ຕາມຂ່າວສານອານຊີຂອງອີຕາລີລາຍງານວ່າ:ວັນທີ13 ພະຈິກນີ້,ທ່ານນາໂປໂພລີທາໂນ,ປະທານາທິບໍດີອີຕາລີໄດ້ແຕ່ງຕັ້ງທ່ານມາລີໂອ ມອນທີ ເປັນນາຍົກລັດ ຖະມົນຕີຜູ່ໃຫມ່,ເພື່ອຮັບຜິດຊອບການຈັດຕັ້ງລັດຖະບານຊົ່ວຄາວ.
ວັນທີ13 ພະຈິກນີ້,ທ່ານນາໂປລີ ທາໂນພ້ອມດ້ວຍບັນດາຜູ່ນຳຂອງພັກການເມືອງສຳຄັນຕ່າງໆໃນອີຕາລີໄດ້ຈັດກອງປະຊຸມປຶກສາຫາລືຫຼາຍຄັ້ງ,ພັກເສລີປະຊາຊົນທີ່ເປັນພັກໃຫຍ່ທີ່ສຸດໃນສະພາອີຕາລີແລະພັກປະຊາທິປະໄຕທີ່ເປັນພັກ ຝ່າຍຄ້ານໃຫຍ່ທີ່ສຸດຂອງອີຕາລີລ້ວນແຕ່ສະແດງຄວາມສະຫນັບສະຫນູນໃຫ້ທ່ານມອນທີຈັດຕັ້ງລັດຖະບານຊຸດໃຫມ່.
ໃນກອງປະຊຸມຂ່າວທີ່ຈັດຂຶ້ນຫຼັງກອງປະຊຸມ,ທ່ານມອນທີກ່າວວ່າ,ອີຕາລີມີແຕ່ສາມັກຄີກັນເປັນອັນຫນຶ່ງອັນດຽວກັນເທົ່ານັ້ນ,ຈຶ່ງຈະສາມາດເອົາຊະນະວິກິດການໃນປະຈຸບັນນີ້,ອີຕາລີທັງແມ່ນຫນຶ່ງໃນບັນຫາປະເທດທີ່ລິເລີ່ມສ້າງຕັ້ງສະຫະພາບເອີລົບຫຼື EU,ທັງແມ່ນປະເທດສະມາຊິກສຳຄັນຂອງສະຫະພາບເອີລົບ,ດ້ວຍເຫດນີ້,ອີຕາລີຄວນກາຍເປັນກຳລັງທີ່ກະຕຸ້ນການເຕີບໂຕຂອງ EU,ແຕ່ບໍ່ແມ່ນປະເທດອ່ອນແອຂອງ EU.
ທ່ານມາລີໂອ ມອນທີເກີດໃນປີ1943,ນັບແຕ່ປີ 1995 ຫາປີ 2004,ທ່ານໄດ້ດຳລົງຕຳແຫນ່ງເປັນກຳມະການທີ່ຮັບຜິດຊອບວຽກງານຕະຫຼາດແລະການແຂ່ງ ຂັນພາຍໃນຂອງສະຫະພາບເອີລົບ. ນັບແຕ່ປີ 2005ຮອດປະຈຸບັນນີ້,ທ່ານໄດ້ດຳລົງຕຳແຫນ່ງເປັນອະທິການບໍດີຂອງວິທະຍາໄລການຄ້າໂບໂຄນີມິລານທີ່ມີຊື່ສຽງທີ່ສຸດຢູ່ອີຕາລີ.
