ທ່ານຫູຈິນທ່າວເດີນທາງຈາກອາເມລິກາກັບຄືນຮອດປັກກິ່ງ
(GMT+08:00) 2011-11-15 11:17:30 cri
ຫຼັງຈາກເຂົ້າຮ່ວມກອງປະຊຸມສຸດຍອດບໍ່ເປັນທາງການຂອງອົງການAPECຄັ້ງທີ19ຢູ່ລັດຮາວາຍຂອງອາເມລິກາແລ້ວ,ວັນທີ15ພະຈິກນີ້,ທ່ານຫູຈິນທ່າວ,ປະທານປະເທດຈີນໄດ້ເດີນທາງກັບຄືນຮອດນະຄອນຫຼວງປັກກິ່ງ.
ກອງປະຊຸມສຸດຍອດບໍ່ເປັນທາງການຂອງອົງການການຮ່ວມມືທາງດ້ານເສດຖະກິດອາຊີປາຊີຟິກຫຼືAPECຄັ້ງທີ19ໄດ້ຈັດຂຶ້ນຢູ່ລັດຮາວາຍອາເມລິກາໃນວັນທີ13ພະຈິກນີ້,ກອງປະຊຸມໄດ້ອອກ "ຖະແຫຼງການຮ່ວມໂລໂນລູໆ"---ກ້າວໄປສູ່ເສດຖະກິດພາກພື້ນທີ່ພົວພັນກັນຢ່າງແໜ້ນແຟ້ນ"ແລະບົດບັນທຶກ4ສະບັບ. ທ່ານຫູຈິນທ່າວໄດ້ກ່າວຄຳປາໄສໃນກອງປະຊຸມໂດຍມີຫົວຂໍ້ວ່າ "ຫັນປ່ຽນຮູບແບບການພັດທະນາບັນລຸການເຕີບໂຕຂອງເສດຖະກິດ",ສະເໜີຈຸດຢືນໃນການຊຸກຍູ້ການຄ້າແລະການລົງທຶນແບບເສລີແລະຄວາມສະດວກຢ່າງຮອບດ້ານ,ລົງເລິກການຮ່ວມມືດ້ານການເຕີບໂຕສີຂຽວຢູ່ພາກພື້ນອາຊີປາຊີຟິກ,ເພີ່ມທະວີການປະຕິຮູບໂຄງປະກອບເສດຖະກິດແລະການຈັດວາງການຮ່ວມມືແລະອື່ນໆ. ໃນໄລຍະເຂົ້າຮ່ວມກອງປະຊຸມ,ທ່ານຫູຈິນທ່າວຍັງໄດ້ພົບປະກັບຜູ້ນຳຂອງອາເມລິກາ,ຍີ່ປຸ່ນ,ຫວຽດນາມແລະການາດາ.
