ກອງປະຊຸມສຸດຍອດອາຊຽນຄັ້ງທີ19ໄຂຂຶ້ນຢູ່ເກາະບາຫຼີຂອງອິນໂດເນເຊຍ
(GMT+08:00) 2011-11-17 12:11:42 cri
ຕາມຂ່າວCri: ກອງປະຊຸມສຸດຍອດອາຊຽນຄັ້ງທີ19ໄດ້ໄຂຂຶ້ນຢູ່ເກາະບາຫຼີຂອງອິນໂດເນເຊຍໃນວັນທີ17ພະຈິກນີ້. ຜູ້ນຳຂອງປະເທດສະມາຊິກອາຊຽນແລະທ່ານສຸຣິນ ພິດສຸວັນເລຂາທິການໃຫຍ່ອາຊຽນໄດ້ເຂົ້າຮ່ວມພິທີໄຂ.
ທ່ານຊຸຊີໂລ ບຳບັງ ຢຸດໂຮໂຢໂນ, ປະທານປະເທດໝູນວຽນຂອງອາຊຽນ, ປະທານາທິບໍດີອິນໂດເນເຊຍໄດ້ເປັນປະທານພິທີໄຂແລະກ່າວຄຳປາໄສ,ທ່ານກ່າວວ່າ, ຫວັງວ່າຜ່ານຈາກກອງປະຊຸມສຸດຍອດຄັ້ງນີ້ຈະສາມາດເພີ່ມທະວີການຮ່ວມມືລະຫວ່າງບັນດາປະເທດພາຍໃນອາຊຽນໃນດ້ານສັງຄົມ,ເສດຖະກິດແລະການເມືອງ,ແລະເພີ່ມທະວີສິດໃນການສະແດງຄຳເຫັນຂອງອາຊຽນໃນສາກົນ.
ກອງປະຊຸມສຸດຍອດຄັ້ງນີ້ໄດ້ທົບທວນຄືນຜົນສຳເລັດໃນຂະບວນການອາຊຽນເຊື່ອມໂຍງເຂົ້າເປັນອັນໜຶ່ງອັນດຽວກັນແລະການຈັດຕັ້ງປະຕິບັດ "ກົດບັດອາຊຽນ",ລວມທັງການສ້າງຕັ້ງປະຊາຄົມອາຊຽນແລະການຕິດຕໍ່ພົວພັນກັນພາຍໃນອາຊຽນທີ່ຖືປະຊາຄົມເສດຖະກິດ,ປະຊາຄົມການເມືອງແລະຄວາມໝັ້ນຄົງແລະປະຊາຄົມວັດທະນະທຳສັງຄົມເປັນ3ເສົາຄ້ຳໃຫຍ່ທີ່ສຳຄັນ. ຜູ້ນຳທີ່ເຂົ້າຮ່ວມກອງປະຊຸມຍັງໄດ້ປຶກສາຫາລືກັນກ່ຽວກັບຫົວຂໍ້ປະຊຸມທີ່ກວ້າງຂວາງກວ່າເກົ່າຂອງອາຊຽນແລະພາຍໃນພາກພື້ນ,ຕົວຢ່າງ,ການພົວພັນທາງການຕ່າງປະເທດລະຫວ່າງບັນດາປະເທດອາຊຽນແລະກອງປະຊຸມສຸດຍອດອາຊີຕາເວັນອອກທີ່ຈະຈັດຂຶ້ນ.
ນອກນີ້, ຜູ້ນຳທີ່ເຂົ້າຮ່ວມກອງປະຊຸມຍັງຈະໄດ້ປຶກສາຫາລືເຖິງບົດບາດຂອງອາຊຽນໃນວຽກງານຕ່າງໆຂອງໂລກ.
ຫົວຂໍ້ຫຼັກຂອງກອງປະຊຸມສຸດຍອດອາຊຽນຄັ້ງນີ້ແມ່ນ "ປະຊາຄົມອາຊຽນໃນປະຊາຄົມປະເທດຕ່າງໆຂອງໂລກ."
