ປະມຸກລັດຂອງຈີນແລະອາເມລິກາກ່າວວ່າ ຈະພ້ອມກັນພະຍາຍາມຊຸກຍູ້ການພົວພັນຄູ່ຮ່ວມມືລະຫວ່າງສອງຝ່າຍຢ່າງບໍ່ຢຸດຢັ້ງ
(GMT+08:00) 2011-11-14 15:54:38 cri
ວັນທີ12ພະຈິກນີ້, ທ່ານຫູຈິນທ່າວ,ປະທານປະເທດຈີນທີ່ເຂົ້າຮ່ວມກອງປະຊຸມສຸດຍອດບໍ່ເປັນທາງການຂອງອົງການຮ່ວມມືດ້ານເສດຖະກິດອາຊີປາຊີຟິກຫຼືAPECຄັ້ງທີ19ຢູ່ລັດຮາວາຍຂອງອາເມລິກາໄດ້ພົບປະກັບທ່ານບາຣັກ ໂອບາມາ, ປະທານາທິບໍດີອາເມລິກາຢູ່ໂຮໂນລູໆ. ປະມຸກລັດທັງສອງປະເທດກ່າວວ່າ,ຈະພ້ອມກັນ ພະຍາຍາມ,ຊຸກຍູ້ການພົວພັນຄູ່ຮ່ວມມືລະຫວ່າງຈີນອາເມລິກາໃຫ້ ຂະຫຍາຍໄປໜ້າຢ່າງບໍ່ຢຸດຢັ້ງ.ທ່ານຫູຈິນທ່າວກ່າວວ່າ:
"ດີໃຈຫຼາຍທີ່ໄດ້ມາເຂົ້າຮ່ວມກອງປະຊຸມAPECຢູ່ລັດຮາວາຍທີ່ສວຍງາມ,ແລະມີໂອກາດພົບປະກັບທ່ານປະທານາທິບໍດີ. ປະຈຸບັນ,ສະຖານະການສາກົນໄດ້ມີການຜັນແປໄປຢ່າງສັບສົນແລະເລິກເຊິ່ງ,ຈີນຄອງຄອຍຮັກສາແລະເພີ່ມທະວີການສົນທະນາແລະການຮ່ວມມືກັບອາເມລິກາ,ເຄົາລົບຄວາມສົນໃຈຂອງສອງຝ່າຍເຊິ່ງກັນແລະກັນ,ແກ້ໄຂບັນຫາທີ່ອ່ອນໄຫວຢ່າງເໝາະສົມ,ຊຸກຍູ້ໃຫ້ການພົວພັນລະຫວ່າງຈີນອາເມລິກາພັດທະນາຢ່າງຍືນຍົງແລະໝັ້ນທ່ຽງ."
ທ່ານຫູຈິນທ່າວໄດ້ສະເໜີຄວາມເຫັນ3ຂໍ້ກ່ຽວກັບການຮ່ວມມືລະຫວ່າງຈີນອາເມລິກາ,ກ່າວເນັ້ນວ່າຈີນ-ອາເມລິກາຄວນເປັນຄູ່ຮ່ວມມືທີ່ເຄົາລົບແລະໄວ້ເນື້ອເຊື່ອໃຈເຊິ່ງກັນແລະກັນ,ຕ່າງຝ່າຍຕ່າງໄດ້ຮັບຜົນປະໂຫຍດ,ຮ່ວມແຮງຮ່ວມໃຈກັນ. ສອງປະເທດຄວນເພີ່ມທະວີການໄປມາຫາສູ່ກັນໃນລະດັບສູງແລະການສົນທະນາການປຶກສາຫາລືກັນໃນລະດັບຕ່າງໆແລະຂົງເຂດຕ່າງໆ,ວິນິດໄສເຈດຈຳນົງທາງຍຸດທະສາດແລະທິດທາງນະໂຍບາຍຂອງສອງຝ່າຍຢ່າງຍຸດຕິທຳແລະສົມເຫດສົມຜົນ, ເພີ່ມຄວາມໄວ້ເນື້ອເຊື່ອໃຈກັນທາງຍຸດທະສາດຢ່າງຍາວນານ,ພ້ອມກັນນັ້ນດຳເນີນການໄປມາຫາສູ່ກັນລະຫວ່າງປະຊາຊົນຂອງສອງປະເທດຢ່າງຕັ້ງໜ້າ. ເຄົາລົບຜົນປະໂຫຍດໃຈກາງຂອງສອງປະເທດແມ່ນຂໍ້ກະແຈໃນການສ້າງການພົວພັນຄູ່ຮ່ວມມືລະຫວ່າງຈີນອາເມລິກາ.
