ໃນຕອນເຊົ້າຂອງວັນທີ 18 ພະຈິກນີ້, ທີ່ສູນກາງຊາວໜຸ່ມປະຊາຊົນປະຕິວັດລາວ ທ່ານ ດຣ ຄໍາຜາ ພິມມະສອນ ຄະນະເລຂາທິການສູນກາງຊາວໜຸ່ມ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ພ້ອມດ້ວຍຄະນະໄດ້ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນຊາວໜຸ່ມສູນກາງຂອງຈີນ ເຊິ່ງນຳໂດຍທ່ານເມິງ ຈີສາງ ຮອງຫົວໜ້າສູນຂໍ້ມູນຂ່າວສານວິທະຍຸ-ໂທລະພາບແຫ່ງຊາດຈີນ ໃນໂອກາດທີ່ມາຢ້ຽມຢາມລາວແຕ່ວັນທີ 17 – 19 ພະຈິກນີ້.
ໃນການເຂົ້າຢ້ຽມຂໍ່ານັບຄັ້ງນີ້, ທ່ານ ດຣ ຄໍາຜາ ພິມມະສອນໄດ້ຕີລາຄາສູງແລະສະແດງຄວາມຍິນດີ ຕໍ່ການຢ້ຽມຢາມຂອງຄະນະຊາວໜຸ່ມສູນກາງຂອງຈີນໃນຄັ້ງນີ້, ທ່ານກ່າວວ່າ: ການມາຢ້ຽມຍາມເທື່ອນີ້ເປັນການປະກອບສ່ວນໃນການເພີ່ມທະວີສາຍພົວພັນມິດຕະພາບແລະການຮ່ວມມືທີ່ມີມາແຕ່ດົນນານລະຫວ່າງລາວ - ຈີນ ກໍຄືຂອງສອງຄະນະຊາວໜຸ່ມ, ປີນີ້ມີຄວາມໝາຍດ້ານປະຫັວດສາດໃນການສະເຫຼີມສະ ຫຼອງວັນສ້າງຕັ້ງສາຍພົວພັນທາງການທູດລາວ-ຈີນ ຄົບຮອບ 50 ປີ
ໃນໄລຍະຜ່ານມາຄະນະຊາວໜຸ່ມກອມມູນິດຈີນ ໄດ້ໃຫ້ຄວາມຊ່ວຍເຫຼືອຊາວໜຸ່ມລາວຕະຫຼອດມາ, ໄດ້ມີການປະກອບສ່ວນອັນໃຫ່ຍຫຼວງທີ່ສຸດໃຫ້ຊາວໜຸ່ມລາວເຊັ່ນ: ຊ່ວຍເຫຼືອສ້າງຕຶກອາຄານໃນການຮຽນພາສາຈີນ, ການເຝິກອົບຮົມ, ທືນທັດສະນະສຶກສາໃນແຕ່ລະປີ ນອນນັ້ນຊາວໜຸ່ມສອງປະເທດຊາຍແດນຍັງມີການແລກປ່ຽນກັນຕະຫຼອດມາ
ໃນໂອກາດດຽວກັນນີ້, ທ່ານ ເມີງ ຈີຈາງ (MENG jichang) ໄດ້ສະແດງ ຄວາມຂອບໃຈຢ່າງສູງຕໍ່ ທ່ານ ດຣ ຄໍາຜາ ພິມມະສອນ ພ້ອມຄະນະທີ່ໄດ້ໃຫ້ກຽດຕ້ອນຮັບຢ່າງອົບອຸ່ນແລະເປັນກຽດຢ່າງສູງ. ທ່ານກ່າວວ່າ: ນີ້ເປັນໝາກຜົນການພົວພັນລະຫ່ວາງຈີນ-ລາວ, ພວກເຮົາຈະເສີມຂະຫຍາຍສາຍພົວພັນ ພ້ອມທັງຈະເພີ່ມທະວີຮັດແໜ້ນສາຍພົວພັນແລະການຮ່ວມມືລະຫ່ວາງຄະນະຊາວໜຸ່ມສອງປະເທດໃຫ້ເພີ່ມທະວີຂື້ນຕາມທິດຊີ້ນຳຂອງພັກ - ລັດຖະບານຂອງທັງສອງປະເທດ.
ນອກນີ້, ຕອນເຊົ້າວັນດຽວກັນ, ຄະນະດັ່ງກ່າວໄດ້ເຂົ້າຮ່ວມກອງປະຊຸມປືກສາຫາລືພົບປະສອງຝ່າຍກ່ຽວກັບການຮ່ວມມື. ກອງປະຊຸມໄດ້ຕີລາຄາສູງຕໍ່ການຮ່ວມມື ກໍຄືການຊ່ວຍເຫຼືອຂອງຊາວໜຸ່ມຈີນໃນໄລຍະຜ່ານມາ ແລະໄດ້ປຶກສາຫາລືກັນກ່ຽວກັບການຮ່ວມມືຂອງສອງຝ່າຍເພື່ອເຮັດໃຫ້ການຮ່ວມມືລະ ຫວ່າງສອງຊາດລາວ -ຈີນ ກໍຄືຂອງຄະນະຊາວໜຸ່ມທັງສອງປະເທດໃຫ້ສູ່ລວງເລິກ ຍາວນານແລະໝັ້ນຄົງ.
