ຕອນບ່າຍວັນທີ17ພະຈິກນີ້, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນໄດ້ເດີນທາງໄປຮອດເກາະບາຫລີຂອງອິນໂດເນເຊຍດ້ວຍເຄື່ອງບິນພິເສດ, ເພື່ອເຂົ້າຮ່ວມກອງປະຊຸມຕ່າງໆຂອງຜູ້ນໍາອາຊີຕາເວັນອອກ.
ທ່ານເວີ່ນເຈ່ຍປາວ, ນາຍົກລັດຖະມົນຕີຈີນໄດ້ເດີນທາງໄປຮອດເກາະບາຫລີຂອງອິນໂດເນເຊຍດ້ວຍເຄື່ອງບິນພິເສດ
ວັນທີ18ຫາວັນທີ19ພະຈິກນີ້, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນຈະເຂົ້າຮ່ວມກອງປະຊຸມສຸດຍອດຈີນ-ອາຊຽນ（10+1）ຄັ້ງທີ14ຄືກອງປະຊຸມລະລຶກຈີນ-ອາຊຽນສ້າງການພົວພັນປະເທດຄູ່ເຈລະຈາຄົບຮອບ20ປີ, ກອງປະຊຸມສຸດຍອດອາຊຽນກັບຈີນ, ຍີ່ປຸ່ນ,ສ.ເກົາຫລີ(10+3)ຄັ້ງທີ14, ກອງປະຊຸມສຸດຍອດອາຊີຕາເວັນອອກຄັ້ງທີ6ແລະການພົບປະລະຫວ່າງຜູ້ນໍາຈີນ, ຍີ່ປຸ່ນແລະສ. ເກົາຫລີ.ນອກນີ້, ທ່ານຍັງຈະເຂົ້າຮ່ວມການພົບປະສອງຝ່າຍກັບຜູ້ນໍາຂອງຫລາຍປະເທດ.
ກອງປະຊຸມຕ່າງໆຂອງຜູ້ນໍາອາຊີຕາເວັນອອກຄັ້ງນີ້ແມ່ນຈັດຂຶ້ນພາຍໃຕ້ສະພາບທີ່ບໍ່ທັນໄດ້ພົ້ນຈາກຜົນກະທົບຂອງວິກິດການການເງິນສາກົນ, ເສດຖະກິດໂລກຟື້ນຕົວຍາກ, ເສດຖະກິດອາຊີຕາເວັນອອກຮັກສາການເຕີບໂຕຢ່າງຕໍ່ເນື່ອງ.ເນື້ອໃນຕົ້ນຕໍຂອງກອງປະຊຸມຄັ້ງນີ້ແມ່ນຊຸກຍູ້ການຮ່ວມມືໃນພາກພື້ນ, ພັດທະນາຮ່ວມກັນ. ກ່ອນໜ້ານີ້, ຈີນກ່າວວ່າ, ຫວັງວ່າກອງປະຊຸມຄັ້ງນີ້ຈະສາມາດເພີ່ມຄວາມສາມັກຄີກັນ, ເພື່ອສ້າງບັນຍາກາດອັນດີໃຫ້ແກ່ການພັດທະນາແລະການຮ່ວມມືຂອງອາຊີຕາເວັນອອກ.ລົງເລິກການຮ່ວມມື, ຊຸກຍູ້ໃຫ້ອາຊີຕາເວັນອອກເພີ່ມກໍາລັງແຮງ,ເພື່ອຮັບມືກັບສິ່ງທ້າທາຍທົ່ວໂລກດີກວ່າເກົ່າ. ແລະຊຸກຍູ້ການຮ່ວມມືລະຫວ່າງກົນໄກຕ່າງໆ.ຈີນສະໜັບສະໜູນການຮ່ວມມືໃນອາຊີຕາເວັນອອກຍືດໝັ້ນໃຫ້ອາຊຽນເປັນຝ່າຍນໍາພາ, ຍິນດີຕ້ອນຮັບປະເທດທີ່ບໍ່ຢູ່ໃນອາຊີຕາເວັນອອກເຂົ້າຮ່ວມແລະເສີມຂະຫຍາຍບົດບາດທີ່ມີລັກລະສະສ້າງສັນ. ຫວັງວ່າກອງປະຊຸມເທື່ອນີ້ຈະໄດ້ຮັບໝາກຜົນອັນຕັ້ງໜ້າ, ຊຸກຍູ້ໃຫ້ການຮ່ວມມືໃນອາຊີຕາເວັນອອກພັດທະນາໄປຕາມທິດທາງທີ່ຕ່າງຝ່າຍຕ່າງມີຜົນປະໂຫຍດ.
