ຊີຣີກ່າວວ່າຈະປະຕິບັດຂໍ້ລິເລີ່ມຂອງສັນນິບາດອາຣັບ ສະຫະພາບເອີລົບຕົກລົງເປີດກວ້າງການລົງໂທດຕໍ່ຊີຣີ
(GMT+08:00) 2011-11-15 10:36:47 cri
ວັນທີ14ພະຈິກນີ້, ທ່ານວາລິດ ອານ ມູອານເລມ ລັດຖະມົນຕີວ່າການກະຊວງການຕ່າງປະເທດຊີຣີກ່າວວ່າ, ສັນນິບາດອາຣັບຕົກລົງງົດສະຖານະພາບຄວາມເປັນປະເທດສະມາຊິກຂອງຊີຣີ ແມ່ນເປັນການກະທຳທີ່ບໍ່ຖືກຕ້ອງແລະຜິດກົດໝາຍ, ແຕ່ຊີຣີຍັງຈະປະຕິບັດຂໍ້ລິເລີ່ມຂອງສັນນິບາດອາຣັບກ່ຽວກັບການແກ້ໄຂວິກິດການຊີຣີ.
ທ່ານມູອານເລມກ່າວວ່າ, ລັດຖະບານຊີຣີອອກແຮງຕະຫຼອດມາເພື່ອຢຸດຕິການໃຊ້ຄວາມຮຸນແຮງທຸກຮູບແບບຢູ່ພາຍໃນປະເທດ, ແລະຖອນທະຫານອອກຈາກບາງຕົວເມືອງທີ່ມີການປະທະກັນ, ໄດ້ປ່ອຍຕົວບຸກຄົນຝ່າຍຄ້ານທີ່ຖືກກັກຂັງ535ຄົນ, ແລະອະນຸຍາດໃຫ້ນັກຂ່າວຕ່າງປະເທດ80ຄົນເຂົ້າປະເທດຊີຣີໃນໄລຍະບຸນກູບານ ຫຼື ອັດຮາ. ການກະທຳດັ່ງກ່າວແມ່ນບໍ່ເຄີຍມີມາກ່ອນ. ທ່ານກ່າວວ່າ, ຊີຣີສະເໜີໃຫ້ສັນນິບາດອາຣັບຈັດກອງປະຊຸມສຸດຍອດໂດຍດ່ວນ, ເພື່ອປຶກສາຫາລືກ່ຽວກັບສະຖານະການໃນຊີຣີໂດຍສະເພາະ.
ໂດຍແນໃສ່ການຕົກລົງຂອງສັນນິບາດອາຣັບ, ວັນທີ14ພະຈິກນີ້, ທ່ານເຊີແກ ລາຟຣົຟ ລັດຖະມົນຕີວ່າການກະຊວງການຕ່າງປະເທດຣັດເຊຍກ່າວວ່າ, ການງົດສະຖານະພາບຄວາມເປັນປະເທດສະມາຊິກສັນນິບາດອາຣັບຂອງຊີຣີ ຈະເສຍໂອກາດສຳຄັນທີ່ເຮັດໃຫ້ສະຖານະການຊີຣີໂປ່ງໃສກວ່າເກົ່າ.
ມື້ດຽວກັນ, ກອງປະຊຸມລັດຖະມົນຕີການຕ່າງປະເທດສະຫະພາບເອີລົບທີ່ຈັດຂຶ້ນຢູ່ບຼຸກແຊນ ຕົກລົງເປີດກວ້າງການລົງໂທດຕໍ່ຊີຣີອີກເທື່ອໜຶ່ງ.
