ຕາມຂ່າວສານຊິນຮວາ: ວັນທີ23 ພະຈິກນີ້, ທ່ານດີມິດຕຼີ ເມັດເວເດັຟ,ປະ ທານາທິບໍດີຣັດເຊຍໄດ້ກ່າວຄຳປາໄສຜ່ານທາງໂທລະພາບວ່າ,ຣັດເຊຍຈະໃຊ້ມາດຕະການຕ່າງໆກ່ຽວກັບການຕໍ່ຕ້ານອາເມລິກາແລະອົງການປ້ອງກັນອັດລັງຕິກເຫນືອຫຼືນາໂຕ ( NATO ) ຕິດຕັ້ງລະບົບຕ້ານລູກສອນໄຟນຳວິຖີຢູ່ເອີລົບ, ເຊິ່ງມີທັງການອາດຈະຕິດຕັ້ງອາວຸດແບບໂຈມຕີທີ່ທັນສະໄຫມຢູ່ພາກຕາເວັນຕົກແລະພາກໃຕ້ຂອງຣັດເຊຍ,ເພື່ອຮັບປະກັນໃຫ້ນຳໃຊ້ກຳລັງໄຟທຳລາຍລະບົບຕ້ານລູກສອນໄຟນຳວິຖີຂອງອາເມລິກາ.ທ່ານກ່າວວ່າ,ຖ້າສະພາບນີ້ຊຸດໂຊມລົງ,ຣັດເຊຍຍັງຈະຖອນຕົວອອກຈາກສົນທິສັນຍາຫຼຸດກຳລັງຮົບນິວເຄຼຍລະຫວ່າງຣັດເຊຍ-ອາເມລິກາ,ແລະຢຸດຕິການເຄື່ອນໄຫວໃນການຫຼຸດກຳລັງຮົບແລະຄວບຄຸມການທະຫານຂອງຣັດເຊຍຕື່ມອີກ.
ດ້ວຍເຫດນີ້,ໃນກອງປະຊຸມຂ່າວປະຈຳ,ໂຄສົກຂອງກະຊວງການຕ່າງປະເທດອາເມລິກາໄດ້ເຊື່ອຫມັ້ນຢ່າງແນ່ນາມວ່າ,ລະບົບປ້ອງກັນລູກສອນໄຟນຳວິຖີທີ່ພວມຕິດຕັ້ງຢູ່ເອີລົບຈະບໍ່ແລະບໍ່ອາດຈະເປັນໄພຂົ່ມຂູ່ຕໍ່ຣັດເຊຍ.
ໃນເດືອນພະຈິກປີກາຍນີ້,ໃນກອງປະຊຸມສຸດຍອດລິສບອນ,ຜູ່ນຳຂອງກຸ່ມນາໂຕໄດ້ຕົກລົງໃຫ້ສ້າງຕັ້ງລະບົບຕ້ານລູກສອນໄຟນຳວິຖີທີ່ປົກຄຸມໃນທົ່ວເອີລົບ,ລະບົບຕ້ານລູກສອນໄຟນຳວິຖີຂອງອາເມລິກາທີ່ຕິດຕັ້ງຢູ່ເອີລົບຈະເປັນພາກສ່ວນປະກອບທີ່ສຳຄັນຂອງລະບົບນີ້. ກຸ່ມນາໂຕໄດ້ເຊື້ອເຊີນຣັດເຊຍເຂົ້າຮ່ວມການຮ່ວມມື,ຮ່ວມກັນສ້າງຕັ້ງລະບົບຕ້ານລູກສອນໄຟນຳວິຖີຂອງເອີລົບ,ແຕ່ຣັດເຊຍເຫັນວ່າລະບົບດັ່ງກ່າວນີ້ໄດ້ເປັນໄພຂົ່ມຂູ່ເຖິງຄວາມຫມັ້ນຄົງຂອງປະເທດຕົນເອງ,ແລະຮຽກຮ້ອງໃຫ້ກຸ່ມນາໂຕຮັບປະກັນທາງດ້ານກົດຫມາຍຕໍ່ລະບົບດັ່ງກ່າວຈະບໍ່ເປັນການຮຸກຮານຣັດເຊຍ,ຮອດປະຈຸບັນນີ້,ການເຈລະຈາລະຫວ່າງສອງປະເທດບໍ່ໄດ້ຮັບຄວາມຄືບຫນ້າຫຍັງເລີຍ.
