ລັດຖະມົນຕີການຕ່າງປະເທດອາເມລິກາຢ້ຽມຢາມໄທ
(GMT+08:00) 2011-11-17 10:49:12 cri
ຕາມຂ່າວສານຊິນຮວາ, ຕອນຄ່ຳວັນທີ16ພະຈິກນີ້, ໃນເວລາເດີນທາງໄປຮອດປະເທດໄທ, ທ່ານນາງຮິວລາຣີ ຄຼິນຕັນ ລັດຖະມົນຕີວ່າການກະຊວງການຕ່າງປະເທດອາເມລິກາປະກາດວ່າ, ອາເມລິກາຈະໃຫ້ເງິນຊ່ວຍເຫຼືອ10ລ້ານໂດລາແກ່ໄທ, ເພື່ອຊ່ວຍໄທຕ້ານໄພນ້ຳຖ້ວມ.
ຕອນຄ່ຳມື້ດຽວກັນ, ເມື່ອເດີນທາງໄປຮອດນະຄອນຫຼວງບາງກອກແລ້ວ, ທ່ານນາງຮິວລາຣີໄດ້ເຈລະຈາກັບທ່ານນາງຍິ່ງລັກ ຊິນນະວັດ ນາຍົກລັດຖະມົນຕີໄທ. ໃນເວລາຖະແຫຼງຂ່າວຮ່ວມທີ່ຈັດຂຶ້ນຫຼັງການເຈລະຈາ, ທ່ານນາງຮິວລາຣີກ່າວວ່າ, ປະຊາຊົນໄທພວມປະສົບໄພນ້ຳຖ້ວມທີ່ຮ້າຍແຮງກວ່າທຸກຄັ້ງໃນປະຫວັດສາດ, ອາເມລິກາຈະໃຫ້ການຊ່ວຍເຫຼືອທາງພົນລະເຮືອນແລະທາງການທະຫານໃຫ້ແກ່ໄທຫຼາຍກວ່າເກົ່າ.
ກ່ອນໄປຢ້ຽມຢາມໄທ, ທ່ານນາງຮິວລາຣີຍັງໄດ້ໄປຢ້ຽມຢາມຟີລິບປິນ, ແລະໄດ້ລົງລາຍເຊັນໃນຄຳຖະແຫຼງການມານີລາແລະຖະແຫຼງການຮ່ວມກ່ຽວກັບຫຼັກການເພີ່ມທະວີການພົວພັນໝູ່ຄູ່ລະຫວ່າງອາເມລິກາແລະຟີລິບປິນ ທີ່ມີວັດຖຸປະສົງເພີ່ມທະວີການຮ່ວມມືລະຫວ່າງອາເມລິກາກັບຟີລິບປິນ.
