ມີຫຼາຍກວ່າ300ລ້ານຄົນທີ່ຊົມໃຊ້Micro-Blogຂອງຈີນ
(GMT+08:00) 2011-11-22 12:46:06 cri
ວັນທີ21ພະຈິກນີ້,ກອງປະຊຸມເວທີປຶກສາຫາລືສື່ມວນຊົນທາງອິນເຕີເນັດຈີນຄັ້ງທີ11ທີ່ພວມດຳເນີນໄປຢູ່ເມືອງອູຮ້ານແຂວງຫູເປີຍຂອງຈີນເປີດເຜີຍວ່າ,ປະຈຸບັນນີ້,ເຄື່ອງມືເຄືອຂ່າຍປະຊາສຳພັນທາງອິນເຕີເນັດຕ່າງໆ ຄື:Micro-Blogເປັນຕົ້ນພວມພັດທະນາຢ່າງຟົດຟື້ນ,ຜູ່ໃຊ້Micro- Blogຂອງຈີນມີຫຼາຍກວ່າ300ລ້ານຄົນແລ້ວ.
ໃນກອງປະຊຸມ,ທ່ານຊຽນສຽວຊ່ຽນ,ຮອງຫົວໜ້າຫ້ອງການຂໍ້ມູນຂ່າວສານທາງອິນເຕີເນັດແຫ່ງຊາດຈີນກ່າວວ່າ,ປະຈຸບັນນີ້,ການເຮັດແນວໃດເພື່ອຊຸກຍູ້ໃຫ້Micro-Blogພັດທະນາຢ່າງມີລະບຽບການ,ໃຫ້ການເຜີຍແຜ່ຂໍ້ມູນຂ່າວສານທາງເວັບໄຊຢ່າງຖືກຕ້ອງຕາມລະບຽບການ,ແລະອົບຮົມສະພາບແວດລ້ອມທີ່ມີຄວາມສິວິໄລແລະສົມເຫດສົມຜົນ,ແມ່ນຫົວຂໍ້ອັນໃໝ່ອ່ຽມທີ່ພວກເຮົາປະເຊີນໃນປະຈຸບັນນີ້.
ຂ່າວແຈ້ງວ່າ,ຈີນໄດ້ກາຍເປັນປະເທດໃຫຍ່ທາງດ້ານອິນເຕີເນັດ,ມີຜູ່ໃຊ້ອິນເຕີເນັດຫຼາຍທີ່ສຸດໃນໂລກ.ປະຈຸບັນນີ້,ໄດ້ມີຜູ່ໃຊ້ອິນເຕີເນັດ485ລ້ານຄົນ,ພື້ນຖານໂຄງລ່າງທາງດ້ານອິນເຕີເນັດແມ່ນມີຂະໜາດໃຫຍ່ທີ່ສຸດໃນໂລກ,ແລະອຸດສາຫະກຳອິນເຕີເນັດໄດ້ເປັນຮູບເປັນຮ່າງຂຶ້ນໃນເບື້ອງຕົ້ນ.
ກອງປະຊຸມເວທີປຶກສາຫາລືສື່ມວນຊົນອິນເຕີເນັດຈີນທີ່ຈັດຂຶ້ນເປັນເວລາ2ວັນໄດ້ໄຂຂຶ້ນໃນວັນທີ21ພະຈິກນີ້,ມີຫົວຂໍ້ວ່າ "ຊຸກຍູ້ໃຫ້ສື່ມວນຊົນອິນເຕີເນັດມີຄວາມກ້າວໜ້າໃໝ່,ຊຸກ ຍູ້ໃຫ້ວັດທະນະທຳອິນເຕີເນັດມີຄວາມຈະເລີນຮຸ່ງເຮືອງ".ຜູ່ຮັບຜິດຊອບຂອງສື່ມວນຊົນທາງອິນເຕີເນັດທີ່ສຳຄັນໃນທົ່ວໂລກ,ຜູ່ຊ່ຽວຊານໃນໂຮງຮຽນຂັ້ນສູງແລະເຈົ້າໜ້າທີ່ລັດຖະບານເຂົ້າຮ່ວມທັງໝົດ300ຄົນ.
