ຜູ້ຕາງໜ້າຈີນຮຽກຮ້ອງໃຫ້ປະຊາຄົມໂລກສ້າງເງື່ອນໄຂເພື່ອຜ່ອນຄາຍສະຖານະການຄວາມເຄັ່ງຕຶງຂອງຊີຣີ
(GMT+08:00) 2011-11-23 13:14:02 cri
ວັນທີ22ພະຈິກນີ້, ທ່ານວາງມິນ ຮອງຜູ້ຕາງໜ້າຂອງຈີນປະຈຳສະຫະປະຊາຊາດກ່າວວ່າ, ການນຳໃຊ້ມະຕິຈຳແນກປະເທດເພື່ອໃຊ້ຄວາມກົດດັນແມ່ນບໍ່ມີຜົນດີຕໍ່ການແກ້ໄຂຄວາມຂັດແຍ່ງ, ປະຊາຄົມໂລກຄວນເສີມຂະຫຍາຍບົດບາດເຂົ້າໃນທາງສ້າງສັນ, ສ້າງເງື່ອນໄຂເພື່ອຜ່ອນຄາຍສະຖານະການຄວາມເຄັ່ງຕຶງຂອງຊີຣີ.
ມື້ດຽວກັນ, ຄະນະກຳມາທິການທີ3ຂອງສະຫະປະຊາຊາດທີ່ຮັບຜິດຊອບວຽກງານສັງຄົມ, ມະນຸດສະທຳແລະວັດທະນະທຳ ໄດ້ປ່ອນບັດຜ່ານຮ່າງມະຕິກ່ຽວກັບສະພາບສິດທິມະນຸດຂອງຊີຣີ. ສ່ວນຈີນໄດ້ສະຫຼະສິດໃນການປ່ອນບັດ.
ພາຍຫຼັງການປ່ອນບັດ, ທ່ານວາງມິນໄດ້ປະກອບຄຳເຫັນລັກສະນະອະທິບາຍວ່າ, ຈີນເຫັນໂດຍຕະຫຼອດວ່າ, ການດຳເນີນການສົນທະນາເຂົ້າໃນທາງສ້າງສັນແລະຮ່ວມມືກັນແມ່ນຊ່ອງທາງທີ່ຖືກຕ້ອງພຽງໜຶ່ງດຽວໃນການຊຸກຍູ້ແລະປົກປ້ອງສິດທິມະນຸດ, ການນຳໃຊ້ມະຕິຈຳແນກປະເທດເພື່ອໃຊ້ຄວາມກົດດັນແມ່ນບໍ່ມີຜົນດີຕໍ່ການແກ້ໄຂຄວາມຂັດແຍ່ງ. ທ່ານກ່າວວ່າ, ຈີນເອົາໃຈໃສ່ໃນລະດັບສູງຕໍ່ສະຖານະການຊີຣີໃນປະຈຸບັນນີ້, ຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງໃນຊີຣີຢຸດຕິການໃຊ້ຄວາມຮຸນແຮງໃນທັນທີ, ລິເລີ່ມຂະບວນການທາງການເມືອງທີ່ມີລັກສະນະໂອບອ້ອມແລະດຸນດ່ຽງໂດຍໄວ, ຟື້ນຟູສະຖຽນລະພາບແລະຄວາມເປັນລະບຽບຮຽບຮ້ອຍຂອງປະເທດໂດຍໄວ. ຈີນສະແດງຄວາມຊົມເຊີຍຕໍ່ແຜນການໄກ່ເກ່ຍຂອງສັນນິບາດອາຣັບ. ປະຊາຄົມໂລກຄວນເສີມຂະຫຍາຍບົດບາດເຂົ້າໃນທາງທີ່ສ້າງສັນ, ສ້າງເງື່ອນໄຂທີ່ດີເພື່ອຜ່ອນຄາຍສະພາບຄວາມເຄັ່ງຕຶງຂອງຊີຣີ.
