ຈີນແລະອາຊຽນເອົາໃຈໃສ່ການສ້າງສີຂຽວໃນຕົວເມືອງ
(GMT+08:00) 2011-11-14 18:59:55 cri
ໃນກອງປະຊຸມເວທີປຶກສາຫາລືກ່ຽວກັບການສ້າງສີຂຽວໃນຕົວເມືອງຂອງຈີນ-ອາຊຽນທີ່ຈັດຂຶ້ນຢູ່ເມືອງນານນີງຂອງຈີນໃນຫວ່າງບໍ່ດົນມານີ້,ເຈົ້າໜ້າທີ່ພາກສ່ວນຄຸ້ມຄອງປ່າໄມ້ພ້ອມດ້ວຍຜູ່ຊ່ຽວຊານທີ່ມາຈາກຈີນແລະບັນດາປະເທດອາຊຽນໄດ້ດຳເນີນການປຶກສາຫາລືກ່ຽວກັບບັນຫາອະນຸລັກປ່າສີຂຽວໃນຕົວເມືອງພາຍໃຕ້ຄວາມກົດດັນທີ່ມາຈາກການພັດທະນາເສດຖະກິດແລະການເພີ່ມຂຶ້ນຂອງພົນລະເມືອງ,ຮ່ວມກັນຊຸກຍູ້ການສ້າງສີຂຽວໃນຕົວເມືອງ,ສ້າງຕົວເມືອງໃຫ້ມີການລະບາຍກາກບອນດີອອກຊິດໜ້ອຍ,ແລະສ້າງຕົວເມືອງໃຫ້ມີສິ່ງແວດລ້ອມທີ່ດີໃນການດຳລົງຊີວິດຂອງຄົນ.
ປະຈຸບັນນີ້,ການສ້າງສີຂຽວໃນຕົວເມືອງໄດ້ກາຍເປັນຈຸດສຸມອັນໃໝ່ແຫ່ງການຮ່ວມມືລະ ຫວ່າງຈີນກັບອາຊຽນ."ຖະແຫຼງການນານນີງ"ທີ່ຜ່ານການຮັບຮອງໃນກອງປະຊຸມເທື່ອນີ້ຮຽກຮ້ອງໃຫ້ເອົາໃຈໃສ່ການເພີ່ມສີຂຽວໃນຕົວເມືອງໃນລະດັບສູງ,ແລະຈັດເອົາວຽກງານສ້າງປ່າສີຂຽວໃນຕົວເມືອງເຂົ້າໃນເນື້ອໃນສຳ ຄັນແຫ່ງການພັດທະນາຕົວເມືອງ.
ເປົ້າໝາຍອະນາຄົດໃນປີ2020ຂອງອາຊຽນແມ່ນສ້າງໃຫ້ອາຊຽນເປັນສີຂຽວແລະສະອາດ.ເຈົ້າໜ້າທີ່ຂອງໄທທີ່ເຂົ້າກອງປະຊຸມສະເໜີວ່າ,ຈີນແລະອາຊຽນຄວນເພີ່ມທະວີການແລກປ່ຽນດ້ານການອະນຸລັກສິ່ງແວດລ້ອມ,ຄົ້ນຄວ້າພັດທະນາເວທີການຮ່ວມມືທາງອິນເຕີເນັດ,ພັດທະນາຕົວເມືອງທີ່ມີຊີວະພາບແບບຍືນຍົງແລະມີສິ່ງແວດລ້ອມທີ່ດີໃນການດຳ ລົງຊີວິດຂອງຄົນ.
