ບົດລາຍງານຂອງIMFແລະທະນາຄານໂລກກ່າວວ່າໂດຍລວມແລ້ວລະບົບທະນາຄານຂອງຈີນມີຄວາມໝັ້ນທ່ຽງ
(GMT+08:00) 2011-11-16 15:23:58 cri
ບົດລາຍງານທີ່ກ່ຽວຂ້ອງທີ່ອົງການກອງທຶນສາກົນ ຫຼື IMF ແລະທະນາຄານໂລກ ຫຼື WB ເປີດເຜີຍເປັນຄັ້ງທຳອິດໃນວັນທີ15ພະຈິກນີ້ ຊີ້ອອກວ່າ, ລະບົບທະນາຄານຂອງຈີນໂດຍລວມແລ້ວຍັງມີຄວາມໝັ້ນທ່ຽງ, ສາມາດຮັບມືກັບວິກິດການການເງິນສາກົນໄດ້ເປັນຢ່າງດີ.
ບົດລາຍງານຂອງIMF ຊີ້ອອກວ່າ, ການທົດລອງຕໍ່ຄວາມກົດດັນຂອງທະນາຄານການຄ້າ17ແຫ່ງທີ່ໃຫຍ່ທີ່ສຸດຂອງຈີນສະແດງໃຫ້ເຫັນວ່າ, ທະນາຄານສ່ວນຫຼາຍມີຄວາມສາມາດຮັບມືກັບຜົນກະທົບຮ້າຍແຮງໃນດ້ານຕ່າງໆທີ່ເກີດຂຶ້ນແຕ່ລະຢ່າງ ຄື ຄຸນນະພາບຊັບສິນຊຸດໂຊມລົງຢ່າງຫຼວງຫຼາຍ ເຊິ່ງລວມທັງການປັບຂອງຕະຫຼາດອະສັງຫາລິມະຊັບ, ການປ່ຽນແປງຂອງເສັ້ນອັດຕາກຳໄລ່ ແລະການປ່ຽນແປງຂອງອັດຕາແລກປ່ຽນ.
ບົດລາຍງານເຫັນວ່າ, ມາດຕະການປະຕິຮູບທີ່ຂະແໜງການທະນາຄານຂອງຈີນປະຕິບັດໃນຫຼາຍປີທີ່ຜ່ານມາ ໄດ້ຊຸກຍູ້ໃຫ້ຂະແໜງການທະນາຄານຂອງຈີນຫັນເປັນຂະແໜງການທະນາຄານການຄ້າຢ່າງແຂງແຮງ, ເຮັດໃຫ້ຕົ້ນທຶນແລະຄວາມສາມາດສ້າງຜົນກຳໄລ່ຂອງສະຖາບັນການເງິນໃນຂະແໜງການທະນາຄານຂອງຈີນເພີ່ມຂຶ້ນຢ່າງເດັ່ນຊັດ, ຄວາມສາມາດໃນການຄວບຄຸມຄວາມສ່ຽງແລະຄຸນນະພາບຂອງຊັບສິນກໍໄດ້ຍົກສູງຂຶ້ນຢ່າງຫຼວງຫຼາຍ.
ທ້າຍປີ2010ຜ່ານມາ, ອັດຕາພຽງພໍຂອງຜູ້ລົງທຶນຂອງທະນາຄານການຄ້າຈີນແມ່ນ12,17%, ອັດຕາເງິນຕູ້ດ້ອຍຄຸນນະພາບແມ່ນ1,13%.
