ຄວາມຊີ້ແນະແງ່ໄງ້ຈາກການຮ່ວມມືລະຫວ່າງຈີນ-ອາຊຽນໃນ20ປີ
(GMT+08:00) 2011-11-17 13:09:43 cri
ປີນີ້ແມ່ນປີແລກປ່ຽນໄມຕີຈິດມິດຕະພາບຈີນ-ອາຊຽນ,ທັງແມ່ນປີແຫ່ງການສ້າງການພົວພັນຄູ່ເຈລະຈາລະຫວ່າງຈີນ-ອາຊຽນຄົບຮອບ20ປີ. ໃນ20ປີຜ່ານມາ,ຈີນແລະບັນດາປະເທດອາຊຽນໄດ້ຮ່ວມມືກັນຢ່າງຕັ້ງໜ້າບົນພື້ນຖານຕ່າງຝ່າຍຕ່າງມີຜົນປະໂຫຍດ,ນີ້ບໍ່ພຽງແຕ່ໄດ້ເຮັດໃຫ້ເສດຖະກິດຂອງພາກພື້ນຈະເລີນຮຸ່ງເຮືອງຂຶ້ນ,ຍັງໄດ້ປົກປັກຮັກສາສັນຕິພາບຂອງພາກພື້ນນີ້,ອາດເວົ້າໄດ້ວ່າແມ່ນແບບຢ່າງແຫ່ງການຮ່ວມມືຂອງພາກພື້ນ. ການຮ່ວມກັນພັດທະນາອະນາຄົດໃໝ່ຂອງການຮ່ວມມືລະຫວ່າສອງຝ່າຍ,ນີ້ມີຄວາມໝາຍທາງດ້ານຍຸດທະສາດຫຼາຍຕໍ່ຈີນແລະອາຊຽນ.
20ປີກ່ອນ,ທ່ານສຽນສີເຊິ່ງທີ່ດຳລົງຕຳແໜ່ງເປັນລັດຖະມົນຕີວ່າການກະຊວງການຕ່າງປະເທດຈີນໃນເວລານັ້ນໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນທີ່ຈັດຂຶ້ນຢູ່ກົວລາລຳເປີຂອງມະເລເຊຍຕາມຄຳເຊີນ,ເລີ່ມດຳເນີນການພົວພັນຄູ່ເຈລະຈາລະຫວ່າງຈີນກັບອາຊຽນ. ກົນໄກການເຈະລຈາດັ່ງກ່າວໄດ້ຮັບການປັບປຸງໃຫ້ສົມບູນຂຶ້ນຢ່າງບໍ່ຢຸດຢັ້ງໃນ20ປີຜ່ານມາ,ໄດ້ເປັນຮູບເປັນຮ່າງຂຶ້ນການພົວພັນຄູ່ຮ່ວມມື ນັບມື້ນັບແໜ້ນແຟ້ນ,ຈີນກັບອາຊຽນໄດ້ຮ່ວມມືກັນໃນໄລຍະເວລາອັນຍາວນານຜ່ານມາ,ຮ່ວມກັນຜ່ານຜ່າຄວາມຫຍຸ້ງຍາກຫຼາຍໆເທື່ອ,ໄດ້ປະກອບສ່ວນອັນສຳຄັນເຂົ້າໃນ ສັນຕິພາບ,ສະຖຽນລະພາບແລະການພັດທະນາຂອງພາກພື້ນນີ້.
ໃນການຮ່ວມມືໄລຍະ20ປີທີ່ຜ່ານມາ,ການພົວພັນລະຫວ່າງຈີນກັບອາຊຽນໄດ້ຄ່ອຍໆກ້າວຂຶ້ນຈາກລະດັບ "ຄູ່ເຈລະຈາ"ຍົກສູງຂຶ້ນຮອດລະດັບ "ຄູ່ຍຸດທະສາດ". ເວົ້າສຳລັບອາຊຽນແລ້ວ,ຈີນໝາຍເຖິງອັນດັບທີໜຶ່ງໃນດ້ານຕ່າງໆ: ຄູ່ການຄ້າໃຫຍ່ອັນດັບທີໜຶ່ງ,ປະເທດທຳອິດທີ່ເຂົ້າເປັນພາຄີຂອງ "ສົນທິສັນຍາໄມຕີຈິດແລະການຮ່ວມມືໃນພາກພື້ນອາຊີຕາເວັນອອກສຽງໃຕ້",ປະເທດທຳອິດທີ່ສ້າງການພົວພັນຄູ່ຍຸດທະສາດກັບອາຊຽນ,ປະເທດທຳອິດທີ່ກ່າວຢ່າງຈະແຈ້ງວ່າສະໜັບສະໜູນ"ສົນທິສັນຍາວ່າດ້ວຍເຂດປອດອາວຸດນິວເຄຼຍໃນອາຊີຕາເວັນອອກສຽງໃຕ້",ແລະເປັນປະເທດທຳອິດທີ່ສ້າງຕັ້ງເຂດການຄ້າເສລີກັບອາຊຽນ,ຊຶ່ງເຂດການຄ້າເສລີນີ້ແມ່ນເຂດການຄ້າເສລີໃຫຍ່ອັນດັບໜຶ່ງລະຫວ່າງປະເທດທີ່ພວມພັດທະນາແລະອື່ນໆ. "ອັນດັບທີໜຶ່ງ"ຕ່າງໆເຫຼົ່ານີ້,ສະແດງໃຫ້ເຫັນຄວາມໝາຍອັນສຳຄັນໃນການຮ່ວມມືລະຫວ່າງສອງຝ່າຍ,ທັງສະແດງໃຫ້ເຫັນເຖິງການຮ່ວມມືລະຫວ່າງສອງຝ່າຍໃນ20ປີຜ່ານມາແມ່ນມີປະສິດທິຜົນຢ່າງຈະແຈ້ງ.