ຫົວໜ້າກົມປ່າໄມ້,ກະຊວງກະສິກຳປ່າໄມ້ແລະການປະມົງຂອງກຳປູເຈຍທີ່ມາເຂົ້າຮ່ວມກອງປະຊຸມຊີ້ອອກວ່າ,ບັນດາປະເທດຄວນຮ່ວມມືກັນເພື່ອຫຼຸດຜົນກະທົບທີ່ມີຕໍ່ດິນຟ້າອາກາດຍ້ອນການພັດທະນາຕົວເມືອງ.ທ່ານສະເໜີໃຫ້ຈີນແລະບັນດາປະເທດອາຊຽນ ປະສານສົມທົບໃນການນຳໃຊ້ຊັບພະຍາກອນ,ໂດຍສະເພາະໃນດ້ານການນຳໃຊ້ເຊື້ອໄຟຊີວະພາບ,ສອງຝ່າຍມີຊ່ອງທາງໃນການຮ່ວມມືຢ່າງກວ້າງຂວາງ.
ທ່ານສີລາວັນ,ຫົວໜ້າກົມປ່າໄມ້,ກະຊວງກະສິກຳແລະປ່າໄມ້ຂອງລາວກ່າວວ່າ, ລາວໄດ້ດຶງດູດການລົງທຶນນັບມື້ນັບຫຼາຍ,ແຕ່ວຽກງານອະນຸລັກເດີ່ນຫຍ້າແລະສວນສາທາລະນະ ໃນຕົວເມືອງພັດນັບມື້ນັບຫຍຸ້ງຍາກ.ດ້ວຍເຫດນີ້,ນະຄອນຫຼວງວຽງຈັນຂອງລາວໄດ້ເພີ່ມທະວີການປູກຫຍ້າແລະສ້າງສວນສາທາລະນະເພີ່ມເນື້ອທີ່ສີຂຽວໃຫ້ຫຼາຍຂຶ້ນ,ພະຍາຍາມເຮັດໃຫ້ເນື້ອທີ່ຕົວເມືອງ70%ປົກຫຸ້ມດ້ວຍສີຂຽວໃນປີ2020.
ຜູ່ຊ່ຽວຊານຈາກຟິລິບປິນສະເໜີວ່າ,ການກຳນົດນະໂຍບາຍເພື່ອສົ່ງເສີມໃຫ້ວິສາຫະກິດເອກະຊົນລົງທຶນເຂົ້າໃນການປູກຫຍ້າສ້າງປ່າສີຂຽວ,ວາງລະບຽບການດ້ວຍການໃຫ້ລາງວັນແລະປັບໄໝ,ແບ່ງປັນເນື້ອທີ່ດິນຕາມຈຸດປະສົງການນຳໃຊ້,ຖອດຖອນບົດຮຽນຈາກສິງກະໂປແລະປະເທດໄທໃນການສ້າງທັດສະນີຍະພາບທີ່ມີສີຂຽວໃຫ້ກາຍເປັນສີສັນຕົວເມືອງ.
ທ່ານຈ້າວຊູ້ຊົງ,ຮອງຫົວໜ້າກົມປ່າໄມ້ແຫ່ງຊາດຈີນກ່າວວ່າ,ຈີນຍິນດີຕັ້ງໜ້າຖອດຖອນບົດຮຽນທີ່ສຳເລັດຜົນຂອງບັນດາປະເທດໃນໂລກ,ເຊິ່ງລວມທັງປະເທດຕ່າງໆອາຊຽນ,ຊຸກຍູ້ວຽກງານໃນການສ້າງສີຂຽວໃນຕົວເມືອງຕື່ມອີກ.ຈີນຍິນດີເພີ່ມທະວີການຮ່ວມມືກັບບັນດາປະເທດອາຊຽນ,ຮ່ວມກັນຊຸກຍູ້ການສ້າງສີຂຽວໃນຕົວເມືອງ,ສ້າງປ່າສີຂຽວທີ່ກວ້າງຂວາງແລະສວຍງາມກວ່າເກົ່າໃຫ້ແກ່ມວນມະນຸດ,ເຮັດໃຫ້ປ່າໄມ້ສາມາດເສີມຂະຫຍາຍບົດບາດທີ່ດີຕໍ່ມວນມະນຸດໄດ້ຕະຫຼອດ.
