IAEAສົ່ງຄະນະຜູ້ແທນໄປອີຣານເພື່ອປຶກສາຫາລືກ່ຽວກັບບັນຫານິວເຄຼຍກັບອີຣານ
(GMT+08:00) 2011-11-18 11:31:13 cri
ວັນທີ17ພະຈິກນີ້, ຢູ່ນະຄອນວຽນ, ທ່ານຢູກິຢາ ອາມາໂນ ຜູ້ອຳນວຍການໃຫຍ່ອົງການພະລັງງານປະລະມານູສາກົນ ຫຼື IAEA ກ່າວວ່າ, ຈະສົ່ງຄະນະຜູ້ແທນລະດັບສູງ ໂດຍແມ່ນທ່ານເຮີມານ ນັກເກເອີດສ໌ ຮອງຜູ້ອຳນວຍການໃຫຍ່IAEA ເປັນຫົວໜ້າຄະນະ ໄປຍັງອີຣານ, ເພື່ອປຶກສາຫາລືກ່ຽວກັບບັນຫານິວເຄຼຍອີຣານທີ່ຄົງຄ້າງຢູ່.
ໃນເວລາຖະແຫຼງຂ່າວທີ່ຈັດຂຶ້ນໃນມື້ດຽວກັນ, ທ່ານຢູກີຢາ ອາມາໂນ ກ່າວວ່າ, ການສົນທະນາກັບອີຣານຈະເລີ່ມຂຶ້ນໃນໄວໆນີ້, ແລະເຫັນວ່າ, ການດຳເນີນການສົນທະນາແບບນີ້ແມ່ນສອດຄ່ອງກັບຜົນປະໂຫຍດຂອງອີຣານ.
ມື້ດຽວກັນ, ຢູ່ນະຄອນຫຼວງມົສກູ, ທ່ານເຊີເກ ລາຟຣົຟ ລັດຖະມົນຕີວ່າການກະຊວງການຕ່າງປະເທດຣັດເຊຍກ່າວວ່າ, ຣັດເຊຍຫວັງຢາກໃຫ້ມະຕິກ່ຽວກັບບັນຫານິວເຄຼຍອີຣານທີ່6ຝ່າຍຕົກລົງກັນ ຖືກຮັບຮອງໃນກອງປະຊຸມຂອງIAEA ທີ່ຈະຈັດຂຶ້ນໃນວັນທີ18ພະຈິກນີ້. ທ່ານເຫັນວ່າ, ມະຕິດັ່ງກ່າວໄດ້ສ່ອງແສງໃຫ້ເຫັນຫຼັກໝັ້ນລວມຂອງ6ປະເທດ ຄື ຣັດເຊຍ, ຈີນ, ອາເມລິກາ, ອັງກິດ, ຝຣັ່ງແລະເຢຍລະມັນ ທີ່ເຂົ້າຮ່ວມການໄກ່ເກຍ່ບັນຫານິວເຄຼຍອີຣານ, ຊຸກຍູ້ໃຫ້ອີຣານເພີ່ມທະວີການຮ່ວມມືກັນກັບIAEAຕໍ່ໄປ.
