ຈີນເຊັນອະນຸສັນຍາກັບອາຊຽນ,ເພື່ອເປີດກວ້າງຂົງເຂດການບໍລິການທາງດ້ານການຄ້າຕື່ມອີກ
(GMT+08:00) 2011-11-22 12:30:16 cri
ຕາມຂ່າວສານຈີນ:ຫວ່າງມໍ່ໆມານີ້,ຢູ່ອິນໂດເນເຊຍ,ທ່ານເຊິນເຕີມີງ,ລັດຖະມົນຕີວ່າການກະຊວງການຄ້າຈີນໄດ້ລົງລາຍເຊັນໃນ "ອະນຸສັນຍາກ່ຽວກັບການປະຕິບັດຄຳໝັ້ນສັນຍາລະອຽດຊຸດທີ2ໃນສັນຍາການບໍລິການທາງດ້ານການຄ້າຂອງເຂດການຄ້າເສລີຈີນ-ອາຊຽນ".ໃນຄຳໝັ້ນສັນຍາຊຸດທີ2,ຈີນໄດ້ເປີດປະຕູພາກສ່ວນການບໍລິການຕ່າງໆສູ່ພາຍນອກຕື່ມອີກ,ເປັນຕົ້ນແມ່ນ:ການຂົນສົ່ງຜູ່ໂດຍສານຕາມທາງຫຼວງ,ການອົບຮົມວິຊາຊີບ,ການບັນເທິງແລະວັດທະນະທຳ,ພ້ອມດ້ວຍການບໍລິການທາງດ້ານກິລາເປັນຕົ້ນ.
ກະຊວງການຄ້າຈີນກ່າວວ່າ,ຈີນໄດ້ປະຕິບັດຕາມຄຳໝັ້ນສັນຍາທີ່ມີຕໍ່ອົງການການຄ້າໂລກຫຼືWTO,ໃນຄຳໝັ້ນສັນຍາອັນລະອຽດຊຸດທີ2ດັ່ງກ່າວ,ຈີນຍັງໄດ້ດຳເນີນການດັດປັບແລະປັບປຸງເນື້ອໃນຄຳໝັ້ນສັນຍາຂອງຫຼາຍພາກສ່ວນ,ເປັນຕົ້ນແມ່ນ:ການບໍລິການທາງດ້ານການຄ້າ,ໂທລະຄົມມະນາຄົມ,ການກໍ່ສ້າງ,ຊ່ອງທາງຈຳໜ່າຍ,ການທະນາຄານ, ການທ່ອງທ່ຽວແລະຄົມມະນາຄົມເປັນຕົ້ນ.ໃນຂະນະດຽວກັນນີ້,ຄຳໝັ້ນສັນຍາອັນລະອຽດ ຊຸດທີ2ຂອງບັນດາປະເທດອາຊຽນກໍ່ໄດ້ເພີ່ມຈຳນວນພາກສ່ວນຢ່າງຈະແຈ້ງ,ບໍ່ພຽງແຕ່ໄດ້ ເປີດປະຕູດ້ວຍລະດັບສູງກວ່າເກົ່າບົນພື້ນຖານຄຳໝັ້ນສັນຍາທີ່ມີຕໍ່WTOທໍ່ນັ້ນ,ຫຼາຍປະເທດຍັງໄດ້ໃຫ້ຄຳໝັ້ນສັນຍາທາງດ້ານການໃຫ້ລາຄາທີ່ລື່ນລະດັບການເຈລະຈາຮອບໃໝ່ຂອງWTO.
ເມື່ອອະນຸສັນຍາສະບັບນີ້ໄດ້ສຳເລັດລະບຽບການກວດກາອະນຸມັດທາງດ້ານກົດໝາຍພາຍໃນປະເທດຕ່າງໆຂອງອາຊຽນແລ້ວ,ຈະມີຜົນບັງຄັບໃຊ້ຢ່າງເປັນທາງການແຕ່ວັນທີ1ມັງກອນປີ2012ເປັນຕົ້ນໄປ.
