ນາຍົກຈີນພົບປະເຈລະຈາກັບເຈົ້າຊຸນຕານຂອງບຣູໄນ
(GMT+08:00) 2011-11-21 17:37:51 cri
ວັນທີ21ພະຈິກນີ້, ທ່ານເວີ່ນເຈ່ຍປາວ,ນາຍົກລັດຖະມົນຕີຈີນທີ່ໄປຢ້ຽມຢາມບຣູໄນໄດ້ພົບປະເຈລະຈາກັບທ່ານຮາສນານ ໂບນເກຍ,ເຈົ້າຊຸນຕານຂອງບຣູໄນ,ສອງຝ່າຍໄດ້ແລກປ່ຽນຄວາມຄິດຄວາມເຫັນກັນກ່ຽວກັບການລົງເລິກການຮ່ວມມືຢ່າງມີໄມຕີຈິດມິດຕະພາບໃນຂົງເຂດຕ່າງໆແລະບັນຫາອື່ນໆທີ່ສອງຝ່າຍມີຄວາມສົນໃຈຮ່ວມກັນ.
ທ່ານເວີ່ນເຈ່ຍປາວກ່າວວ່າ,ໃນຖານະເປັນນາຍົກລັດຖະມົນຕີຂອງຈີນຄົນທຳອິດທີ່ໄປຢ້ຽມຢາມບຣູໄນ,ທ່ານໄດ້ນຳເອົາໄມຕີຈິດມິດຕະພາບຂອງປະຊາຊົນຈີນມາໃຫ້ແກ່ປະຊາຊົນບຣູໄນ,ແລະນຳເອົາຄວາມໝັ້ນໃຈທີ່ເດັດຂາດຂອງລັດຖະບານຈີນໃນການຕັ້ງໜ້າຊຸກຍູ້ການພົວພັນຄູ່ຮ່ວມມືຖານບ້ານໃກ້ເຮືອນຄຽງລະຫວ່າງຈີນ-ບຣູໄນ,ທ່ານເຊື່ອວ່າ,ສອງຝ່າຍຈະສາມາດມີຄວາມເຫັນເປັນເອກະສັນກັນຢ່າງກວ້າງຂວາງໄດ້ໃນການເຈລະຈາ,ຊຸກຍູ້ໃຫ້ການຂະຫຍາຍການພົວພັນລະຫວ່າງສອງປະເທດໄດ້ຮັບຄວາມຄືບໜ້າອັນໃຫຍ່ຫຼວງກວ່າເກົ່າ.
ທ່ານຮາສນານ ໂບເກຍກ່າວວ່າ,ການຢ້ຽມຢາມຂອງທ່ານນາຍົກລັດຖະມົນຕີເວີ່ນເຈ່ຍປາວເທື່ອນີ້ຍ່ອມຈະເປັນການລົງເລິກແລະເປີດກວ້າງການພົວພັນໄມຕີຈິດມິດຕະພາບລະຫວ່າງບຣູໄນກັບຈີນ. ໂດຍສະເພາະແມ່ນຊຸກຍູ້ການແລກປ່ຽນແລະການຮ່ວມມືກັນທາງດ້ານຕ່າງໆໃນປີນີ້ຕື່ມອີກ ຊຶ່ງເປັນ "ປີແຫ່ງໄມຕີຈິດມິດຕະພາບລະຫວ່າງບຣູໄນ-ຈີນ".
ຂ່າວແຈ້ງວ່າ,ຫຼັງຈາກການພົບປະເຈລະຈາແລ້ວ,ສອງຝ່າຍໄດ້ເຊັນເອກະສານຮ່ວມມືຫຼາຍສະບັບທີ່ມີເນື້ອໃນກວມເຖິງຫຼາຍຂົງເຂດ,ເຊັ່ນ: ພະລັງງານ,ຂະແໜງການປ່າໄມ້,ສາທາລະນະສຸກແລະອື່ນໆ.
