ລັດຖະບານເອຢິບມອບສານລາອອກຈາກຕຳແຫນ່ງໃຫ້ກອງທັບ
(GMT+08:00) 2011-11-22 11:32:40 cri
ວັນທີ 21 ພະຈິກນີ້, ລັດຖະບານເອຢິບໄດ້ອອກຖະແຫລງການໂດຍກ່າວວ່າ, ລັດຖະບານທີ່ນຳພາໂດຍທ່ານອັດຊຳ ຊາຣັຟ, ນາຍົກລັດຖະມົນຕີເອຢິບໄດ້ມອບສານລາອອກຈາກຕຳແຫນ່ງໄປຍັງຄະນະກຳມະການສູງສຸດຂອງກອງປະກອບອາວຸດໃນວັນທີ 20 ພະຈິກນີ້, ເພື່ອລໍຖ້າກອງທັບພິຈາລະນາອະນຸມັດ.
ໃນຖະແຫລງການ, ທ່ານມູຮາມັດ ເຮກາຊີ, ໂຄສົກລັດຖະບານເອຢິບກ່າວວ່າ, ຍ້ອນໄດ້ພິຈາລະນາເຖິງສະພາບຫຍຸ້ງຍາກທີ່ປະເທດພວມປະເຊີນໃນປັດຈຸບັນ, ລັດຖະບານຈະສືບຕໍ່ປະຕິບັດຕາມພາລະຫນ້າທີ່ຢ່າງຮອບດ້ານ, ຈົນຮອດສານລາອອກຈາກຕຳແຫນ່ງໄດ້ຮັບການອະນຸມັດ. ທ່ານຮຽກຮ້ອງໃຫ້ປະຊາຊົນຈົ່ງຮັກສາຄວາມອົດກັ້ນ,ສາມັກຄີຮັກສາຄວາມສະຫງົບ,ເຮັດໃຫ້ສະຖານະການມີຄວາມແລະສະຫງົບລົງ, ເຮັດໃຫ້ປະເທດຟື້ນຟູສະຖຽນລະພາບ, ເພື່ອຈັດການເລືອກຕັ້ງປະຊາທິປະໄຕຕາມເວລາກຳນົດ.
ມື້ດຽວກັນ, ໂທລະພາບແຫ່ງຊາດເອຢິບລາຍງານວ່າ, ຝ່າຍກອງທັບຍັງບໍ່ທັນຮັບເອົາສານລາອອກຈາກຕຳແຫນ່ງຂອງລັດຖະບານເທື່ອ.
ມື້ດຽວກັນ, ທ່ານປານກີມູນ, ເລຂາທິການໃຫຍ່ສະຫະປະຊາຊາດໄດ້ ອອກຖະແຫລງການໂດຍຜ່ານໂຄສົກ, ສະແດງຄວາມສົນໃຈຢ່າງສູງຕໍ່ເຫດການຮຸນແຮງທີ່ເກີດຂຶ້ນຢູ່ເອຢິບໃນຫວ່າງກ່ອນນີ້ບໍ່ດົນ,ແລະສະແດງຄວາມເສົ້າສະຫລົດໃຈຕໍ່ຜູ່ທີ່ເສຍຊີວິດແລະສະແດງຄວາມເຫັນໃຈຕໍ່ຜູ່ທີ່ໄດ້ຮັບບາດເຈັບ.ໃນຖະແຫລງການ, ທ່ານຮຽກຮ້ອງລັດຖະບານຊົ່ວຄາວຂອງເອຢິບຮັບປະກັນທາງດ້ານສິດທິມະນຸດແລະເສລີພາບຂອງປະຊາຊົນເອຢິບທຸກຖ້ວນຫນ້າ,ເຊິ່ງລວມທັງສິດໃນການເດີນຂະບວນປະທ້ວງກຳລັງໂດຍສັນຕິ.ທ່ານຮຽກຮ້ອງໃຫ້ຝ່າຍຕ່າງໆຈົ່ງຮັກສາຄວາມອົດກັນໄວ້ແລະຄວາມມີໃຈເຢັນ,ຊຸກຍູ້ຂະບວນການເລືອກຕັ້ງທີ່ມີສັນຕິພາບແລະມີຄວາມໂອບອ້ອມອາລີ, ເພື່ອຖືເປັນບາດກ້າວສຳຄັນທີ່ຈະນຳເອົາເອຢິບໄປສູ່ປະຊາທິປະໄຕແລະຈັດຕັ້ງລັດຖະບານທີ່ມາຈາກການເລືອກຕັ້ງຂອງປະຊາຊົນ.