ສັນນິບາດປະເທດອາຣັບປະຕິເສດຂໍ້ສະເໜີຂອງຊີຣີກ່ຽວກັບດັດແປງວຽກງານຂອງຄະນະສັງເກດການ
(GMT+08:00) 2011-11-21 13:09:01 cri
ວັນທີ20ພະຈິກນີ້,ສັນນິບາດປະເທດອາຣັບອອກຖະແຫຼງການ,ປະຕິເສດບໍ່ຍອມຮັບຂໍ້ສະເໜີຂອງລັດຖະບານຊີຣີກ່ຽວກັບການດັດແປງວຽກງານຂອງຄະນະຜູ່ສັງເກດການ,ແລະກ່າວວ່າ,ຂໍ້ສະເໜີຂອງຊີຣີຈະປ່ຽນແປງພາລະໜ້າທີ່ແລະຄວາມຮັບຜິດຊອບຂອງຄະນະຜູ່ສັງເກດການ.
ວັນທີ16ພະຈິກນີ້,ລັດຖະມົນຕີວ່າການກະຊວງການຕ່າງປະເທດຂອງສັນນິບາດປະເທດອາຣັບໄດ້ຈັດກອງປະຊຸມພິເສດຂຶ້ນຢູ່ນະຄອນຫຼວງລາບັດຂອງມາຣົກ,ຢືນຢັນວ່າຈະຍົກເລີກສະຖານະພາບເປັນປະເທດສະມາຊິກຂອງສັນນິບາດປະເທດອາຣັບຂອງຊີຣີ,ແລະຮຽກຮ້ອງໃຫ້ລັດຖະບານຊີຣີລົງນາມໃນສັນຍາພາຍໃນ3ມື້ເພື່ອຈະອະນຸຍາດໃຫ້ສັນນິບາດປະເທດອາຣັບສົ່ງຄະນະຜູ່ສັງເກດການໄປຊີຣີ.
ກ່ອນເຖິງເວລາກຳນົດ,ລັດຖະບານຊີຣີໄດ້ສົ່ງຂໍ້ສະເໜີສະບັບໜຶ່ງໃຫ້ແກ່ສັນນິບາດປະເທດອາຣັບກ່ຽວກັບການດັດແປງວຽກງານຂອງຄະນະຜູ່ສັງເກດການ,ຊຶ່ງລວມທັງບໍ່ໃຫ້ຜູ່ສັງເກດການໄປຢ້ຽມຢາມໂຮງໝໍແລະຄຸກ,ບໍ່ສາມາດພົບກັບຄອບຄົວຂອງຝ່າຍຄ້ານທີ່ຖືກຈຳຄຸກ,ຄະນະຜູ່ສັງເກດການຈະເດີນທາງໄປບ່ອນໃດກໍຕ້ອງມີເຈົ້າໜ້າທີ່ຮັກສາຄວາມປອດໄພຂອງຊີຣີເປັນຜູ່ຕິດຕາມໄປນຳ.
ກ່ຽວກັບເລື່ອງນີ້,ໃນວັນທີ20ພະຈິກນີ້,ທ່ານວາລິດ ອານ ມູອານເລັມ,ລັດຖະມົນຕີວ່າການກະຊວງການຕ່າງປະເທດຊີຣີກ່າວວ່າ,ໃນຮ່າງສັນຍາຂອງສັນນິບາດປະເທດອາຣັບທີ່ສົ່ງຄະນະຜູ່ສັງເກດການໄປຊີຣີນັ້ນມີຂໍ້ກຳນົດຈຳນວນໜຶ່ງທີ່ບໍ່ເອົາຫົວຊານຳອະທິປະໄຕຂອງຊີຣີ,ສະນັ້ນຈຶ່ງບໍ່ສາມາດຈະປະຕິບັດໄດ້.
ໃນມື້ດຽວກັນ,ທ່ານບາຊາ ອານ ອາຊັດ,ປະທານາທິບໍດີຊີຣີກ່າວຢ້ຳວ່າ,ລັດຖະບານຊີຣີຈະບໍ່ອ່ອນຍອມຕໍ່ຄວາມກົດດັນຈາກພາຍນອກຢ່າງເດັດຂາດ,ພ້ອມທັງປະຕິເສດບໍ່ໃຫ້ກຳລັງ ຈາກພາຍນອກແຊກແຊງວຽກງານພາຍໃນຂອງຊີຣີ.
ໃນຂະນະດຽວກັນ,ຂະບວນການປະທ້ວງຢູ່ພາຍໃນຊີຣີໄດ້ຮຸນແຮງຂຶ້ນ,ສະຖານະການ ເຄັ່ງຕຶງຂຶ້ນຢ່າງຕໍ່ເນື່ອງ,ຈຳນວນຜູ່ເສຍຊີວິດຍ້ອນການປະທະກັນດ້ວຍຄວາມຮຸນແຮງນັ້ນ ກໍ່ເພີ່ມຫຼາຍຂຶ້ນ.
