ບົດລາຍງານຂອງOECDສະແດງໃຫ້ເຫັນວ່າຈັງຫວະເຕີບໂຕຂອງອົງກອນເສດຖະກິດຕົ້ນຕໍໄດ້ຊ້າລົງ
(GMT+08:00) 2011-11-15 15:47:07 cri
ບົດລາຍງານຕົວເລກນຳໜ້າທາງດ້ານເສດຖະກິດໂດຍລວມ ທີ່ອົງການຮ່ວມມືເສດຖະກິດແລະການພັດທະນາ ຫຼື OECD ທີ່ມີສຳນັກງານໃຫຍ່ຕັ້ງຢູ່ນະຄອນຫຼວງປາຣີຂອງຝຣັ່ງ ເປີດເຜີຍໃນວັນທີ14ພະຈິກນີ້ສະແດງໃຫ້ເຫັນວ່າ, ເດືອນກັນຍາປີນີ້, ຈັງຫວະການເຕີບໂຕຂອງອົງກອນເສດຖະກິດຕົ້ນຕໍຂອງໂລກໄດ້ຊ້າລົງອີກ, ຄາດວ່າ, ຈັງຫວະການເຕີບໂຕທາງເສດຖະກິດຂອງອົງກອນເສດຖະກິດເຫຼົ່ານີ້ຈະຊ້າລົງຕໍ່ໄປ, ແລະຊ້າລົງຫຼາຍກວ່າເກົ່າ.
ເມື່ອສັງເກດຈາກດ້ານລວມແລ້ວເຫັນວ່າ, ຕົວເລກນຳໜ້າໃນເດືອນກັນຍາຂອງOECD ແມ່ນ100,4%, ຕ່ຳກວ່າເດືອນກ່ອນ0,4ແຕ້ມ, ໄດ້ຊ້າລົງເປັນ6ເດືອນຕິດຕໍ່ກັນ, ນີ້ສະແດງໃຫ້ເຫັນວ່າໃນຫຼາຍເດືອນມານີ້, ຈັງຫວະການເຕີບໂຕຂອງເສດຖະກິດຊ້າລົງ. ເຂດໃຊ້ເງິນເອີໂຣແລະກຸ່ມG7 ຕ່າງໄດ້ຫຼຸດລົງ0,8ແລະ0,5ເມື່ອທຽບໃສ່ເດືອນກ່ອນ; ສ່ວນ5ປະເທດອາຊີ ຄື ຈີນ, ສ.ເກົາຫຼີ, ຍີ່ປຸ່ນ, ອິນເດຍແລະອິນໂດເນເຊຍ ໄດ້ຫຼຸດລົງ0,3ເມື່ອທຽບໃສ່ເດືອນກ່ອນ.
