ລັດຖະບານຈີນເຜີຍແຜ່"ປື້ມປົກຂາວກ່ຽວກັບນະໂຍບາຍແລະການປະຕິບັດງານຂອງຈີນເພື່ອຮັບມືກັບການປ່ຽນແປງທາງດ້ານດິນຟ້າອາກາດປີ2011"
(GMT+08:00) 2011-11-22 15:33:31 cri
ຕາມຂ່າວCRI:ວັນທີ22ພະຈິກນີ້,ຫ້ອງການຖະແຫຼງຂ່າວຄະນະລັດຖະບານຈີນອອກເຜີຍແຜ່ "ປື້ມປົກຂາວກ່ຽວກັບນະໂຍບາຍແລະການປະຕິບັດງານຂອງຈີນເພື່ອຮັບມືກັບການປ່ຽນແປງທາງດ້ານດິນຟ້າອາກາດປີ2011",ແນະນຳນະໂຍບາຍ,ການປະຕິບັດງານທີ່ຈີນໄດ້ໃຊ້ເພື່ອຮັບມືກັບການປ່ຽນແປງຂອງດິນຟ້າອາກາດແລະໝາກຜົນທີ່ໄດ້ຮັບໃນໄລຍະປີ2006ຫາປີ2010ທີ່ຜ່ານມາ,ພ້ອມດ້ວຍທິດທາງໂດຍລວມເພື່ອຮັບມືກັບການປ່ຽນແປງທາງດ້ານດິນຟ້າອາກາດ ແລະຫຼັກໝັ້ນໃນການເຈລະຈາທີ່ກ່ຽວຂ້ອງແຕ່ປີ2011ຫາປີ2015.
ປື້ມປົກຂາວຊີ້ອອກວ່າ,ລັດຖະບານຈີນຖືການຮັບມືກັບການປ່ຽນແປງທາງດ້ານດິນຟ້າອາກາດເປັນຫົວຂໍ້ສຳຄັນທີ່ພົວພັນເຖິງສະພາບການໂດຍລວມແຫ່ງການພັດທະນາເສດຖະກິດສັງຄົມ,ໄດ້ກຳນົດເອົາຫົວຂໍ້ນີ້ເຂົ້າໃນແຜນການພັດທະນາເສດຖະກິດສັງຄົມໄລຍະຍາວ.
ປື້ມປົກຂາວຂຽນວ່າ,ລັດຖະບານຈີນໄດ້ເຂົ້າຮ່ວມການເຈລະຈາສາກົນດ້ານການຮັບມືກັບການປ່ຽນແປງຂອງດິນຟ້າອາກາດດ້ວຍຄວາມຮັບຜິດຊອບສູງແລະມີລັກສະນະສ້າງສັນ,ເພີ່ມທະວີການປຶກສາຫາລືແລະສົນທະນາໃນຫຼາຍລະດັບໃນຂົງເຂດການປ່ຽນແປງທາງດ້ານດິນຟ້າອາກາດກັບບັນດາປະເທດໃນໂລກ,ພະຍາຍາມຊຸກຍູ້ໃຫ້ຝ່າຍຕ່າງໆບັນລຸຄວາມເຫັນທີ່ເປັນເອກະສັນກັນກ່ຽວກັບບັນຫາການປ່ຽນແປງຂອງດິນຟ້າອາກາດ.ພ້ອມກັນນັ້ນ,ຈີນຕັ້ງໜ້າເຂົ້າ ຮ່ວມແລະຊຸກຍູ້ການຮ່ວມມືທີ່ມີການປະຕິບັດຕົວຈິງລະຫວ່າງລັດຖະບານປະເທດຕ່າງໆແລະອົງການຈັດຕັ້ງສາກົນບົນພື້ນຖານຫຼັກການທີ່ຕ່າງຝ່າຍຕ່າງມີຜົນປະໂຫຍດ,ຕິດແທດຕົວຈິງແລະບັງເກີດຜົນ,ໄດ້ເສີມຂະຫຍາຍບົດບາດທີ່ດີແລະມີລັກສະນະສ້າງສັນເພື່ອຊຸກຍູ້ການຮ່ວມມືຂອງປະຊາຄົມໂລກໃນການຮັບມືກັບການປ່ຽນແປງຂອງດິນຟ້າອາກາດ.
ປື້ມປົກຂາວຂຽນວ່າ,ໃນທ້າຍເດືອນພະຈິກຫາຕົ້ນເດືອນທັນວາປີ2011,ກອງປະຊຸມກ່ຽວກັບ ການປ່ຽນແປງທາງດ້ານດິນຟ້າອາກາດສະຫະປະຊາຊາດຈະຈັດຂຶ້ນຢູ່ເດີບານຂອງອາຟະລິກາໃຕ້,ຈີນເຫັນວ່າ,ກອງປະຊຸມທີ່ເດີບານຄວນປະຕິບັດຕາມຄວາມເຫັນທີ່ເປັນເອກະສັນກັນທີ່ຝ່າຍ ຕ່າງໆບັນລຸໃນກອງປະຊຸມຄານຄຸນປີ2010,ຕົກລົງການກຳນົດຕໍ່ກົນໄກທີ່ກ່ຽວຂ້ອງໃຫ້ລະອຽດ,ດຳເນີນການເຈລະຈາກ່ຽວກັບບັນຫາທີ່ບໍ່ທັນສາມາດໄດ້ຮັບການແກ້ໄຂໃນກອງປະຊຸມຄານຄຸນ,ເພື່ອໃຫ້ໄດ້ຮັບໝາກຜົນທີ່ດີບົນພື້ນຖານທີ່ໄດ້ມີຄວາມເຫັນເປັນເອກະສັນກັນແລ້ວ.
