ລັດຖະມົນຕີການຕ່າງປະເທດຈີນແຈ້ງເຖິງຜົນສຳເລັດແຫ່ງການເຂົ້າຮ່ວມບັນດາກອງປະຊຸມສຸດຍອດອາຊີຕາເວັນອອກແລະການຢ້ຽມຢາມບຼູໄນ
(GMT+08:00) 2011-11-22 14:56:43 cri
ວັນທີ21ພະຈິກນີ້, ທ່ານເວີ່ນເຈຍປາວ ນາຍົກລັດຖະມົນຕີຈີນໄດ້ເດີນທາງໄປເຂົ້າຮ່ວມບັນດາກອງປະຊຸມສຸດຍອດອາຊີຕາເວັນອອກແລະຢ້ຽມຢາມບຼູໄນຢ່າງມີຜົນສຳເລັດແລ້ວກັບຄືນເຖິງນະຄອນຫຼວງປັກກິ່ງ. ໃນມື້ດຽວກັນນີ້, ທ່ານຢາງເຈຍສື ລັດຖະມົນຕີວ່າການກະຊວງການຕ່າງປະເທດຈີນທີ່ຢູ່ໃນຄະນະຢ້ຽມຢາມໄດ້ແຈ້ງເຖິງໝາກຜົນໃນການເຂົ້າຮ່ວມກອງປະຊຸມແລະຢ້ຽມຢາມບຼູໄນເທື່ອນີ້, ທ່ານກ່າວວ່າ, ການເຂົ້າຮ່ວມກອງປະຊຸມແລະຢ້ຽມຢາມບຼູໄນຂອງທ່ານເວີ່ນເຈຍປາວຄັ້ງນີ້ໄດ້ບັນລຸເປົ້າໝາຍໃນການເພີ່ມຄວາມໄວ້ເນື້ອເຊື່ອໃຈກັນ, ຊຸກຍູ້ການຮ່ວມມືກັນແລະຊຸກຍູ້ການພັດທະນາຮ່ວມກັນ, ຈະມີຜົນສະທ້ອນທີ່ເລິກເຊິ່ງຍາວໄກຕໍ່ສັນຕິພາບຖາວອນແລະຄວາມຈະເລີນຮຸ່ງເຮືອງຮ່ວມກັນຂອງພາກພື້ນນີ້.
ທ່ານຢາງເຈຍສືກ່າວວ່າ, ໃນໄລຍະເວລາ5ວັນ, ທ່ານເວີ່ນເຈຍປາວໄດ້ເຂົ້າຮ່ວມການເຄື່ອນໄຫວຫຼາຍຝ່າຍແລະສອງຝ່າຍເກືອບ30ເທື່ອ. ໂດຍປິ່ນອ້ອມການພົວພັນຈີນອາຊຽນ, ການຮ່ວມມືລະຫວ່າງອາຊຽນກັບຈີນ, ຍີປຸ່ນແລະສ.ເກົາຫຼີ, ການຮ່ວມມືລະຫວ່າງຈີນ, ຍີ່ປຸ່ນແລະສ.ເກົາຫຼີ, ການຮ່ວມມືຂອງກອງປະຊຸມສຸດຍອດອາຊີຕາເວັນອອກແລະຫົວຂໍ້ຕ່າງໆ, ພ້ອມທັງໄດ້ກ່າວຄຳປາໄສສຳຄັນຫຼາຍເທື່ອ, ຫວນຄືນຂະບວນວິວັດແຫ່ງການຂະຫຍາຍການຮ່ວມມືໃນອາຊີຕາເວັນອອກ, ວິເຄາະສະຖານະການແລະໜ້າທີ່ສຳຄັນໃນປະຈຸບັນ, ບັນລະຍາຍຫຼັກໝັ້ນແລະຈຸດຢືນຂອງຈີນຕໍ່ການຂະຫຍາຍການຮ່ວມມືໃນອາຊີຕາເວັນອອກໃນອະນາຄົດຢ່າງຈະແຈ້ງ, ແລະມີຂໍ້ລິເລີ່ມສຳຄັນຕໍ່ການລົງເລິກການຮ່ວມມືໃນອາຊີຕາເວັນອອກ, ໄດ້ສົ່ງຂໍ້ມູນຂ່າວສານໃນດ້ານຕັ້ງໜ້າຂອງຈີນທີ່ຢາກປະຕິບັດທິດທາງການຕ່າງປະເທດກັບປະເທດອ້ອມຂ້າງ ທີ່ເປັນມິດກັບປະເທດໃກ້ຄຽງແລະຖືປະເທດໃກ້ຄຽງເປັນໝູ່ຄູ່, ຍຶດຖືນະໂຍບາຍແລະທັດສະນະຄະຕິທີ່ພັດທະນາໂດຍສັນຕິແລະຕ່າງຝ່າຍຕ່າງມີຜົນປະໂຫຍດ ໃຫ້ຝ່າຍຕ່າງໆ, ຊຸກຍູ້ໃຫ້ກອງປະຊຸມພົວພັນກັບຫົວຂໍ້ສາມັກຄີ, ຮ່ວມມືກັນແລະການພັດທະນາຢ່າງແໜ້ນແຟ້ນ, ໄດ້ຮັບໝາກຜົນຢ່າງຕັ້ງໜ້າ, ແລະໄດ້ຮັບຄວາມຊົມເຊີຍໃນລະດັບສູງຈາກຝ່າຍຕ່າງໆ. ທ່ານເວີ່ນເຈຍປາວຍັງໄດ້ພົບປະກັບຜູ້ນຳປະເທດຕ່າງໆທີ່ມາຮ່ວມປະຊຸມຢ່າງກວ້າງຂວາງ, ໄດ້ລົງເລິກແລກປ່ຽນຄວາມເຫັນກ່ຽວກັບການພົວພັນລະຫວ່າງສອງຝ່າຍແລະການຮ່ວມມືໃນພາກພື້ນອາຊີຕາເວັນອອກ, ແລະໄດ້ມີຄວາມຮັບຮູ້ຄືກັນຫຼາຍຢ່າງ.
ທ່ານຢາງເຈຍສືກ່າວວ່າ, ກອງປະຊຸມສຸດຍອດຈີນອາຊຽນໃນປີນີ້ພໍດີແມ່ນກອງປະຊຸມລະລຶກຈີນອາຊຽນສ້າງສາຍພົວພັນຄູ່ເຈລະຈາຄົບຮອບ20ປີທີ່ມີຄວາມໝາຍສຳຄັນ. ໂດຍຢູ່ພາຍໃຕ້ສະພາບການພາຍນອກທີ່ມີຄວາມສັບສົນຂ້ຽວຂາດໃນປະຈຸບັນ, ການເພີ່ມຄວາມໄວ້ເນື້ອເຊື່ອໃຈກັນ, ລົງເລິກການຮ່ວມມືກັນ, ຊຸກຍູ້ການພັດທະນາແມ່ນຄວາມມຸ່ງມາດປາຖະໜາຮ່ວມຂອງຈີນແລະບັນດາປະເທດອາຊຽນ, ສອດຄ່ອງກັບຜົນປະໂຫຍດຮ່ວມຂອງຝ່າຍຕ່າງໆ.
ທ່ານເວີ່ນເຈຍປາວໄດ້ມີຂໍ້ລິເລີ່ມ6ຂໍ້ສຳລັບການລົງເລິກການຮ່ວມມືທີ່ຕິດແທດຕົວຈິງລະຫວ່າງຈີນກັບອາຊຽນ, ກອງປະຊຸມໄດ້ອອກຖະແຫຼງການຮ່ວມວ່າດ້ວຍກອງປະຊຸມສຸດຍອດການລະລຶກ, ໄດ້ວາງແຜນໃຫ້ແກ່ການຮ່ວມມືໃນຂົງເຂດຕ່າງໆລະຫວ່າງຈີນກັບອາຊຽນຢ່າງຮອບດ້ານ, ມີຜົນດີຊຸກຍູ້ໃຫ້ການພົວພັນຄູ່ຍຸດທະສາດລະຫວ່າງສອງຝ່າຍທີ່ອ່ວຍໜ້າໄປສູ່ສັນຕິພາບແລະຄວາມຈະເລີນຮຸ່ງເຮືອງຕື່ມອີກ.
