ທ່ານໂອບາມາກ່າວວ່າ,ກອງປະຊຸມສຸດຍອດບໍ່ເປັນທາງການຂອງອົງການອາເປັກໄດ້ຮັບໝາກຜົນຫຼາຍດ້ານ
(GMT+08:00) 2011-11-14 19:34:03 cri
ວັນທີ13ພະຈິກນີ້,ຢູ່ໂຮໂນລູລູ,ເທດສະບານລັດຮາວາຍຂອງອາເມລິກາ,ທ່ານບາຣັກ ໂອ ບາມາ,ປະທານາທິບໍດີອາເມລິກາກ່າວວ່າ,ກອງປະຊຸມສຸດຍອດບໍ່ເປັນທາງການຄັ້ງທີ19ຂອງອົງການອາເປັກໄດ້ຮັບໝາກຜົນຫຼາຍດ້ານເປັນຕົ້ນແມ່ນ :ການເປີດກວ້າງການຄ້າ,ການຊຸກຍູ້ການເຕີບໂຕຢ່າງບໍ່ມີມົນລະພິດແລະການຮ່ວມມືທາງດ້ານລະບຽບການດັ່ງນີ້ເປັນຕົ້ນ.
ກອງປະຊຸມຂ່າວທີ່ຈັດຂຶ້ນໃນມື້ດຽວກັນພາຍຫຼັງກອງປະຊຸມບໍ່ເປັນທາງການຄັ້ງນີ້ອັດລົງແລ້ວ,ທ່ານໂອບາມາກ່າວວ່າ,ຜູ່ນຳຂອງບັນດາປະເທດສະມາຊິກອົງການອາເປັກໄດ້ ປິ່ນອ້ອມຫົວຂໍ້ຫຼັກທີ່ວ່າ"ເສດຖະກິດພາກພື້ນທີ່ພົວພັນກັນຢ່າງແໜ້ນແຟ້ນ"ນັ້ນ,ປຶກສາຫາລືກ່ຽວກັບຫຼາຍບັນຫາ,ເປັນຕົ້ນວ່າ:ການລົງເລິກຂະບວນການສ້າງເສດຖະກິດພາກພື້ນໃຫ້ເຊື່ອມໂຍງເຂົ້າກັນ,ການເປີດກວ້າງການຄ້າ,ການຊຸກຍູ້ການເຕີບໂຕຢ່າງບໍ່ມີມົນລະພິດແລະການເພີ່ມທະວີການຮ່ວມມືທາງດ້ານລະບຽບການ,ຍັງໄດ້ວາງມາດຕະການໃໝ່ໃນຫຼາຍດ້ານ,ຄື:ການຍົກສູງສະມັດຖະພາບໃນການນຳໃຊ້ພະລັງງານ,ແລະຍົກສູງຄວາມສະດວກໃນການທ່ອງທ່ຽວດັ່ງນີ້ເປັນຕົ້ນ.
ທ່ານໂອບາມາກ່າວເນັ້ນວ່າ,ເອີຣົບຍັງພວມປະເຊີນກັບການໂຈມຕີຈາກວິກິດການໜີ້ສິນພາກລັດ,ການເຕີບໂຕຂອງເສດຖະກິດໂລກຍັງປະເຊີນກັບການທ້າທາຍ,ຕະຫຼາດອາ ຊີປາຊິຟິກມີຄວາມໝາຍສຳຄັນຢ່າງຍິ່ງຕໍ່ອາເມລິກາເພື່ອບັນລຸເປົ້າໝາຍທີ່ໃຫ້ການຄ້າຂາອອກເພີ່ມຂຶ້ນ1ເທົ່າພາຍໃນ5ປີແລະເຮັດໃຫ້ການຟື້ນຕົວຂອງເສດຖະກິດອາເມລິກາເລັ່ງໄວຂຶ້ນ.
ທ່ານໂອບາມາກ່າວວ່າ,ອາເມລິກາຊົມເຊີຍຈີນທີ່ຈະເລີນຮຸ່ງເຮືອງແລະເຂັ້ມແຂງຂຶ້ນໂດຍສັນຕິ,ຈີນໄດ້ຮັບການພັດທະນາຫຼາຍທາງດ້ານເສດຖະກິດສອດຄ່ອງກັບຜົນປະ ໂຫຍດຂອງອາເມລິກາ,ອາເມລິກາຈີນສາມາດເພີ່ມທະວີການຮ່ວມມືໃນຫຼາຍຂົງເຂດ.
ເມື່ອກ່າວເຖິງບັນຫານິວເຄຼຍຂອງອີຣານ,ທ່ານໂອບາມາກ່າວວ່າ,ອາເມລິກາເດັດດ່ຽວຄັດຄ້ານອີຣານມີອາວຸດນິວເຄຼຍໄວ້ໃນຄອບຄອງ,ເຫັນວ່າ,ອີຣານທີ່ປອດນິວເຄຼຍສອດຄ່ອງກັບຜົນປະໂຫຍດຂອງປະຊາຄົມໂລກ.