ທ່ານຫູຈິນທ່າວຍັງໄດ້ກ່າວເຖິງນະໂຍບາຍອັດຕາແລກປ່ຽນເງິນຕາຂອງຈີນແລະອື່ນໆ. ທ່ານກ່າວວ່າ, ນະໂຍບາຍອັດຕາແລກປ່ຽນເງິນຕາຂອງຈີນແມ່ນມີຄວາມຮັບຜິດຊອບ. ເປົ້າໝາຍແມ່ນສ້າງລະບົບອັດຕາແລກປ່ຽນເງິນຕາລອຍຕົວທີ່ມີການປັບແລະມີການຄຸ້ມຄອງທີ່ຖືການສະໜອງແລະຄວາມຕ້ອງການຂອງຕະຫຼາດເປັນພື້ນຖານ,ແລະພິຈາລະນາເຖິງເງິນຕາເສລີຈຳນວນທັງໝົດ. ການປະຕິຮູບກົນໄກຈໍ່ຕົວເປັນອັດຕາແລກປ່ຽນເງິນຢວນຈີນຈະສືບຕໍ່ໄດ້ຮັບການຊຸກຍູ້ໄປໜ້າຢ່າງໝັ້ນທ່ຽງ.
ໃນການເຈລະຈາໃນມື້ດຽວກັນ,ທ່ານໂອບາມາກ່າວເນັ້ນເປັນພິເສດເຖິງຄວາມໝາຍທີ່ສຳຄັນໃນການເພີ່ມທະວີການຮ່ວມມືລະຫວ່າງອາເມລິກາກັບຈີນ.ທ່ານກ່າວວ່າ:
"ນີ້ແມ່ນການເຈລະຈາທີ່ກວ້າງຂວາງຫຼາຍເທື່ອໜຶ່ງຫຼັງຈາກທ່ານປະທານປະເທດຫູຈິນທ່າວ, ຢ້ຽມຢາມວໍຊິງຕັນທາງລັດຖະກິດຢ່າງສຳເລັດຜົນແລ້ວ.ໃນຖານະເປັນ2ປະເທດແລະອົງກອນເສດຖະກິດທີ່ໃຫຍ່ທີ່ສຸດໃນໂລກ,ການຮ່ວມມືລະຫວ່າງຈີນກັບອາເມລິກາບໍ່ພຽງແຕ່ມີຄວາມສຳຄັນທີ່ສຸດຕໍ່ຄວາມປອດໄພແລະຄວາມຈະເລີນຮຸ່ງເຮືອງຂອງປະຊາຊົນສອງຊາດເທົ່ານັ້ນ,ຫາກຍັງມີຄວາມໝາຍສຳຄັນທີ່ສຸດຕໍ່ທົ່ວໂລກອີກດ້ວຍ."
ທ່ານໂອບາມາກ່າວວ່າ,ອາເມລິກາຍິນດີໃຫ້ຈີນເປັນປະເທດທີ່ເຂັ້ມແຂງ,ມີຜົນສຳເລັດ,ຈະເລີນຮຸ່ງເຮືອງແລະມີສະຖຽນລະພາບເສີມຂະຫຍາຍບົດບາດຫຼາຍກວ່າເກົ່າໃນວຽກງານສາກົນ,ອາເມລິກາເຄົາລົບຜົນປະໂຫຍດທີ່ຊອບທຳຂອງຈີນຢູ່ພາກພື້ນອາຊີປີຊີຟິກ. ໃນເວລາກ່າວເຖິງບັນຫາໄຕ້ຫວັນ,ທ່ານໂອບາມາກ່າວວ່າ,ອາເມລິກາຈະສືບຕໍ່ປະຕິບັດນະໂຍບາຍຈີນດຽວໂດຍບົນພື້ນຖານແຈ້ງການຮ່ວມລະຫວ່າງຈີນກັບອາເມລິກາ3ສະບັບ,ບໍ່ສະໜັບສະໜູນ "ໄຕ້ຫວັນເປັນເອກະລາດ."
