ຈີນຕີລາຄາຢ່າງຕັ້ງໜ້າຕໍ່ໝາກຜົນທີ່ໄດ້ຮັບຂອງກອງປະຊຸມສຸດຍອດອາເປັກ
(GMT+08:00) 2011-11-14 20:06:33 cri
ວັນທີ13ພະຈິກນີ້,ກອງປະຊຸມສຸດຍອດບໍ່ເປັນທາງການຂອງອົງການອາເປັກຄັ້ງທີ19ຈັດຂຶ້ນຢູ່ຮາວາຍຂອງອາເມລິກາ.ໃນມື້ດຽວກັນ,ທ່ານມາຈ່າວຊູ້,ໂຄສົກຄະນະຜູ່ແທນຈີນກ່າວວ່າ,ສະມາຊິກຕ່າງໆຮ່ວມກັນທຳຄວາມພະຍາຍາມ,ປຶກສາຫາລືກັນຢ່າງສະເໝີພາບ,ຊຸກຍູ້ ໃຫ້ກອງປະຊຸມຄັ້ງນີ້ໄດ້ຮັບໝາກຜົນຢ່າງດີທີ່ຕິດແທດຕົວຈິງແລະສະໝ່ຳສະເໝີກັນ,ເຊິ່ງໄດ້ສະແດງໃຫ້ເຫັນຫຼັກການຂອງອົງການອາເປັກທີ່ປຶກສາຫາລືກັນເພື່ອເປັນເອກະສັນ ກັນ.
ທ່ານມາຈ່າວຊູ້ກ່າວວ່າ,ຝ່າຍຈີນເຫັນວ່າ,ໝາກຜົນຂອງກອງປະຊຸມເທື່ອນີ້ສະແດງອອກໃນ4ດ້ານຄື:ການລົງເລິກເຮັດໃຫ້ເສດຖະກິດພາກພື້ນເຊື່ອມໂຍງເຂົ້າກັນແລະການເປີດກວ້າງການຄ້າ,ການຊຸກຍູ້ການເຕີບໂຕຢ່າງບໍ່ມີມົນລະພິດ,ຄວາມປອດໄພດ້ານພະລັງງານ,ພ້ອມດ້ວຍການຮ່ວມມືແລະເຊື່ອມຕໍ່ກັນທາງດ້ານລະບຽບການ.ເອກະສານຕ່າງໆທີ່ຜ່ານໃນກອງປະຊຸມເທື່ອນີ້ໄດ້ບັນລຸຄວາມເຫັນທີ່ເປັນເອກະສັນກັນຢ່າງຫຼວງຫຼາຍໃນດ້ານການປະດິດສ້າງນະໂຍບາຍແລະການພັດທະນາຂອງວິສາຫະກິດຂະໜາດກາງແລະນ້ອຍ,ແລະໄດ້ບັນລຸຄວາມເຫັນເປັນເອກະສັນກັນກ່ຽວກັບການໃຫ້ຄຳໝັ້ນສັນຍາຕໍ່ການຄັດຄ້ານລັດທິປົກປ້ອງການຄ້າ. "ຖະແຫຼງການຂອງຜູ່ນຳອາເປັກກ່ຽວກັບຜະລິດຕະພັນສິ່ງແວດລ້ອມພ້ອມດ້ວຍການຄ້າແລະການລົງທຶນທາງດ້ານການບໍລິການ"ທີ່ຜ່ານການຮັບຮອງໃນກອງປະຊຸມຄັ້ງນີ້,ສະແດງໃຫ້ເຫັນຄວາມຕັດສິນໃຈຂອງອົງການອາເປັກໃນດ້ານຜະລິດຕະພັນກະສິກຳແລະການຫັນການບໍລິການເປັນແບບເສລີ,ຍັງໄດ້ພິຈາລະຈາເຖິງຄວາມແຕກຕ່າງກັນລະຫວ່າງອົງກອນເສດຖະກິດຕ່າງໆ,ແມ່ນໝາກຜົນແຫ່ງການປຶກສາຫາລືຢ່າງເປັນເອກະສັນກັນຂອງສະມາຊິກຕ່າງໆ.
ທ່ານມາຈ່າວຊູ້ກ່າວວ່າ,ກອງປະຊຸມເຫັນດີຖືການຫຼຸດຄວາມແຮງດ້ານພະລັງງານທັງໝົດຂອງເຂດອົງການອາເປັກລົງ45%ໃນປີ2035ເປັນເປົ້າໝາຍ,ບໍ່ພຽງແຕ່ໄດ້ສ່ອງແສງໃຫ້ເຫັນຄວາມປາຖະໜາດ້ານການເມືອງຂອງບັນດາປະເທດສະມາຊິກທີ່ສຸມກຳລັງເຂົ້າໃນການພັດທະນາຢ່າງບໍ່ມີມົນລະພິດແລະບັນລຸການພັດທະນາແບບຍືນຍົງ,ຍັງໄດ້ເນັ້ນໜັກຄວາມແຕກຕ່າງກັນດ້ານໂຄງປະກອບເສດຖະກິດລະຫວ່າງສະມາຊິກຕ່າງໆ,ສະທ້ອນໃຫ້ເຫັນຫຼັກການທີ່ເປັນເຈົ້າຕົນເອງ,ສະໝັກໃຈ,ບໍ່ຈຳກັດແລະມີຄວາມຮັບຜິດຊອບຮ່ວມກັນແຕ່ບໍ່ຄືກັນ.
ທ່ານມາຈ່າວຊູ້ກ່າວວ່າ,ເຖິງວ່າກ່ອນກອງປະຊຸມ,ບັນດາສະມາຊິກມີຄວາມເຫັນຂັດກັນໃນບັນຫາຈຳນວນໜຶ່ງກໍ່ຕາມ,ແຕ່ຫຼາຍຝ່າຍສາມາດຄຳນຶງເຖິງນ້ຳໃຈຂອງອົງການອາເປັກທີ່ເປັນເຈົ້າຕົນເອງ,ສະໝັກໃຈແລະປຶກສາຫາລືກັນເພື່ອເປັນເອກະສັນກັນນັ້ນ,ຜ່ານການປຶກ ສາຫາລືກັນ,ແລະບົນພື້ນຖານທີ່ຄຳນຶງເຖິງລະດັບການພັດທະນາແລະຄວາມເອົາໃຈໃສ່ທີ່ຕ່າງກັນຂອງສະມາຊິກຕ່າງໆຢ່າງເຕັມທີ່,ຊຸກຍູ້ໃຫ້ກອງປະຊຸມໄດ້ຮັບໝາກຜົນທີ່ສະໝ່ຳ ສະໝີກັນແລະຕິດແທດຕົວຈິງທີ່ຝ່າຍຕ່າງໆສາມາດຮັບເອົາໄດ້ໃນທີ່ສຸດ,ສະແດງໃຫ້ເຫັນນ້ຳໃຈຄອບຄົວອາເປັກທີ່ສະມາຊິກນ້ອຍໃຫຍ່ມີຄວາມສະໝີພາບກັນ,ນີ້ແມ່ນສິ່ງສຳຄັນທີ່ສຸດຕໍ່ການຮ່ວມມືຂອງອົງການອາເປັກທີ່ຈະໄດ້ຮັບຄວາມຄືບໜ້າຢ່າງບໍ່ຢຸດຢັ້ງ.
