ລັດຖະມົນຕີການຄ້າຈີນຮຽກຮ້ອງໃຫ້ຝ່າຍຕ່າງໆຈົ່ງປົກປ້ອງໝາກຜົນແຫ່ງການເຈລະຈາຮອບໂດຮາ
(GMT+08:00) 2011-11-14 10:28:01 cri
ວັນທີ11ພະຈິກນີ້, ທ່ານເສິນເຕີໝິງ ລັດຖະມົນຕີວ່າການກະຊວງການຄ້າຈີນຮຽກຮ້ອງໃຫ້ສະມາຊິກອົງການການຄ້າໂລກ ຈົ່ງເບິ່ງກວ້າງມອງໄກ, ຜ່ອນສັ້ນຜ່ອນຍາວໃຫ້ກັນ, ຮ່ວມກັນຊຸກຍູ້ໃຫ້ການເຈລະຈາຮອບໂດຮາມີຄວາມຄືບໜ້າ, ເພື່ອຕໍ່ຕ້ານແລະຍົກເລີກລັດທິປົກປ້ອງການຄ້າທຸກຮູບແບບດ້ວຍການກະທຳຕົວຈິງ, ລະວັງໃຊ້ແລະບໍ່ໃຫ້ມີການນຳໃຊ້ມາດຕະການກອບກູ້ທາງເສດຖະກິດໄປໃນທາງທີ່ບໍ່ຖືກຕ້ອງ, ປ້ອງກັນບໍ່ໃຫ້ບັນຫາເສດຖະກິດການຄ້າກາຍເປັນບັນຫາການເມືອງ.
ວັນທີ11ພະຈິກນີ້, ໃນເວລາທ່ານເສິນເຕີໝິງ ປະກອບຄຳຄິດຄຳເຫັນໃນກອງປະຊຸມລະດັບລັດຖະມົນຕີຄັ້ງທີ23ຂອງອົງການເອເປັກທີ່ຈັດຂຶ້ນຢູ່ເມືອງໂຮໂນລູລູ ລັດຮາວາຍອາເມລິກາ, ທ່ານກ່າວວ່າ, ສະໜັບສະໜູນລະບຽບການການຄ້າຫຼາຍຝ່າຍ, ຕໍ່ຕ້ານລັດທິປົກປ້ອງການຄ້າ, ແມ່ນມູນເຊື້ອຂອງອົງການເອເປັກ. ການເຈລະຈາຮອບໂດຮາໄດ້ດຳເນີນມາເປັນ10ປີແລ້ວ, ອົງການເອເປັກໄດ້ມີຄວາມພະຍາຍາມມາເປັນເວລາ10ປີເພື່ອການເຈລະຈາ. ການເຈລະຈາຮອບໂດຮາຄວນຍຶດໝັ້ນວັດຖຸປະສົງຂອງຮອບໂດຮາ, ບໍ່ໄກຈາກເປົ້າໝາຍພັດທະນາ; ຕ້ອງເຄົາລົບການມອບສິດດ້ານການພັດທະນາຮອບໂດຮາຢ່າງສະເໝີຕົ້ນສະເໝີປາຍ, ບໍ່ປ່ອຍປະໝາກຜົນຂອງການເຈລະຈາໃນ10ປີທີ່ຜ່ານມາ; ບົນພື້ນຖານຂອງໝາກຜົນທີ່ມີຢູ່ໃນປະຈຸບັນ, ຕ່າງຝ່າຍຕ່າງເຂົ້າໃຈກັນແລະຫຼຸດຜ່ອນຄວາມເຫັນທີ່ຂັດແຍ່ງກັນ, ຈົນວ່າສາມາດເຊັນສັນຍາໃນທີ່ສຸດ.
ທ່ານເສິນເຕີໝິງກ່າວເຕືອນວ່າ, ຖ້າວ່າໃຊ້ລັດທິປົກປ້ອງການຄ້າໄປໃນທາງທີ່ບໍ່ຖືກຕ້ອງ, ຈະເຮັດໃຫ້ການຮ່ວມມືທາງເສດຖະກິດຂອງພາກພື້ນອາຊີປາຊີຟິກປະສົບຄວາມຫຍຸ້ງຍາກ, ທັງເຮັດໃຫ້ເສດຖະກິດໂລກຊຸດໂຊມລົງຕື່ມອີກ.