ເມື່ອຫຼຽວເບິ່ງອານາຄົດໃນທົດສະວັດທີ2ຂອງສັດຕະວັດ21, ຮູບການຮ່ວມມືທີ່ດຳເນີນໄປດ້ວຍປະສິດທິຜົນຢ່າງຈະແຈ້ງລະຫວ່າງຈີນ-ອາຊຽນຈະຊຸກຍູ້ຄວາມໄວ້ເນື້ອເຊື່ອໃຈກັນທາງດ້ານການເມືອງ,ຄວາມຈະເລີນຮຸ່ງເຮືອງດ້ານເສດຖະກິດແລະວັດທະນະທຳຂອງສອງຝ່າຍ.
ໃນຂົງເຂດເສດຖະກິດການຄ້າ,ໃນ20ປີຜ່ານມາ,ມູນຄ່າການຄ້າລະຫວ່າງສອງຝ່າຍສະເລ່ຍຕໍ່ປີໄດ້ເຕີບໂຕຫຼາຍກວ່າ 20%, ພາສີລະຫວ່າງສອງຝ່າຍໄດ້ຫຼຸດລົງຢ່າງບໍ່ຢຸດຢັ້ງ,ໃນດ້ານຊັບພະຍາກອນສອງຝ່າຍໄດ້ແລກປ່ຽນກັນ,ໃນຂົງເຂດການລົງທຶນສອງຝ່າຍເປັນເປົ້າໝາຍທີ່ສຳຄັນ,ໄດ້ສ້າງຜົນປະໂຫຍດທີ່ແທ້ຈິງໃຫ້ແກ່ປະຊາຊົນສອງຝ່າຍ,ໂດຍສະເພາະແມ່ນການສ້າງເຂດການຄ້າເສລີຈີນ-ອາຊຽນສຳເລັດຜົນ,ໄດ້ສ້າງພາບອະນາຄົດທີ່ກວ້າງຂວາງຂອງການຮ່ວມມືດ້ານເສດຖະກິດການຄ້າໃນພາກພື້ນ.
ໃນຂົງເຂດວັດທະນະທຳ, ໃນ20ປີຜ່ານມາ,ຈີນກັບອາຊຽນໄດ້ສ້າງເວທີທີ່ກວ້າງຂວາງໃນການຕິດຕໍ່ພົວພັນກັນແລະການແລກປ່ຽນກັນ,ການແລກປ່ຽນລະຫວ່າງບຸກຄະລາກອນນັບມື້ນັບຫຼາຍຂຶ້ນ,ຄວາມເຫັນດີເຫັນພ້ອມໃນດ້ານວັດທະນະທຳກໍ່ນັບມື້ນັບເພີ່ມທະວີຂຶ້ນ. ເບິ່ງອະນາຄົດໃນ10ປີຂ້າງໜ້າ,ການແລກປ່ຽນດ້ານວັດທະນະທຳແລະບຸກຄະລາກອນລະຫວ່າງສອງຝ່າຍຍ່ອມຈະເພີ່ມທະວີຂຶ້ນຫຼາຍກວ່າເກົ່າຄຽງຄູ່ກັບການສື່ສານດ້ານການເມືອງແລະການຮ່ວມມືດ້ານເສດຖະກິດການຄ້າ,ນີ້ຈະກາຍເປັນການຮັບປະກັນທີ່ດີທີ່ສຸດໃນການປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.
ພີ່ນ້ອງທີ່ຢູ່ໄກກັນຈະບໍ່ສະໜິດສະໜົມກັນເທົ່າໝູ່ເພື່ອນທີ່ຢູ່ບ້ານໃກ້ເຮືອນຄຽງ. ການພັດທະນາຂອງຈີນແມ່ນຍ້ອນໄດ້ຮັບຜົນດີຈາກໄມຕີຈິດມິດຕະພາບແລະການຮ່ວມມືກັບບັນດາປະເທດອາຊຽນ,ການພັດທະນາຂອງຈີນກໍ່ໄດ້ນຳເອົາກາລະໂອກາດທີ່ສຳຄັນມາໃຫ້ແກ່ຄວາມຈະເລີນຮຸ່ງເຮືອງຂອງອາຊຽນ. ຫວນຄືນຄວາມຫຼັງ,ຫຼຽວເບິ່ງອະນາຄົດ,ຈີນມີຄວາມຕັດສິນໃຈແລະຄວາມໝັ້ນໃຈມາໂດຍຕະຫຼອດໃນການຮັກສາການພົວພັນໄມຕີຈິດມິດຕະພາບຖານບ້ານໃກ້ເຮືອນຄຽງແລະຕ່າງຝ່າຍຕ່າງມີຜົນປະໂຫຍດ,ເປັນເພື່ອນມິດທີ່ດີບ້ານໃກ້ເຮືອນຄຽງທີ່ດີຂອງບັນດາປະເທດອາຊຽນໂດຍຕະຫຼອດ,ຊຸກຍູ້ການຮັກສາຄວາມຈະເລີນຮຸ່ງເຮືອງແລະສະຖຽນລະພາບທີ່ມີມາແຕ່ດົນນານຂອງພາກພື້ນນີ້ໄວ້ໃຫ້ໝັ້ນຄົງຕະຫຼອດໄປ.
