ວມກອງປະຊຸມລະດັບລັດຖະມົນຕີຂອງອົງການເອເປັກທີ່ຈັດຂຶ້ນຢູ່ລັດ ຮາວາຍຂອງອາເມລິກາໄດ້ພົບປະກັບທ່ານກິຕາເວີຈາວັນ ລັດຖະມົນຕີວ່າການກະຊວງການຄ້າອິນໂດເນເຊຍແລະທ່ານກິດຕິຣັດ ນະຣະນອງ ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງການຄ້າໄທຕາມລຳດັບ.ທ່ານເສິນເຕີມິງກ່າວວ່າພາຍໃຕ້ຂອບເຂດການຄ້າເສລີຈີນ-ອາຊຽນ,ການຮ່ວມມືທາງດ້ານເສດຖະກິດການຄ້າລະຫວ່າງຈີນກັບບັນດາປະເທດອາຊຽນນັບມື້ນັບເປີດກວ້າງອອກແລະແໜ້ນແຟ້ນກວ່າເກົ່າ,ການກໍ່ສ້າງເຂດການຄ້າເສລີຈີນ-ອາຊຽນແມ່ນສອດຄ່ອງກັບຜົນປະໂຫຍດຮ່ວມຂອງສອງຝ່າຍ,ໄດ້ນຳເອົາຜົນປະໂຫຍດໃຫ້ແກ່ປະເທດຕ່າງໆ.
ທ່ານກິຕາເວີຈາວັນລັດຖະມົນຕີວ່າການກະຊວງການຄ້າອິນໂດເນເຊຍກ່າວວ່າ,ເຂດການຄ້າເສລີຈີນ-ອາຊຽນໄດ້ນຳເອົາຜົນປະໂຫຍດມາໃຫ້ອິນໂດເນເຊຍ, ຍິນດີຕ້ອນຮັບນັກທຸລະກິດຈີນໄປລົງທຶນຢູ່ອິນໂດເນເຊຍ,ນີ້ຈະມີຜົນດີຕໍ່ການບັນລຸເປົ້າໝາຍການຄ້າດັ່ງກ່າວ.
ທ່ານກິດຕິຣັດ ນະຣະນອງ ຮອງນາຍົກລັດຖະມົນຕີທັງເປັນລັດຖະມົນຕີ ວ່າການກະຊວງການຄ້າໄທສະແດງຄວາມຂອບອົກຂອບໃຈຕໍ່ລັດຖະບານແລະປະຊາຊົນຈີນທີ່ໄດ້ໃຫ້ການຊ່ວຍເຫຼືອຢ່າງຈິງໃຈແກ່ໄທໃນການຕ້ານໄພນ້ຳຖ້ວມ.ທ່ານກ່າວວ່າ,ໄທເອົາໃຈໃສ່ທີ່ສຸດຕໍ່ການກໍ່ສ້າງເຂດການຄ້າເສລີຈີນ-ອາຊຽນ,ວິສາຫະກິດຈີນມີບົດຮຽນຫຼວງຫຼາຍໃນດ້ານການກໍ່ສ້າງທາງລົດໄຟ,ທາງຫຼວງແລະຂົວ,ໄທຍິນດີ ຕ້ອນຮັບວິສາຫະກິດຈີນໄປລົງທຶນແລະກໍ່ສ້າງໂຄງການເຫຼົ່ານີ້ຢູ່ປະເທດໄທ.
