ມູນຄ່າການຄ້າລະຫວ່າງຈີນ-ອາຊຽນໃນປີນີ້ຈະສ້າງສະຖິຕິສູງອີກ
(GMT+08:00) 2011-11-17 10:51:08 cri
ບັນດາກອງປະຊຸມສຸດຍອດອາຊີຕາເວັນອອກໄດ້ຈັດຂຶ້ນຢູ່ເກາະບາຫຼີຂອງອິນໂດເນເຊຍໃນວັນທີ18ພະຈິກນີ້. ວັນທີ16ພະຈິກນີ້, ໃນເວລາໃຫ້ສຳພາດຕໍ່ນັກຂ່າວ,ທ່ານສູນິງໆ, ເລຂາທິການໃຫຍ່ປະຈຳການຝ່າຍຈີນຂອງສະພາການຄ້າຈີນ-ອາຊຽນໄດ້ກ່າວຄາດຄະເນວ່າ,ມູນຄ່າການຄ້າລະຫວ່າງຈີນ-ອາຊຽນໃນປີນີ້ຈະສ້າງສະຖິຕິສູງອີກ.
ທ່ານສູນິງໆກ່າວວ່າ,8ເດືອນທຳອິດຂອງປີນີ້,ການລົງທຶນຕໍ່ກັນລະຫວ່າງຈີນກັບອາຊຽນໄດ້ບັນລຸເກືອບ 90ຕື້ໂດລາ,ໃນນັ້ນ,ມູນຄ່າການລົງທຶນຂອງວິສາຫະກິດຈີນທີ່ມີຕໍ່ອາຊຽນໄລ່ລວມແລ້ວໄດ້ມີເຖິງ 22ຕື້3ຮ້ອຍລ້ານໂດລາ. ເຖິງວ່າວິສາຫະກິດຈີນເລີ່ມລົງທຶນຢູ່ອາຊຽນອ່າວຊ້າແດ່ກໍ່ຕາມ,ແຕ່ປີນີ້ເປັນຕົ້ນມາ,ຄວາມໄວໃນການເຕີບໂຕໃນການລົງທຶນຂອງຈີນທີ່ມີຕໍ່ອາຊຽນໄດ້ໄວກວ່າການລົງທຶນຂອງວິສາຫະກິດຈາກບັນດາປະເທດອາຊຽນຢູ່ຈີນ,ອາຊຽນກາຍເປັນຕະຫຼາດທີ່ໃຫຍ່ອັນດັບທີໜຶ່ງຂອງວິສາຫະກິດຈີນໃນການລົງທຶນຕໍ່ຕ່າງປະເທດ.
ອີງຕາມຕົວເລກຂໍ້ມູນຈາກກົມໃຫຍ່ພາສີຈີນແຈ້ງໃຫ້ຮູ້ວ່າ,ປີ2010ຜ່ານມາ,ມູນຄ່າການຄ້າລະຫວ່າງຈີນກັບອາຊຽນໄດ້ບັນລຸຮອດ 292ຕື້780ລ້ານໂດລາ, ເພີ່ມຂຶ້ນ 37,5%ເມື່ອທຽບໃສ່ປີ2009. ແຕ່ເດືອນມັງກອນຫາເດືອນຕຸລາຂອງປີ2011ນີ້, ມູນຄ່າການຄ້າລະຫວ່າງຈີນ-ບັນດາປະເທດອາຊຽນໄດ້ມີເຖິງ 295ຕື້9ຮ້ອຍລ້ານໂດລາ,ເພີ່ມຂຶ້ນ 25,7%ເມື່ອທຽບໃສ່ໄລຍະດຽວກັນຂອງປີກາຍ.
