ວັນທີ18ພະຈິກນີ້, ຢູ່ເກາະບາຫລີຂອງອິນໂດເນເຊຍ, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດອາຊຽນ-ຈີນຄັ້ງທີ14, ແລະໄດ້ສະເໜີຂໍ້ລິເລີ່ມກ່ຽວກັບການລົງເລິກການຮ່ວມມືທີ່ມີການປະຕິບັດຕົວຈິງລະຫວ່າງຈີນກັບອາຊຽນ.
ທ່ານເວີ່ນເຈ່ຍປາວກ່າວວ່າ, 20ປີທີ່ຜ່ານມາ, ຈີນແລະອາຊຽນໄດ້ຮັບຜົນສໍາເລັດຢ່າງຫລວງຫລາຍ, ມີຜົນສະທ້ອນອັນຕັ້ງໜ້າແລະເລິກເຊິ່ງຕໍ່ຄວາມກ້າວໜ້າຂອງອາຊີກໍຄືທົ່ວໂລກ.ປະຈຸບັນ, ຈີນແລະອາຊຽນຈະຖືການຊຸກຍູ້ການພັດທະນາຂອງເສດຖະກິດແລະຄວາມກ້າວໜ້າຂອງສັງຄົມເປັນໜ້າທີ່ສໍາຄັນທີ່ສຸດ, ຍຶດໝັ້ນໃຫ້ອາຊຽນນໍາພາຄວາມຄືບໜ້າທາງດ້ານການຮ່ວມມືໃນອາຊີຕາເວັນອອກ, ຮັກສາຜົນປະໂຫຍດຮ່ວມໃນຂົງເຂດຫລາຍຝ່າຍ, ພະຍາຍາມເພື່ອຊຸກຍູ້ການສ້າງລະບຽບໃໝ່ທາງດ້ານເສດຖະກິດແລະການເມືອງສາກົນອັນຍຸດຕິທໍາແລະສົມເຫດສົມຜົນ. ຈີນຍິນດີເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ຄູ່ຮ່ວມມືທີ່ດີຕະຫລອດໄປກັບອາຊຽນ.
ທ່ານເວີນເຈ່ຍປາວຍັງໄດ້ສະເໜີຂໍ້ລິເລີ່ມກ່ຽວກັບການລົງເລິກການຮ່ວມມືຕິດແທດຕົວຈິງລະຫວ່າງຈີນກັບອາຊຽນ, ຄື, ສອງຝ່າຍຄວນເປີດກວ້າງການຮ່ວມມືການຄ້າແລະການລົງທຶນ, ຖືການກໍ່ສ້າງພື້ນຖານໂຄງລ່າງໄວ້ຢູ່ໃນຖານະສໍາຄັນກວ່າໝູ່, ລົງເລິກການຮ່ວມມືໃນຂົງເຂດການເງິນ, ບຸກເບີກການຮ່ວມມືທີ່ຕິດແທດຕົວຈິງທາງດ້ານທະເລ, ລົງເລິກການຮ່ວມມືໃນຂົງເຂດວິທະຍາສາດເຕັກໂນໂລຊີແລະການພັດທະນາແບບຍືນຍົງ, ເອົາໃຈໃສ່ການຮ່ວມມືໃນຂົງເຂດສັງຄົມແລະຊີວິດການເປັນຢູ່ຫລາຍກວ່າເກົ່າ.
ໃນມື້ດຽວກັນ, ຜູ້ນໍາປະເທດອາຊຽນທີ່ເຂົ້າຮ່ວມປະຊຸມໄດ້ຕີລາຄາໃນລະດັບສູງຕໍ່ຂະບວນການພັດທະນາແລະຜົນສໍາເລັດຂອງການພົວພັນລະຫວ່າງຈີນກັບອາຊຽນໃນ20ປີຜ່ານມາ, ຍ້ອງຍໍຊົມເຊີຍຈີນປະຕິບັດນະໂຍບາຍທີ່ມີໄມຕີຈິດມິດຕະພາບຖານບ້ານໃກ້ເຮືອນຄຽງເປັນເວລາຍາວນານ, ໃຊ້ການປະຕິບັດຕົວຈິງສະໜັບສະໜູນການພັດທະນາຂອງປະເທດອາຊຽນແລະການສ້າງອາຊຽນເຊື່ອມໂຍງເຂົ້າເປັນອັນໜຶ່ງອັນດຽວກັນ, ແລະສະແດງວ່າປະເທດຕ່າງໆໃນອາຊຽນຍິນດີຮ່ວມກັບຈີນສະໜັບສະໜູນເຊິ່ງກັນແລະກັນ,ປະສານງານຢ່າງໃກ້ຊິດ, ຍົກສູງລະດັບການຮ່ວມມືທີ່ຕິດແທດຕົວຈິງຢ່າງຮອບດ້ານ, ຮ່ວມກັນປະກອບສ່ວນເຂົ້າໃນການຊຸກຍູ້ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນແລະທົ່ວໂລກ.
