ຈີນຈະຮ່ວມກັບອາຊຽນຊຸກຍູ້ການສ້າງສາເຂດການຄ້າເສລີແລະຊຸກຍູ້ການເຊື່ອມຕໍ່ກັນຢູ່ເທິງທະເລ
(GMT+08:00) 2011-11-18 14:55:23 cri
ຕອນເຊົ້າວັນທີ18ພະຈິກນີ້, ຢູ່ເກາະບາຫຼຂອງອິນໂດເນເຊຍີ, ທ່ານຫຼິນເຈິ້ນໝິນ ຜູ້ຊ່ວຍລັດຖະມົນຕີວ່າການກະຊວງການຕ່າງປະເທດຈີນກ່າວວ່າ, ໃນກອງປະຊຸມສຸດຍອດຈີນອາຊຽນຄັ້ງທີ14 ກໍຄືກອງປະຊຸມສຸດຍອດລະລຶກຈີນອາຊຽນສ້າງການພົວພັນຄູ່ເຈລະຈາຄົບຮອບ20ປີ, ທ່ານເວີ່ນເຈຍປາວ ນາຍົກລັດຖະມົນຕີຈີນກ່າວວ່າ, ຈີນຈະຮ່ວມກັບອາຊຽນຊຸກຍູ້ການສ້າງສາເຂດການຄ້າເສລີແລະຊຸກຍູ້ການເຊື່ອມຕໍ່ກັນຢູ່ເທິງທະເລ.
ຕອນເຊົ້າມື້ດຽວກັນ, ທ່ານນາຍົກລັດຖະມົນຕີເວີ່ນເຈຍປາວແລະຜູ້ນຳ10ປະເທດອາຊຽນໄດ້ເຂົ້າຮ່ວມກອງປະຊຸມສຸດຍອດຈີນອາຊຽນຄັ້ງທີ14 ກໍຄືກອງປະຊຸມສຸດຍອດລະລຶກຈີນອາຊຽນສ້າງການພົວພັນຄູ່ເຈລະຈາຄົບຮອບ20ປີ, ແລະກ່າວຄຳປາໄສຫົວຂໍ້ຫຼັກ. ຕາມການໃຫ້ຂ່າວຂອງທ່ານຫຼິວເຈິ້ນໝິນ, ໃນບົດປາໄສຂອງທ່ານເວີ່ນເຈຍປາວນັ້ນ, ທ່ານໄດ້ເນັ້ນໜັກວ່າ, ການຮ່ວມມືລະຫວ່າງຈີນກັບອາຊຽນຕ້ອງເນັ້ນໃສ່ຫົວຂໍ້ສາມັກຄີ, ການຮ່ວມມືກັນແລະການພັດທະນາ, ທ່ານໄດ້ກ່າວຢ້ຳເຖິງຫຼັກໝັ້ນໃນການສະໜັບສະໜູນຖານະນຳພາຂອງອາຊຽນໃນການຮ່ວມມືພາກພື້ນອາຊີຕາເວັນອອກ. ທ່ານເວີ່ນເຈຍປາວໄດ້ຕີລາຄາໃນລະດັບສູງແລະຢືນຢັນຜົນສຳເລັດຂອງການຮ່ວມມືລະຫວ່າງຈີນກັບອາຊຽນໃນ20ປີຜ່ານມາຢ່າງເຕັມທີ່, ແລະມີຂໍ້ສະເໜີບາງຢ່າງຕໍ່ການເພີ່ມທະວີການພົວພັນລະຫວ່າງສອງຝ່າຍໃນອະນາຄົດ. ຄື 1, ຊຸກຍູ້ແລະປັບປຸງການສ້າງສາເຂດການຄ້າເສລີໃຫ້ສົມບູນຂຶ້ນຕື່ມອີກ. ແຕ່ເດືອນມັງກອນຮອດເດືອນຕຸລາປີນີ້, ຍອດມູນຄ່າການຄ້າລະຫວ່າງສອງຝ່າຍມີເຖິງ295ຕື້900ລ້ານໂດລາ, ຄາດວ່າຍອດມູນຄ່າການຄ້າໃນໝົດປີຈະຫຼາຍກວ່າ350ຕື້ໂດລາ. ອີງຕາມແຜນການດຳເນີນງານ5ປີລະຫວ່າງປີ2011ຫາປີ2015, ມູນຄ່າການຄ້າລະຫວ່າງຈີນອາຊຽນຈະມີເຖິງ500ຕື້ໂດລາ; 2, ຊຸກຍູ້ການລົງທຶນເຊິ່ງກັນແລະກັນ, ເຊິ່ງລວມທັງສົ່ງເສີມໃຫ້ວິສາຫະກິດທີ່ມີຄວາມສາມາດຂອງຈີນໄປລົງທຶນຢູ່ປະເທດອາຊຽນ; 3, ເພີ່ມທະວີການເຊື່ອມຕໍ່ກັນ, ທ່ານເວີ່ນເຈຍປາວສົ່ງເສີມໃຫ້ສ້າງຕັ້ງຄະນະກຳມາທິການເຊື່ອມຕໍ່ກັນແລະຮ່ວມມືກັນລະຫວ່າງຈີນອາຊຽນ, ຮ່ວມກັນສ້າງເຄືອຂ່າຍເຊື່ອມຕໍ່ກັນເທິງທະເລ; ແລະສຸດທ້າຍແມ່ນເພີ່ມທະວີການຮ່ວມມືທາງດ້ານວິທະຍາສາດເຕັກໂນໂລຊີ, ທ່ານເວີ່ນເຈຍປາວສະເໜີໃຫ້ຈັດເອົາປີ2012ເປັນປີແລກປ່ຽນດ້ານວິທະຍາສາດເຕັກໂນໂລຊີຈີນອາຊຽນ. ຈີນຈະເພີ່ມທະວີແລະຊຸກຍູ້ການພົວພັນລະຫວ່າງສອງຝ່າຍໃນຫຼາຍຂົງເຂດຢ່າງຮອບດ້ານ, ຈັດຕັ້ງປະຕິບັດແຜນດຳເນີນງານຈີນອາຊຽນແຕ່ປີ2011ຮອດປີ2015ເປັນຢ່າງດີ, ຍົກສູງການພົວພັນຈີນອາຊຽນໃຫ້ຂຶ້ນສູ່ລະດັບໃໝ່.
ທ່ານຫຼິວເຈິ້ນໝິນກ່າວວ່າ, ຂໍ້ລິເລີ່ມຂອງທ່ານເວີ່ນເຈຍປາວໄດ້ຮັບການຕີລາຄາສູງແລະຄວາມຊົມເຊີຍຢ່າງເປັນເອກະພາບກັນຈາກບັນດາປະເທດອາຊຽນ. ຜູ້ນຳ10ປະເທດອາຊຽນກ່າວວ່າ, ຄວນຮັກສາທ່ວງທ່າເຕີບໂຕທາງເສດຖະກິດຂອງອາຊີຕາເວັນອອກໃນປະຈຸບັນ, ຂອບໃຈນຳຈີນທີ່ໄດ້ໃຫ້ການຊ່ວຍເຫຼືອແກ່ອາຊຽນໃນການຊຸກຍູ້ການສ້າງສາເຂດການຄ້າເສລີຈີນອາຊຽນ, ເພີ່ມທະວີການຮ່ວມມືທາງເສດຖະກິດແລະຊຸກຍູ້ການເຊື່ອມຕໍ່ກັນໃນ20ປີມານີ້ກັນ.
