ວັນທີ14 ພະຈິກນີ້,ທ່ານລູກັສ ພາພາເດມົສ໌,ນາຍົກລັດຖະມົນຕີຄົນໃຫມ່ຂອງເກຼັກກ່າວວ່າ,ສະພາເກຼັກຈະຮັບຮອງສັນຍາຊ່ອຍເຫຼືອສະບັບໃຫມ່ທີ່ຜູ່ນຳປະເທດເຂດໃຊ້ເງິນເອີໂຣໄດ້ລົງນາມໃນເດືອນຜ່ານມານີ້ກ່ອນທ້າຍປີນີ້,ພ້ອມກັນນັ້ນຈະຊຸກຍູ້ການປະຕິຮູບໂຄງປະກອບ,ເພື່ອສ້າງຄວາມຫມັ້ນໃຈຢູ່ພາຍໃນປະເທດແລະຕ່າງປະເທດຄືນໃຫມ່.
ມື້ດຽວກັນ,ທ່ານພາພາເດມົສ໌ໄດ້ກ່າວຄຳປາໄສໃນສະພາເປັນຄັ້ງທຳອິດຫຼັງຈາກດຳລົງຕຳແຫນ່ງເປັນນາຍົກ ລັດຖະມົນຕີລັດຖະບານປະສົມແລ້ວ.ທ່ານກ່າວວ່າ,ຫນ້າທີ່ທີ່ລັດຖະບານຊຸດໃຫມ່ຈະເຮັດກ່ອນຫມູ່ນັ້ນແມ່ນພະຍາຍາມເຮັດໃຫ້ສະຫະພາບເອີລົບຫຼືEU ແລະອົງການກອງທຶນເງິນຕາສາກົນຫຼື IMF ກ່ອນວັນທີ15 ທັນວາປີນີ້ປ່ອຍເງິນກູ້ງວດທີ6 ໃຫ້ເກຼັກຕາມສັນຍາຊ່ອຍເຫຼືອປີ2010.
ວັນທີ14 ພະຈິກນີ້,ຢູ່ທີ່ນະຄອນໄລບີຊີຂອງເຢຍລະມັນ,ທ່ານນາງແອງເຈຣາ ມິເຄວຣ໌,ນາຍົກລັດຖະມົນຕີເຢຍລະມັນກ່າວວ່າ,ເອີລົບອາດຈະຕົກຢູ່ໃນໄລຍະທີ່ຫຍຸ້ງຍາກທີ່ສຸດນັບແຕ່ສົງຄາມໂລກຄັ້ງທີ2ເປັນຕົ້ນມາ. ປະເທດຕ່າງໆໃນເອີລົບຄວນຜູກເປັນສະຫະພາບການເມືອງທີ່ເຂັ້ມແຂງກວ່າເກົ່າ,ຜ່ານການສ້າງຕັ້ງເອີລົບໃຫມ່ທີ່ເຊື່ອມໂຍງເຂົ້າເປັນອັນຫນຶ່ງອັນດຽວກັນໃນລະດັບສູງມາແກ້ໄຂວິກິດການຫນີ້ສິນແລະສະພາບຫຍຸ້ງຍາກທາງດ້ານເສດຖະກິດໃນປະຈຸບັນນີ້.
