ວັນທີ13ພະຈິກນີ້, ກອງປະຊຸມສຸດຍອດບໍ່ເປັນທາງການຂອງອົງການຮ່ວມມືດ້ານເສດຖະກິດອາຊີປາຊີຟິກຫລືAPECຄັ້ງທີ19ໄດ້ອອກ "ຖະແຫລງການໂຮໂນລູລູ—ກ້າວໄປສູ່ເສດຖະກິດພາກພື້ນທີ່ມີການຕິດຕໍ່ພົວພັນອັນສະໜິດແໜ້ນ", ພ້ອມທັງໃຫ້ຄໍາໝັ້ນສັນຍາວ່າຈະນໍາໃຊ້ມາດຕະການທີ່ມີການກະທໍາຕົວຈິງ,ເພື່ອຊຸກຍູ້ການພັດທະນາຂອງເສດຖະກິດພາກພື້ນທີ່ມີການຕິດຕໍ່ພົວພັນອັນແໜ້ນແຟ້ນ, ເຮັດໃຫ້ປະເທດສະມາຊິກຕ່າງໆໄດ້ຮັບຜົນປະໂຫຍດຮ່ວມກັນ.
ຖະແຫລງການຂຽນວ່າ, ພາຍຫລັງເສດຖະກິດໂລກຊຸດໂຊມລົງແຕ່ປີ2008ຫາປີ2009, ການຊຸກຍູ້ການຄ້າຫັນເປັນແບບເສລີມີຄວາມສໍາຄັນຫລາຍຕໍ່ການ ຟື້ນຟູເສດຖະກິດໂລກຢ່າງຕໍ່ເນື່ອງ. ໜ້າທີ່ອັນສໍາຄັນທີ່ສຸດຂອງAPECຍັງຈະແມ່ນຊຸກຍູ້ໃຫ້ເສດຖະກິດເຊື່ອມໂຍງເຂົ້າກັນແລະເປີດກວ້າງການຄ້າ.
ໃນຖະແຫລງການ, ປະເທດສະມາຊິກAPECໄດ້ກ່າວຢໍ້າວ່າຄັດຄ້ານລັດທິປົກປ້ອງການຄ້າ, ແລະຮຽກຮ້ອງໃຫ້ຜູ້ເຂົ້າຮ່ວມກອງປະຊຸມລະດັບລັດຖະມົນຕີຂອງອົງການການຄ້າໂລກຄັ້ງທີ8ທີ່ຈະຈັດຂຶ້ນໃນເດືອນທັນວາໜ້ານີ້, ໃຫ້ມີຄວາມເຫັນເປັນເອກະສັນກັນກ່ຽວກັບການຄັດຄ້ານລັດທິປົກປ້ອງການຄ້າ, ບົນພື້ນຖານຄໍາໝັ້ນສັນຍາຂອງປະເທດສະມາຊິກAPEC.
ຖະແຫລງການຍັງຂຽນວ່າ, ສະມາຊິກAPECຈະສຸມກໍາລັງເຂົ້າໃນການຊຸກຍູ້ການບັນລຸເປົ້າໝາຍຮ່ວມທີ່ເສດຖະກິດເຕີບໂຕແບບອະນຸລັກສິ່ງແວດລ້ອມ, ເລັ່ງລັດຂະບວນການເສດຖະກິດທີ່ລະບາຍກາກບອນດີອອກສິດຕໍ່າ,ໂດຍຜ່ານວິທີຕ່າງໆເຊັ່ນ,ການເພີ່ມທະວີຄວາມໝັ້ນຄົງດ້ານພະລັງງານ, ຊຸກຍູ້ການເຕີບໂຕຂອງເສດຖະກິດໃໝ່, ເພີ່ມທະວີການປະກອບອາຊີບແລະອື່ນໆ, ເພື່ອຮັບມືກັບສິ່ງທ້າທາຍດ້ານເສດຖະກິດແລະສິ່ງແວດລ້ອມທີ່ພາກພື້ນອາຊີປາຊີຟິກພວມປະເຊີນໜ້າໃນປະຈຸບັນ.
