ວັນທີ13ພະຈິກນີ້,ຢູ່ໂຮໂນລູລູເທດສະບານຮາວາຍອາເມລິກາ, ທ່ານພາງເຊີ່ນ, ຮອງຫົວໜ້າກົມສາກົນກະຊວງການຕ່າງປະເທດຈີນ, ທັງເປັນເຈົ້າໜ້າທີ່ລະດັບສູງAPECຂອງຈີນກ່າວວ່າ, ກອງປະຊຸມສຸດຍອດບໍ່ເປັນທາງການຂອງອົງການຮ່ວມມືດ້ານເສດຖະກິດອາຊີປາຊີຟິກຫລືAPECຄັ້ງທີ19ໄດ້ຮັບໝາກຜົນອັນອຸດົມສົມບູນ,ຕິດແທດຕົວຈິງແລະດຸນດ່ຽງ, ໄດ້ສະແດງໃຫ້ເຫັນ່ຈິດໃຈທີ່ເປັນຄອບຄົວດຽວກັນແລະຫລັກການຄວາມເຫັນເປັນເອກະສັນກັນຂອງAPEC.
ໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນ, ທ່ານພາງເຊີ່ນກ່າວວ່າ, ກອງປະຊຸມໄດ້ເປີດເຜີຍ"ຖະແຫຼງການໂຮໂນລູລູ——ເສດຖະກິດພາກພື້ນທີ່ກ້າວໄປສູ່ການພົວພັນອັນໃກ້ຊິດ"ພ້ອມດ້ວຍເອກະສານເພີ່ມເຕີມ4ສະບັບ, ເຊິ່ງພົວພັນເຖິງນະໂຍບາຍປະດິດສ້າງໃໝ໋, ວິສາຫະກິດຂະໜາດກາງແລະນ້ອຍ, ຜະລິດຕະພັນແລະການບໍລິການດ້ານການອະນຸລັກສິ່ງແວດລ້ອມ, ແລະການຮ່ວມມືດ້ານລະບຽບການເປັນຕົ້ນ, ແລະໄດ້ກໍານົດຂໍ້ລິເລີ່ມລະອຽດຈຳນວນໜຶ່ງ, ເຊັ່ນ, ປະຕິບັດຂໍ້ລິເລີ່ມການຫັນການທ່ອງທ່ຽວAPECໃຫ້ສະດວກ, ປະຕິບັດຍຸດທະສາດໃໝ່ທີ່ປະຕິຮູບໂຄງປະກອບເສດຖະກິດAPECແລະອື່ນໆ. ທ່ານພາງເຊີ່ນກ່າວວ່າ, ມາດຕະການດັ່ງກ່າວມີຄວາມໝາຍຢ່າງຕັ້ງໜ້າຕໍ່ການຊຸກຍູ້ການຫັນການລົງທຶນແລະການຄ້າໃນພາກພື້ນອາຊີປາຊີຟິກເປັນແບບເສລີແລະສະດວກ.
ໃນເວລາຕອບຄໍາຖາມກ່ຽວກັບຜູ້ຕາງໜ້າການຄ້າອາເມລິກາຮຽກຮ້ອງໃຫ້ຈີນເຄົາລົບລະບຽບການຄ້າຫລາຍຝ່າຍຂອງໂລກ, ທ່ານພາງເຊີ່ນກ່າວວ່າ, ຖ້າແມ່ນລະບຽບທີ່ປະຊາຄົມໂລກປຶກສາຫາລືເປັນເອກະສັນກັນ, ແລະວາງຮ່ວມກັນ, ຈີນຈະໃຫ້ຄວາມເຄົາລົບຢ່າງແນ່ນອນ.
ກ່ຽວກັບ "ສັນຍາຄູ່ຮ່ວມມືເສດຖະກິດຍຸດທະສາດພາກພື້ນມະຫາສະໝຸດປາຊີຟິກ"ຫລືTPP, ທ່ານພາງເຊີ່ນກ່າວວ່າ, ຈີນມີທ່າທີ່ເປີດກວ້າງຕໍ່ກົນໄກທີ່ມີຜົນດີຕໍ່ການຊຸກຍູ້ເສດຖະກິດພາກພື້ນອາຊີປາຊີຟິກເຊື່ອມໂຍງເຂົ້າເປັນອັນໜຶ່ງອັນດຽວກັນ. ທ່ານກ່າວວ່າ, ກົນໄກໃດໆກໍຄວນຮັກສາການເປີດກວ້າງ, ຄວາມໂປ່ງໃສແລະຄວາມຜ່ອນສັ້ນຜ່ອນຍາວໃຫ້ກັນ, ຈິ່ງສາມາດເສີມຂະຫຍາຍບົດບາດອັນຕັ້ງໜ້າ. ຈີນພວມເອົາໃຈໃສ່ໃນການຄົ້ນຄວ້າTPPຢ່າງຕັ້ງໜ້າ.
