ທ່ານໂອບາມາກ່າວວ່າ,ພາກພື້ນອາຊີປາຊີຟິກມີບົດບາດສຳຄັນທີ່ສຸດຕໍ່ການຟື້ນຕົວທາງດ້ານເສດຖະກິດຂອງອາເມລິກາ
(GMT+08:00) 2011-11-13 14:22:05 cri
ທ່ານບາຣັກ ໂອບາມາ ປະທານາທິບໍດີອາເມລິກາກ່າວໃນວັນທີ12ພະຈິກນີ້ວ່າ,ພາກພື້ນອາຊີປາຊີຟິກມີບົດບາດສຳຄັນທີ່ສຸດຕໍ່ການຟື້ນຕົວທາງດ້ານເສດຖະກິດແລະການສ້າງວຽກເຮັດງານທຳຂອງອາເມລິກາ,ອາເມລິກາຈະຮ່ວມມືກັບອົງການເສດຖະກິດໃນພາກພື້ນອາຊີປາຊີຟິກໃນດ້ານຕ່າງໆເຊັ່ນເສດຖະກິດ,ການຄ້າ,ການປ້ອງກັນຄວາມປອດໄພແລະອື່ນໆ.
ທ່ານໂອບາມາກ່າວໃນກອງປະຊຸມສຸດຍອດອຸດສາຫະກຳການຄ້າຂອງອົງການເອເປັກໃນມື້ດຽວກັນວ່າ,ເນື່ອງຈາກວ່າເຂດໃຊ້ເງິນເອີໂຣພວມປະເຊີນກັບຄວາມຫຍຸ້ງຍາກໃນປະຈຸບັນ,ເສດຖະກິດຂອງພາກພື້ນເອີລົບຈະບໍ່ມີການເຕີບໂຕຢ່າງແຂງແຮງພາຍໃນໄລຍະອັນສັ້ນໆແລະຈະສົ່ງຜົນກະທົບຕໍ່ເສດຖະກິດໂລກ,ພາຍໃຕ້ສະພາບແນວນີ້,ພາກພື້ນອາຊີປາຊີຟິກທີ່ຍອດປະລິມານເສດຖະກິດແລະຍອດປະລິມານການຄ້າກວມປະມານເຄິ່ງໜຶ່ງຂອງໂລກຈະມີຄວາມສຳຄັນຫຼາຍຕໍ່ການຟື້ນຕົວທາງດ້ານເສດຖະກິດຂອງອາເມລິກາ.
ທ່ານໂອບາມາກ່າວວ່າ,ອາເມລິກາຫວັງຢາກດຳເນີນການຮ່ວມມືຈາກຫຼາຍດ້ານກັບຄູ່ຮ່ວມມືໃນພາກພື້ນອາຊີປາຊີຟິກ,ເພື່ອຮັບປະກັນການປະກອບອາຊີບ,ການເຕີບໂຕທາງດ້ານເສດຖະກິດ,ຄວາມຈະເລີນຮຸ່ງເຮືອງແລະຄວາມໝັ້ນຄົງຂອງພາກພື້ນປາຊີຟິກ.
